ទីក្រុងតៃប៉ិ៖ កោះតៃវ៉ាន់បានចេញសេចក្ដីណែនាំទៅប្រជាជនរបស់ខ្លួនថាយកល្អកុំធ្វើដំណើរទៅប្រទេសចិនដីគោក និងដែនដីដទៃទៀតរបស់ចិនដូចជាហុងកុង និងម៉ាកាវ។ ការអំពាវនាវនេះធ្វើឡើងបន្ទាប់ពីរដ្ឋាភិបាលទីក្រុងប៉េកាំងព្រមានកាត់ទោសប្រហារជីវិតអ្នកទាំងឡាយណាដែលប្រកាសគាំទ្រឱ្យកោះតៃវ៉ាន់ប្រកាសឯករាជ្យដើម្បីផ្ដាច់ទឹកដីចេញពីប្រទេសចិន។
លោកលាងវឹនឈា (Liang Wen-chieh) ជាអ្នកនាំពាក្យតៃវ៉ាន់ និងជាអនុប្រធានក្រុមប្រឹក្សាទំនាក់ទំនងជាមួយចិនដីគោកបានចេញសេចក្ដីណែនាំទៅពលរដ្ឋតៃវ៉ាន់ដូចខាងលើនេះតាមរយៈការធ្វើសន្និសីទសារព័ត៌មានកាលពីយប់ថ្ងៃព្រហស្បតិ៍។ តៃវ៉ាន់កំពុងព្រួយបារម្ភកាន់តែខ្លាំងឡើងៗព្រោះខ្លាចអំណាចរបស់ចិន។ ចិនចាត់ទុកតៃវ៉ាន់ជាទឹកដីរបស់ខ្លួន ហើយប្ដេជ្ញាថាត្រូវតែយកតៃវ៉ានមកគ្រប់គ្រងឱ្យទាល់តែបាន។ បើប្រើប្រាស់ធម៌ត្រជាក់គ្មានប្រសិទ្ធភាព ត្រូវតែប្រើប្រាស់កម្លាំងយោធា។
ជាការពិតណាស់ ថ្មីៗនេះ ប្រទេសចិនប្រកាសត្រង់ៗតែម្ដងថាអ្នកណាហ៊ានចេញមុខគាំទ្រឱ្យតៃវ៉ាន់ប្រកាសឯករាជ្យនឹងត្រូវចាប់កាត់ទោសប្រហារជីវិត។ ការប្រកាសនេះកាន់តែច្បាស់នៅពេលលោកឡៃឈីងតេ (Lai Ching-te) ជាប់ឆ្នោតជាប្រធានាធិបតីថ្មីរបស់តៃវ៉ាន់។ ប្រទេសចិនកាត់ផ្ដាច់ទំនាក់ទំនងទាំងស្រុងជាមួយតៃវ៉ាន់ចាប់តាំងពីលោកស្រីសៃអ៊ីងវេន(Tsai Ing-wen) ជាប់ឆ្នោតជាប្រធានាធិបតីតៃវ៉ាន់កាលពីឆ្នាំ២០១៦។ ចិនមានកំហឹងយ៉ាងខ្លាំងនៅពេលលោកស្រីមិនព្រមទទួលស្គាល់ថាតៃវ៉ាន់ជាទឹកដីរបស់ចិន។
លោកលាងវឹនឈាថ្លែងថាតបទៅនឹងគោលការណ៍ថ្មីរបស់ប្រទេសចិនដែលត្រៀមកាត់ទោសប្រហារជីវិតអ្នកប្រព្រឹត្តផ្ទុយនឹង «ច្បាប់ប្រឆាំងនឹងការធ្វើអបគមន៍», រដ្ឋាភិបាលទីក្រុងតៃប៉ិរំលឹកពលរដ្ឋរបស់ខ្លួនថាហានិភ័យលើកនេះមើលស្រាលមិនបានទេ។ បើពួកគេហ៊ានធ្វើដំណើរទៅចិនដីគោក ហុងកុង និងម៉ាកាវអាចប្រឈមនឹងវាសនាអាក្រក់។ មែនទែនទៅ, តៃវ៉ាន់មិនហាមឃាត់ពួកគេមិនឱ្យធ្វើដំណើរទេ។ សំខាន់កុំឱ្យតែទៅដល់ប្រទេសចិនហើយឆ្លៀតនិយាយរឿងនយោបាយ ឬកាន់សៀវភៅ និងបង្ហោះសារនៅលើបណ្ដាញសង្គមអំពីប្រធានបទដែលអាជ្ញាធរចិនអាចចាប់ថ្នាក់បាន និងចាប់កាត់ទោស។
សព្វថ្ងៃនេះ ពលរដ្ឋតៃវ៉ាន់ធ្វើដំណើរទៅចិនដីគោកដើម្បីទៅលេងគ្រួសារ ទៅដើរកម្សាន្ត ឬទៅធ្វើការ ប្រកបមុខរបរផ្សេងៗមានរាប់សែននាក់ក្នុងមួយឆ្នាំៗ។ សម្រាប់មន្ត្រីរដ្ឋបាលថ្នាក់មូលដ្ឋាន ឬមន្ត្រីជាន់ខ្ពស់គណបក្សប្រឆាំងនៅកោះតៃវ៉ាន់ចង់ធ្វើដំណើរទៅចិនដីគោកដើម្បីបង្កើនទំនាក់ទំនង ឬផ្លាស់ប្ដូរបទពិសោធផ្សេងៗ ប្រទេសចិនស្វាគមន៍ដៃ២។ វាជាសញ្ញាល្អដែលពួកគេចង់មកចាប់ដៃជាមួយចិន ហើយចង់ត្រូវរ៉ូវគ្នាជាមួយចិនវិញ។
ប្រទេសចិន និងកោះតៃវ៉ាន់មានជើងហោះហើរដោយផ្ទាល់ទៅវិញទៅមក។ ពួកគេអាចធ្វើដំណើរទៅមកដោយសេរី។ ជាពិសេស អ្នកដែលហោះចេញពីកោះតៃវ៉ាន់ទៅចិនដីគោកត្រូវប្រទេសចិនបើកដៃឱ្យចូលតាមចិត្ត។ ប៉ុន្តែចិនរឹតត្បិតខ្លាំងណាស់មិនឱ្យជនជាតិចិនធ្វើដំណើរជាលក្ខណៈទេសចរណ៍ទៅតៃវ៉ាន់ទេ។
ចិនមិនចង់ឱ្យប្រជាជនខ្លួនយកលុយទៅចាយនៅតៃវ៉ាន់ដែលជាហេតុធ្វើឱ្យតៃវ៉ាន់កាន់តែចម្រុងចម្រើន ហើយងាកមកប្រឆាំងនឹងចិនវិញ។ នេះជាផ្នែក១នៃការដាក់សម្ពាធសេដ្ឋកិច្ចទៅលើតៃវ៉ាន់។ ក្រៅពីនេះ ប្រទេសចិនក៏ព្យាយាមដាក់សម្ពាធយោធាផងដែរដោយធ្វើសមយុទ្ធយោធាហ៊ុមព័ទ្ធកោះតៃវ៉ាន់ជារៀងរាល់ថ្ងៃ។ បើមិនធ្វើសមយុទ្ធយោធាទេក៏ដាក់ពង្រាយនាវាចម្បាំង និងយន្តហោះនៅជុំវិញកោះនេះផងដែរ៕
ចែករំលែកព័តមាននេះ