ទីក្រុងអាត់តាឡង់តា៖ វេទិកាតតាំងមតិគ្នា ឬដេញដោលគ្នារវាងបេក្ខជនប្រធានាធិបតីអាមេរិកទាំង២នាក់បានចាប់ផ្ដើមហើយនៅទីក្រុងអាត់តាឡង់តា (Atlanta) រដ្ឋចចចា (Georgia)។ លោកទាំង២វាយប្រហារគ្នាយ៉ាងចាស់ដៃនៅក្នុងវិស័យជាច្រើនដូចជាគោលនយោបាយស្ដីពីការរំលូតកូន, បញ្ហាអន្តោប្រវេសន៍, សង្គ្រាមអ៊ុយក្រែន និងសង្គ្រាមអ៊ីស្រាអែល។…
ទីក្រុងអាត់តាឡង់តា៖ វេទិកាតតាំងមតិគ្នា ឬដេញដោលគ្នារវាងបេក្ខជនប្រធានាធិបតីអាមេរិកទាំង២នាក់បានចាប់ផ្ដើមហើយនៅទីក្រុងអាត់តាឡង់តា (Atlanta) រដ្ឋចចចា (Georgia)។ លោកទាំង២វាយប្រហារគ្នាយ៉ាងចាស់ដៃនៅក្នុងវិស័យជាច្រើនដូចជាគោលនយោបាយស្ដីពីការរំលូតកូន, បញ្ហាអន្តោប្រវេសន៍, សង្គ្រាមអ៊ុយក្រែន និងសង្គ្រាមអ៊ីស្រាអែល។ ចំណុចសំខាន់១ទៀតពាក់ព័ន្ធនឹងការចាត់ចែងសេដ្ឋកិច្ចជាតិ។ លទ្ធផលស្ទង់មតិបង្ហាញថាបេក្ខជនទាំង២នាក់ទទួលបានសំឡេងគាំទ្រមិនលើសលស់គ្នាប៉ុន្មានឡើយ។
លោកបៃដិនមិនសូវបានសម្ដីដូចលោកត្រាំទេព្រោះលោកមានសំឡេងស្អកៗ។ លោកនិយាយច្រឡំមាត់ ឬនិយាយតតាក់តតុបជាច្រើនលើកច្រើនសានៅក្នុងការដេញដោលគ្នាវគ្គទី១រយៈពេលកន្លះម៉ោង។ ប៉ុន្តែលោកនិយាយបានល្អនៅត្រង់ចំណុចដែលលោកត្រាំខិតខំបិទបាំងការយកលុយទៅបំបិទមាត់តួវីឌីអូអាសអាភាសដើម្បីកុំឱ្យទម្លាយរឿងអាស្រូវផ្លូវភេទរបស់គាត់។ លោកបៃដិនហៅលោកត្រាំជាពិរុទ្ធជនពេញៗមាត់។ ត្រង់ហ្នឹងដែលគាត់មានប្រៀបលើលោកត្រាំ។
ជាការវាយបកវិញ លោកត្រាំនិយាយវាត់កន្ទុយឱ្យលោកបៃដិនវិញយ៉ាងឆ្ងាញ់មាត់។ លោកត្រាំថាលោកបៃដិនក៏មិនល្អប៉ុន្មានដែរ។ កូនប្រុសរបស់គាត់ទើបតែត្រូវតុលាការកាត់ទោសពីបទនិយាយភូតកុហក។ ខ្លួនឯងស្ថិតក្រោមឥទ្ធិពលគ្រឿងញៀន ហើយទៅទិញកាំភ្លើងយកមកកាន់កាប់។ មិនតែប៉ុណ្ណោះ កូនប្រុសលោកបៃដិនគឺលោកហាន់ថឺ បៃដិន (Hunter Biden) ធ្លាប់កាន់កាប់កាំភ្លើងរយៈពេលខ្លីដោយខុសច្បាប់។
មួយស្របក់ក្រោយមក លោកបៃដិនសញ្ជឹងគិតរកចំណុចខ្សោយដទៃទៀតមកវាយបកវិញ។ សមា ជិកគណៈរដ្ឋមន្ត្រីដែលធ្លាប់ធ្វើការក្រោមបង្គាប់របស់លោកត្រាំកាលពីអាណត្តិមុននោះមិនសូវគាំទ្រលោកត្រាំទេ។ ក្នុងនោះក៏មានលោកម៉ាយផិន (Mike Pence) ដែលជាអនុប្រធានាធិបតីជំនាន់លោកត្រាំផងដែរ។ លោកបៃដិនថ្លែងថាអ្នកទាំងនោះដោយសារគេស្គាល់លោកត្រាំច្បាស់ និងធ្លាប់ធ្វើការជិតស្និទ្ធជាមួយលោកត្រាំ ដូច្នេះបានជាពួកគេមិនគាំទ្រ។ ហេតុអ្វីពួកគេមិនគាំទ្រគាត់?
មន្ត្រីសេតវិមាន២នាក់ដែលស្នើសុំមិនបញ្ចេញឈ្មោះប្រាប់ថានៅពេលដេញដោលគ្នានោះ លោកបៃដិនមានជំងឺផ្ដាសាយ។ ប៉ុន្តែអ្វីដែលសំខាន់គឺការនិយាយតតាក់តតុបនៅពេលនោះអាចធ្វើឱ្យអ្វីដែលគេធ្លាប់តែព្រួយបារម្ភអំពីបញ្ហាសមត្ថភាពខួរក្បាល និងវ័យចាស់ជរារបស់គាត់ស្រាប់ផងនោះរឹតតែធ្វើឱ្យគេខ្វល់ខ្វាយបន្ថែមទៀត។ ពួកគេអាចនឹងគិតថាលោកបៃដិនចាស់រញីរញ័រពេកហើយ ហើយបើទុកជាគាត់ជាប់ឆ្នោតនៅអាណត្តិថ្មីក៏មិនអាចដឹកនាំប្រទេសដោយរលូនបានឡើយ។
ចំណែកលោកត្រាំបាននិយាយពន្លះលោកបៃដិន និងកម្មវិធីនយោបាយរបស់គាត់យ៉ាងចាស់ដៃ។ ត្រាំថាពួកជនអន្តោប្រវេសន៍ដែលហូរចូលប្រទេសអាមេរិកដូចទឹកបាក់ទំនប់នោះបានប្រព្រឹត្តបទល្មើសច្រើនណាស់។ ចំពោះគោលនយោបាយរបស់គណបក្សប្រជាធិបតេយ្យដែលអនុញ្ញាតឱ្យរំលូតកូននោះ លោកត្រាំចាត់ទុកថានេះជានយោបាយសម្លាប់គភ៌ក្នុងផ្ទៃ។
លោកបៃដិន និងលោកត្រាំសុទ្ធតែទទួលរងសម្ពាធដូចគ្នាពាក់ព័ន្ធនឹងចំណុចខ្សោយជាច្រើន។ ហេតុដូចនេះ អ្នកសម្របសម្រួលកម្មវិធីមិនទទួលសំណួរពីប្រិយមិត្តអ្នកទស្សនាទេ។ បញ្ហាចោទដ៏ធំរបស់លោកបៃដិនគឺអាយុកាន់តែច្រើនមែនទែន, ហើយសមត្ថភាពខួរក្បាលក៏ចុះខ្សោយផងដែរ។ រីឯចំណុចខ្សោយរបស់លោកត្រាំត្រង់ថាគាត់ច្រើននិយាយមិនសូវគិតមុខគិតក្រោយទេ ហើយគាត់និយាយស្ដីមិនសូវសំចៃមាត់។ គេហៅថាមនុស្សមាត់ដាច ឬមនុស្សមាត់ឆៅ។ មានអ្វីនៅក្នុងចិត្តប៉ុណ្ណា គាត់និយាយប្រាវៗចេញមកប៉ុណ្ណឹង។ ចំណុចខ្សោយ១ទៀតគឺគាត់ក៏កំពុងមានទោសពៃរ៍ និងជាប់បណ្ដឹងជាច្រើននៅក្នុងតុលាការ។
ចំពោះព្រឹត្តិការណ៍ដែលអ្នកគាំទ្រលោកសម្រុកចូលវិមានរដ្ឋសភាអាមេរិកកាលពីថ្ងៃទី៦ ខែមករា ឆ្នាំ២០២១ដែលនាំឱ្យស្លាប់មនុស្សមួយចំនួន លោកត្រាំយល់ថាលោកគ្មានបានធ្វើអ្វីខុសច្បាប់ទេ។ កាលនោះ លោកអំពាវនាវឱ្យអ្នកគាំទ្រខិតខំឱ្យអស់ពីសមត្ថភាពដើម្បីតវ៉ាលទ្ធផលឆ្នោតបន្ទាប់ពីដឹងថាចាញ់ឆ្នោតលោកបៃដិន។ លោកត្រាំយល់ថាអ្នកដែលត្រូវគេចាប់ខ្លួននៅក្នុងពេលនោះក៏មិនបានធ្វើអ្វីខុសដែរ៕
ចែករំលែកព័តមាននេះ