ទីក្រុងប៊្រុចសែល៖ ថ្មីៗនេះ សហភាពអឺរ៉ុប និងប្រទេសសមាជិករបស់ខ្លួន២ទៀតគឺលីទុយអានី និងអេស្តូនី ទើបតែចុះកិច្ចព្រមព្រៀងសន្តិសុខជាតិជាមួយអ៊ុយក្រែននៅឯកិច្ចប្រជុំកំពូលទីក្រុងប៊្រុចសែល ប្រទេសបែលហ្សិច។ កិច្ចព្រមព្រៀងនេះជាការបង្ហាញថាសហភាពអឺរ៉ុបនៅតែយកចិត្តទុកដាក់ខ្ពស់ចំពោះអ៊ុយក្រែនលើវិស័យ៩ជាអាទិភាពពាក់ព័ន្ធនឹងសន្តិសុខជាតិ និងការពារជាតិ។
![](https://kohsantepheapdaily.com.kh/wp-content/uploads/2024/06/136961daf198b83e2c6fbbeae2cb6a1a.jpg)
ក្នុងនោះមានគម្រោងបញ្ជូនអាវុធទៅអ៊ុយក្រែន, ការបណ្ដុះបណ្ដាលជំនាញកងទ័ព, ការសហការផលិតអាវុធ និងគ្រឿងបរិក្ខារយោធារួមគ្នា និងការដោះមីន។ នេះបើយោងតាមសេចក្ដីព្រាងដែលអ្នកសារព័ត៌មានទទួលបាន។ កិច្ចព្រមព្រៀងដែលចុះហត្ថលេខាអមជាមួយឯកសារជាច្រើនទៀតរវាងអ៊ុយក្រែន និងលីទុយអានី និងអេស្តូនីនោះមានគោលដៅបំពេញបន្ថែមទៅលើកិច្ចព្រមព្រៀងស្រដៀងគ្នានេះដែលចុះហត្ថលេខាដោយអ៊ុយក្រែន និងក្រុមប្រទេសសម្ព័ន្ធមិត្ត។
![](https://kohsantepheapdaily.com.kh/wp-content/uploads/2024/06/2f76fd4f67f84b7c49eb9a733424c2f4.jpg)
កិច្ចព្រមព្រៀងទាំងនេះសុទ្ធតែមានសារៈសំខាន់ណាស់នៅពេលអ៊ុយក្រែនបន្តធ្វើសង្គ្រាមដ៏បង្ហូរឈាមទល់នឹងប្រទេសរុស្ស៊ី។ គេមិនដឹងថាតើសង្គ្រាមនេះនឹងបញ្ចប់ទៅវិញនៅពេលណាទេ។ ប៉ុន្តែជំនួយចេះតែធ្លាក់ទៅដល់ដៃអ៊ុយក្រែនជាបណ្ដើរៗ។ រហូតមកដល់ពេលនេះ អ៊ុយក្រែនបានចុះកិច្ចព្រមព្រៀងសន្តិសុខជាតិជាមួយប្រទេសអាមេរិក អង់គ្លេស បារាំង និងអាល្លឺម៉ង។
![](https://kohsantepheapdaily.com.kh/wp-content/uploads/2024/06/48ca2f68f879cda0797058848981afef.jpg)
មន្ត្រីរដ្ឋាភិបាលប្រទេសហត្ថលេខីទាំងនេះថ្លែងថាកិច្ចព្រមព្រៀងនេះមិនដូចកតិកាសញ្ញាជួយការពារគ្នាទៅវិញទៅមកផ្នែកយោធាដូចដែលប្រទេសជាសមាជិកអង្គការណាតូធ្លាប់ចុះហត្ថលេខានោះទេ។ ប៉ុន្តែកិច្ចព្រមព្រៀងជាមួយអ៊ុយក្រែននេះច្រើនផ្ដោតសំខាន់ទៅលើការផ្ដល់ទៅឱ្យអ៊ុយក្រែននូវគ្រឿងសព្វាវុធ និងជំនួយដទៃទៀតដែលអាចជួយពង្រឹងសន្តិសុខជាតិ និងទប់ទល់នឹងលទ្ធភាពនៃការវាយប្រហារនាពេលអនាគត៕
ចែករំលែកព័តមាននេះ