ទីក្រុងប៉េកាំង៖ អតីតរដ្ឋមន្ត្រីការពារជាតិចិន លោកលីសាងហ្វ៊ូ (Li Shangfu) មិនត្រឹមតែត្រូវដកហូតតំណែងជារដ្ឋមន្ត្រីប៉ុណ្ណោះទេ នៅទីបំផុត លោកត្រូវបណ្ដេញចេញពីបក្សកុម្មុយនិស្តចិនទាំងស្រុង។ ទីភ្នាក់ងារព័ត៌មានស៊ីនហួរផ្សាយថាលោកលីត្រូវបន្តស្ថិតនៅក្រោមការស៊ើបអង្កេតរបស់សមត្ថកិច្ចពីបទសង្ស័យប្រព្រឹត្តអំពើពុករលួយ និងទទួលសំណូក។…
ទីក្រុងប៉េកាំង៖ អតីតរដ្ឋមន្ត្រីការពារជាតិចិន លោកលីសាងហ្វ៊ូ (Li Shangfu) មិនត្រឹមតែត្រូវដកហូតតំណែងជារដ្ឋមន្ត្រីប៉ុណ្ណោះទេ នៅទីបំផុត លោកត្រូវបណ្ដេញចេញពីបក្សកុម្មុយនិស្តចិនទាំងស្រុង។ ទីភ្នាក់ងារព័ត៌មានស៊ីនហួរផ្សាយថាលោកលីត្រូវបន្តស្ថិតនៅក្រោមការស៊ើបអង្កេតរបស់សមត្ថកិច្ចពីបទសង្ស័យប្រព្រឹត្តអំពើពុករលួយ និងទទួលសំណូក។
ក្រសួងការពារជាតិចិនថ្លែងថាលោកលីបានប្រើប្រាស់អំណាចទាំងខុសច្បាប់ដើម្បីប្រមូលទ្រព្យសម្បត្តិធ្វើមានធ្វើបានតែម្នាក់ឯង។ លោកបានទទួលប្រាក់សំណូក និងស៊ុមគ្រលំជាមួយអ្នកដទៃរំលោភបទបញ្ជារបស់កងទ័ព និងវិន័យរបស់បក្ស។ លោកលីត្រូវបក្សដកហូតតំណែងជារដ្ឋមន្ត្រីការពារជាតិកាលពីខែតុលា ឆ្នាំ២០២៣បន្ទាប់ពីលោកបាត់មុខពីសាធារណៈអស់រយៈពេលជិត២ខែ។
ការចោទប្រកាន់បែបនេះកើតមានច្រើនករណីហើយចំពោះមេបញ្ជាការកងទ័ពកំពូលៗរបស់ចិនក្រោមការដឹកនាំរបស់លោកស៊ីជីនពីង។ ក្នុងនាមជាប្រធានគណៈកម្មការយោធា លោកស៊ីបានដឹកនាំយុទ្ធនាការបង្ក្រាបអំពើពុករលួយជាហូរហែរចាប់តាំងពីឡើងកាន់អំណាចដំបូងកាលពីឆ្នាំ២០១៣។ អ្នកដែលដឹងរឿងផ្ទៃក្នុងចិនបានអះអាងថាលោកស៊ីជីនពីងកំពុងបើកយុទ្ធនាការបោសសម្អាតផ្ទៃក្នុងទៅលើមន្ត្រីបក្ស និងមន្ត្រីរដ្ឋាភិបាល។ មើលតែមន្ត្រីណាមានសមានចិត្តជាមួយបរទេស ឬមិនសូវស្មោះត្រង់ឱ្យអស់ពីចិត្តពីថ្លើមចំពោះរូបលោក លោកនឹងកម្ចាត់ចោលភ្លាម។
មន្ត្រីជាន់ខ្ពស់យោធាចិនច្រើនឡើងមុខតំណែងលឿន ហើយទទួលបានអត្ថប្រយោជន៍ច្រើន។ នៅក្នុងសេចក្ដីថ្លែងការណ៍របស់ខ្លួន ក្រសួងការពារជាតិចិនមិនបានធ្វើអត្ថាធិប្បាយលម្អិតពាក់ព័ន្ធនឹងការចោទប្រកាន់ទៅលើលោលីសាងហ្វ៊ូទេ។ ក្រសួងគ្រាន់តែនិយាយដោយខ្លីថាទោសកំហុសដែលប្រព្រឹត្តដោយលោកលីមានលក្ខណៈស៊ីរូងផ្ទៃក្នុងសាហាវពេក ហើយបង្កភាពអន្តរាយដ៏ធំសម្បើម។
លោកលីសាងហ្វ៊ូបម្រើការជាអ្នកជំនាញខាងគ្រាប់មីស៊ីល និងដេញថ្លៃផ្គត់ផ្គង់គ្រឿងបរិក្ខារ និងសេវានៅក្នុងក្រសួង។ លោកត្រូវអាមេរិកដាក់ទណ្ឌកម្មសេដ្ឋកិច្ច និងហាមធ្វើដំណើរចូលទឹកដីអាមេរិក។ មិនយូរប៉ុន្មានគាត់ក៏បាត់មុខពីសាធារណៈកាលពីខែកញ្ញា។ នៅម្ដុំៗនោះ អតីតរដ្ឋមន្ត្រីការបរទេសចិន លោកជីនកាង និងបាត់មុខមន្ត្រីជាន់ខ្ពស់ដទៃទៀតនៅក្នុងអង្គភាពផលិតគ្រាប់រ៉ុកកែតក៏បាត់មុខផងដែរ។ ក្រោយមក ពួកគេត្រូវបានចោទប្រកាន់ពីបទប្រព្រឹត្តកំហុសធ្ងន់ធ្ងរ។
ក្រោយមកនៅខែធ្នូ ឆ្នាំ២០២៣ បក្សកុម្មុយនិស្តចិនក៏ប្រកាសតែងតាំងលោកតុងជុនជារដ្ឋមន្ត្រីការពារជាតិថ្មីជំនួសលោកលីសាងហ្វ៊ូ។ សព្វថ្ងៃនេះ ប្រទេសចិនមានកងទ័ពច្រើនជាងគេនៅលើពិភពលោក។ កងទ័ពជើងទឹកចិនក៏ច្រើនជាងគេផងដែរ។ ប្រទេសនេះកំពុងផលិតអាវុធនុយក្លេអ៊ែរឱ្យបានច្រើនដើម្បីស្តុកទុកនៅក្នុងឃ្លាំង។ បើក្រឡេកមើល១ភ្លែត កម្លាំងយោធារបស់ចិនពិតជាមិនធម្មតាទេ។ គ្រាន់តែថាចិនពុំធ្លាប់ឆ្លងកាត់ការធ្វើសង្គ្រាមទេ ឬក៏ប្រឡូកនៅក្នុងសង្គ្រាមនៅក្រៅប្រទេសអស់រយៈពេលកន្លះសតវត្សមកហើយ៕
ចែករំលែកព័តមាននេះ