ខេត្តស្ទឹងត្រែង ៖ នៅថ្ងៃទី២៧ ខែមិថុនា ឆ្នាំ២០២៤នេះ មន្ទីរបរិស្ថាន បានចេញលិខិត១ច្បាប់ ច្រានចោលចំពោះការផ្សាយរបស់វិទ្យុអាស៊ីសេរីផ្សាយកាលពីថ្ងៃទី២៥ កន្លងទៅនេះ ដែលថា…
ខេត្តស្ទឹងត្រែង ៖ នៅថ្ងៃទី២៧ ខែមិថុនា ឆ្នាំ២០២៤នេះ មន្ទីរបរិស្ថាន បានចេញលិខិត១ច្បាប់ ច្រានចោលចំពោះការផ្សាយរបស់វិទ្យុអាស៊ីសេរីផ្សាយកាលពីថ្ងៃទី២៥ កន្លងទៅនេះ ដែលថា មន្ទីរបរិស្ថាន បានឃាត់ខ្លួនសកម្មជនព្រៃឈើឈ្មោះ ម៉ឹង រដ្ឋា កសាងសំណុំរឿងបញ្ជួនទៅតុលាការដើម្បីដាក់គុក ដោយសារសកម្មជនរូបនេះ បានការពាររារាំង តវ៉ា ដីព្រៃសហគមន៍ ជាង៣ពាន់ហិកតា នៅក្នុងតំបន់ភ្នំជម្រកសត្វ ស្ថិតក្នុងភូមិឆ្វាំង ឃុំសំអាងស្រុកថាឡាបរិវ៉ាត់ ខេត្តស្ទឹងត្រែង ។
បើយោងទៅតាមការបំភ្លឺរបស់មន្ទីរបរិស្ថានខេត្តស្ទឹងត្រែង បានឲ្យដឹងថា លោក ម៉ឹង រដ្ឋា ដែលជាប្រធានសហគមន៍ភ្នំជម្រកសត្វ បានពាក់ព័ន្ធក្នុងបទល្មើសកាប់រានទន្ទ្រានដីព្រៃរបស់រដ្ឋ ដែលស្ថិតនៅក្នុងដើមជម្រកសត្វព្រៃ ឆែបព្រះរកា អតីតរបៀងអភិរក្សជីវៈចម្រុះ ចាប់តាំងពីឆ្នាំ ២០២៣ មកម្ល៉េះ ។
នៅក្នុងសេចក្រីប្រកាសព័ត៌មានរបស់មន្ទីរបរិស្ថានខេត្តស្ទឹងត្រែង បានធ្វើការគូសបញ្ជាក់ថា ៖ យោងតាមសភាពជាក់ស្តែង កាលពីថ្ងៃទី០៧ ខែមីនា ឆ្នាំ២០២៣ មន្ទីរបរិស្ថានខេត្តស្ទឹងត្រែង បានចាត់មន្ត្រីឧទ្យានុរក្ស ចុះល្បាតក្នុងតំបន់ការពារធម្មជាតិ នៅចំណុចអូរឆ្កួត ឃើញមានការកាប់រុករានទន្ទ្រានយកដីព្រៃ ធ្វើជាកម្មសិទ្ធិយ៉ាងអានាធិបតេយ្យ ប្រព្រឹត្តឡើងដោយ (អញ្ញាតជន) ស្ថិតក្នុងភូមិសាស្ត្រភូមិឆ្នាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង និងបានកសាងសំណុំរឿងបញ្ជូនអយ្យការអមសាលាដំបូងខេត្ត ដើម្បីចាត់ការតាមនិតិវិធី រហូតដល់ថ្ងៃទី២០ខែមិថុនា ឆ្នាំ២០២៤ មន្ទីរបរិស្ថាន បានចាត់មន្ត្រីនគរបាលយុត្តិធម៌ នៃមន្ទីរបរិស្ថានខេត្ត ធ្វើការចុះស្រាវជ្រាវ និងកំណត់មុខសញ្ញាអំពីអ្នកដែលពាក់ព័ន្ធកាប់រុករានទន្ទ្រានយកដីព្រៃរបស់រដ្ឋធ្វើជាកម្មសិទ្ធិ ក្នុងពេលចុះស្រាវជ្រាវនេះ មន្ត្រីជំនាញ បានទទួលព័ត៌មានពីប្រជាពលរដ្ឋ ដែលរស់នៅភូមិឆ្នាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង បានផ្តល់ព័ត៌មានដល់មន្ត្រី ជំនាញដូចៗគ្នាថា ចំពោះដី ដែលបានកាប់រុករានទន្ទ្រានព្រៃខាងលើនេះ ជាដីរបស់ជនសង្ស័យឈ្មោះ ម៉ឹង រដ្ឋា ភេទប្រុស អាយុ៤៨ឆ្នាំ មានទីលំនៅបច្ចុប្បន្ន ភូមិឆ្នាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង បន្ទាប់មកក្រុមការងារបានបន្តចុះត្រួតពិនិត្យដល់ទីតាំង ជាក់ស្តែងដោយមិនបានឃើញជន ដែលបានប្រព្រឹត្តនៅទីកន្លែងនោះឡើយ ។
នៅថ្ងៃទី២៤ ខែមិថុនា ឆ្នាំ២០២៤ មន្ត្រីនគរបាលយុត្តិធម៌ នៃមន្ទីរបរិស្ថានខេត្ត បានកោះហៅជនសង្ស័យឈ្មោះ ម៉ឹង រដ្ឋា ភេទប្រុស មានទីលំនៅបច្ចុប្បន្នរស់នៅភូមិឆ្នាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែងតាមដីការបញ្ជាឱ្យចូលខ្លួនលេខ៧៦០ ចុះថ្ងៃទី១៩ ខែមិថុនា ឆ្នាំ២០២៤របស់អយ្យការអមសាលាដំបូងខេត្តស្ទឹងត្រែង ដើម្បីសាកសួរពាក់ព័ន្ធ ទៅនឹងការកាប់រុករាន ទន្ទ្រានដីព្រៃរបស់រដ្ឋ ធ្វើជាកម្មសិទ្ធិ ស្ថិតនៅដែនជម្រកសត្វព្រៃ-ឆែបព្រះរការ (អតីតរបៀងអភិរក្សជីវៈចម្រុះ) បន្ទាប់ពីបានសាកសួររួច មន្ត្រីនគរបាលយុត្តិធម៌ នៃមន្ទីរបរិស្ថានខេត្ត បានកសាងសំណុំរឿងបញ្ជូនទៅអយ្យការអមសាលាដំបូងខេត្ត ដើម្បីបន្តនិតិវិធី។
ជាមួយគ្នានេះ មន្ទីរបរិស្ថានខេត្តស្ទឹងត្រែង លើកឡើងថា ចំពោះព័ត៌មានវិទ្យុអាស៊ីសេរី (RFA) បានចេញផ្សាយនេះ ជាករណីមិនពិតនោះទេ មន្ទីរបរិស្ថានសូមច្រានចោលព័ត៌មានវិទ្យុអាស៊ីសេរី (RFA) ទាំងស្រុង ដែលបានចោទប្រកាន់ថា មន្ទីរបរិស្ថាន និងរដ្ឋបាលខេត្ត មានពាក់ព័ន្ធជាមួយក្រុមហ៊ុន លីន វតី ។ ការកោះហៅ និងឃាត់ខ្លួន បុគ្គលឈ្មោះ ម៉ឹង រដ្ឋា ដែលជាប្រធានសហគមន៍ភ្នំជម្រកសត្វ គឺជាករណីកាប់គាស់រុនរានទន្ទ្រានដីព្រៃ យកធ្វើជាកម្មសិទ្ធិ ដែលមានភស្តុតាង និងសាក្សី គ្រប់គ្រាន់ ហើយករណីកសាងសំណុំរឿងបញ្ជូនជនសង្ស័យឈ្មោះ ម៉ឹង រដ្ឋា ទៅអយ្យ
ការអមសាលាដំបូងខេត្ត គឺអនុវត្តតាមច្បាប់ស្តីពីតំបន់ការពារធម្មជាតិតាមនិតិវិធី ៕
ចែករំលែកព័តមាននេះ