ទីក្រុងឡាប៉ាស់៖ ករណីរដ្ឋប្រហារមិនបានសម្រេចនៅប្រទេសបូលីវីនៅតែក្ដៅគគុក។ ការចាប់ខ្លួនមនុស្សដែលអាចនឹងជាប់ពាក់ព័ន្ធនៅក្នុងគម្រោងឧក្រិដ្ឋនេះនៅតែបន្ត។ ប្រធានាធិបតីបូលីវី លោកលូអាស៊ីថ្លែងថាប្រទេសជាតិរបស់លោកត្រូវតែប្រកាន់គោលជំហរឱ្យបានរឹងមាំទប់ទល់នឹងគម្រោងការណ៍វាយប្រហារលទ្ធិប្រជាធិបតេយ្យ។ លោកបានចេញមុខតតាំងនឹងឧត្ដមសេនីយ៍ហ្ស៊ូនីហ្កា(Zúñiga)ដែលបានដឹកនាំអំពើបះបោរ និងបើករថពាសដែកចូលទៅបរិវេណវិមានប្រធានាធិបតី។
លោកលូអាស៊ីប្រកាសថាខ្ញុំជាមេបញ្ជាការរបស់អ្នក។ ខ្ញុំបញ្ជាឱ្យអ្នកដកកងទ័ពថយ។ ខ្ញុំមិនអនុញ្ញាតឱ្យមានចលនាបះបោរបែបនេះឡើយ។ នៅលើកញ្ចក់ទូរទស្សន៍បូលីវី គេឃើញរថក្រោះ២គ្រឿង និងមនុស្សស្លៀកពាក់ទាហាននៅខាងក្រៅវិមានប្រធានាធិបតី។ បន្តិចក្រោយមក ពួកគេក៏ដកថយទៅវិញ។ មិនយូរប៉ុន្មាន ក្រុមអ្នកគាំទ្រលោកលូអាស៊ីក៏ប្រមូលផ្ដុំគ្នាយ៉ាងពពាក់ពពូនខាងក្រៅវិមានរដ្ឋាភិបាល និងគ្រវីទង់ជាតិប្រទេសបូលីវីទៅលើអាកាស។
មន្ត្រីជាន់ខ្ពស់បូលីវីនិយាយថាឧត្ដមសេនីយ៍យោធារូបនោះត្រូវបានចាប់ខ្លួននៅថ្ងៃពុធនេះ។ មេបញ្ជាការលំដាប់ទី២ក៏ត្រូវចាប់ខ្លួនផងដែរ។ រដ្ឋមន្ត្រីទីស្ដីការគណៈរដ្ឋមន្ត្រីថ្លែងថាក្រៅពីចាប់ខ្លួនឧត្ដមសេនីយ៍ហ្ស៊ូនីហ្កា អាជ្ញាធរក៏ចាប់ខ្លួនឧត្ដមនាវីរងម្នាក់ផងដែរ។ អ្នកទាំង២ត្រូវបណ្ដេញចេញពីក្របខណ្ឌការងារ ហើយដាក់ជំនួសដោយអ្នកថ្មីបន្ទាប់ពីមានអំពើបះបោរ។ រដ្ឋមន្ត្រីរូបនេះចោទប្រកាន់ថាឧត្ដមសេនីយ៍ហ្ស៊ូនីហ្កាប៉ុនប៉ងធ្វើរដ្ឋប្រហារដើម្បីបម្រើមហិច្ឆតានយោបាយផ្ទាល់ខ្លួន។
សួរថាតើគោលបំណងនៃការប៉ុនប៉ងធ្វើរដ្ឋប្រហារនេះដើម្បីអ្វី? គោលបំណងដើម្បីផ្ដួលរំលំរដ្ឋអំណាចដែលបោះឆ្នោតជ្រើសរើសតាមបែបប្រជាធិបតេយ្យ។ លោកថ្លែងដូច្នេះនៅចំពោះមុខអ្នកសារព័ត៌មានដោយមានឧត្ដមសេនីយ៍ដែលត្រូវចាប់ខ្លួននៅក្បែរនោះផងដែរ។ លោកនិយាយបន្ថែមថាឧត្ដមសេនីយ៍ហ្ស៊ូនីហ្កាចង់ឡើងកាន់អំណាចខ្លួនឯង។ នៅក្នុងអំពើបះបោរនេះ មនុស្សរងរបួស២នាក់ត្រូវគេបញ្ជូនទៅមន្ទីរពេទ្យ។ ម្នាក់ត្រូវរបួសជើង និងម្នាក់ទៀតមិនត្រូវគេបញ្ជាក់ថារបួសកន្លែងណាទេ។
តើអំពើរដ្ឋប្រហារនេះជាការសម្ដែង ឬយ៉ាងណា?
បន្ទាប់ពីឧត្ដមសេនីយ៍លូអាស៊ីថ្លែងថាប្រធានាធិបតីបូលីវីប្រាប់ឱ្យខ្លួនលើកកងទ័ពចូលលុកលុយវិមានរដ្ឋាភិបាល រដ្ឋមន្ត្រីក្រសួងយុត្តិធម៌ចេញមុខបដិសេធការអះអាងនេះ។ លោកថាឧត្ដមសេនីយ៍រូបនេះនិយាយភូតកុហក និងព្យាយាមនិយាយយកត្រូវតែម្នាក់ឯង។ ឥឡូវនេះ គាត់ត្រូវតែទទួលខុសត្រូវនៅចំពោះមុខច្បាប់។ រដ្ឋអាជ្ញានឹងស្នើសុំឱ្យតុលាការផ្ដន្ទាទោសឧត្ដមសេនីយ៍រូបនេះដាក់ពន្ធនាគារចាប់ពី១៥-២០ឆ្នាំពីបទប៉ុនប៉ងបំផ្លាញលទ្ធិប្រជាធិបតេយ្យ និងរដ្ឋធម្មនុញ្ញ។
សូមរំលឹកថាមុនពេលឧត្ដមសេនីយ៍រូបនេះត្រូវចាប់ខ្លួន គាត់និយាយប្រាប់អ្នកសារព័ត៌មានថាប្រធានាធិបតីបូលីវីប្រាប់គាត់ថាសភាពការណ៍ស្រុកទេសរាងរញ៉េរញ៉ៃខ្លាំងណាស់។ ដូច្នេះ សំខាន់ត្រូវធ្វើសកម្មភាពអ្វីមួយដើម្បីធ្វើឱ្យគាត់មានប្រជាប្រិយភាពឡើងវិញ។ ក្រោយមក ឧត្ដមសេនីយ៍រូបនេះក៏សួរទៅលោកលូអាស៊ីថាតើគាត់ (ឧត្ដមសេនីយ៍) អាចបញ្ចេញរថក្រោះមកក្រៅបន្ទាយបានទេ? ប្រធានាធិបតីឆ្លើយថាបញ្ចេញមកក្រៅចុះ។
អំពើបះបោរនេះកើតឡើងក្រោយកើតមានភាពតានតឹងជាច្រើនខែមកហើយនៅប្រទេសបូលីវី។ មនុស្សចេញតវ៉ានៅរដ្ឋធានីដោយសារវិបត្តិសេដ្ឋកិច្ច។ ជាមួយគ្នានោះដែរ អ្នកនយោបាយធំៗប្រជែងគ្នាដណ្ដើរធ្វើប្រធានបក្សកាន់អំណាច។ ប៉ុន្តែពួកគេប្រឆាំងគ្នាតែអីចឹង។ លុះមានការប៉ុនប៉ងផ្ដួលរំលំប្រធានាធិបតីកូឡុំប៊ី ពួកគេចេញមុខជំទាស់ភ្លាម។ សូម្បីតែគូប្រជែងរបស់លោកលូអាស៊ីយល់ថាគេត្រូវការពារលទ្ធិប្រជាធិបតេយ្យ។ ពួកគេប្រកាសថ្កោលទោសអំពើបះបោរនេះជាទម្ងន់៕
ចែករំលែកព័តមាននេះ