ខេត្តស្ទឹងត្រែង ៖ ផ្លូវទៅកាន់តំបន់ទេសចរណ៍ទឹកធ្លាក់ព្រះនិមិ្មត ដែលមានចម្ងាយ ២៧គីឡូម៉ែត្រ គិតចាប់ពីចំណុចផ្លូវបំបែកភូមិសំអាង រហូតដល់ក្នុងភូមិសាស្ត្រអេកូទេសចរណ៍ធម្មជាតិដ៏ប្រណិតមួយ ប្រចាំភូមិភាគឥឦសាន កាលដើមឡើយ គឺជាផ្លូវលំក្រាលគ្រួសក្រហម ពុតពែន បត់បែន ហុយខ្លាំងនៅរដូវប្រាំង និងរអិលនៅរដូវវស្សា មានភាពលំបាកក្នុងការធ្វើដំណើរ ដើម្បីទៅដល់តំបន់ទេសចរណ៍មួយនេះ ។
ដោយសារតំបន់ទេសចរណ៍ទឹកធ្លាក់ដល់ប្រណិតនេះ ឆក់យកបេះដូងអ្នកទេសចរណ៍រាប់ម៉ឺននាក់ ក្នុងមួយឆ្នាំៗ មន្ទីរសាធារណការ និងដឹកជញ្ជូនខេត្តស្ទឹងត្រែង បានស្នើទៅដល់ក្រសួងសាធារណការ និងដឹកជញ្ជូន ដើម្បីសាងសង់ជាផ្លូវក្រាលកៅស៊ូ ដែលមានគុណភាព និងមានសុវត្ថិភាពជូនដល់ប្រជាជន ក្នុងតំបន់ និងអ្នកទេសចរណ៍ ទៅកាន់តំបន់អេកូទេសចរណ៍ព្រះនិមិត្ត នោះផងដែរ ។
ទោះបីយ៉ាងណា ផ្លូវទៅកាន់តំបន់សក្តានុពលអេកូទេសចរណ៍មួយនោះ ពុំទាន់សាងសង់សម្រេច រហូតរយៈចម្ងាយទៅដល់តំបន់នោះពេញលេញ
នៅឡើយទេ ដោយសារការសាងសង់ ត្រូវធ្វើឡើងទៅតាមគោលការណ៍ និងជំហានបន្តបន្ទាប់ ។
លោក សរ គឹមណាត ប្រធានមន្ទីរសាធារណការ និងដឹកជញ្ជូនខេត្តស្ទឹងត្រែង ឱ្យដឹងថា នាពេលថ្មីៗនេះ មន្ទីរសាធារណការ និងដឹកជូនខេត្ត បានសម្រេចការសាងសង់ផ្លូវកៅស៊ូ ប្រភេទ DBST បានចំនួន ៣,៥០០ម៉ែត្រ គិតពីចំណុចផ្លូវបំបែកភូមិសំអាង ឃុំសំអាង ស្រុកថាបរិវ៉ាត់ ដែលមានគោលដៅបន្តតម្រង់ទៅតំបន់ទឹកធ្លាក់ព្រះនិមិ្មត ។
យោងតាមរបាយការណ៍ ស្ថិតិរបស់មន្ទីរទេសចរណ៍ខេត្តស្ទឹងត្រែង បានបង្ហាញក្នុងរយៈពេល៣ឆ្នាំចុងក្រោយថា នៅឆ្នាំ២០២១ ទទួលបានភ្ញៀវទេសចរណ៍ជាតិ និងអន្តរជាតិចំនួន ៣១,៩៨៧នាក់ ក្នុងឆ្នាំ២០២២ ទទួលបានភ្ញៀវជាតិ និងអន្តរជាតិចំនួន ៥៦,៨៣៤នាក់ ដោយសារកត្តា
ផ្លូវធ្វើដំណើរមានការលំបាក នៅឆ្នាំ២០២៣ កំណើន ស្ថិតិភ្ញៀវទេសចរណ៍បានធ្លាក់ចុះមកនៅត្រឹម ៣២,៦៤៨នាក់ ។
ប្រជាពលរដ្ឋ ដែលជាសហគមន៍នៅក្នុងតំបន់អេកូទេសចរណ៍ទឹកធ្លាក់ព្រះនិមិ្មត មានការរីករាយ និងរំពឹងទុកយ៉ាងមុតមាំ ខណៈមានផ្លូវល្អភ្ញៀវទេសចរណ៍ ក៏កាន់តែមកលេងកម្សាន្តកាន់តែច្រើន ដែលជំរុញឲ្យពួកគាត់មានសេដ្ឋកិច្ចធូរធារមួយកម្រិតបន្ថែមទៀត ។
ប្រជាសហគមន៍តំបន់អេកូទេសចរធម្មជាតិ ក៏ដូចជាប្រជាពលរដ្ឋ ដែលអាស្រ័យការរស់នៅតាមដងផ្លូវទៅកាន់តំបន់ទឹកធ្លាក់ព្រះនិមិ្មតនោះ ក៏
បានទទូចស្នើសុំដល់ក្រសួងសាធារណការ និងមន្ទីរសាធារណការខេត្តស្ទឹងត្រែង មេត្តាបន្តគម្រោងសាងសង់ផ្លូវកៅស៊ូបន្ថែម នាពេលខាងមុខបន្តទៀត ដើម្បីឲ្យមានសោភណ្ឌភាពសុវត្ថិភាព និងជៀសបានពីការហុយដី ដែលបង្កឲ្យមានបញ្ហាដល់សុខភាពអ្នករស់នៅតាមដងផ្លូវ និងជាការរួមចំណែកអភិវឌ្ឍន៍ ទៅដល់គោលដៅទេសចរណ៍ ដែលអាចឲ្យប្រជាពលរដ្ឋបានប្រយោជន៍ជាច្រើនពីហេដ្ឋារចនាសម្ព័ន្ធផ្លូវថ្នល់មួយនេះ ៕
![](https://kohsantepheapdaily.com.kh/wp-content/uploads/2024/06/57e53784aa8a9e1b9a85c4ab3f4e5943.jpg)
![](https://kohsantepheapdaily.com.kh/wp-content/uploads/2024/06/0de6964360105ec69f90ec08fd2660ef.jpg)
![](https://kohsantepheapdaily.com.kh/wp-content/uploads/2024/06/9429d7a87c57b1f5120a579fb0b161d4.jpg)
![](https://kohsantepheapdaily.com.kh/wp-content/uploads/2024/06/c9ff73771505ce285b6fe9e31fb7e616.jpg)
![](https://kohsantepheapdaily.com.kh/wp-content/uploads/2024/06/bd328311baf5a73827869fff58e1fe0d.jpg)
![](https://kohsantepheapdaily.com.kh/wp-content/uploads/2024/06/ee7b1185b6d27a7f93cce846e1f3d367.jpg)
![](https://kohsantepheapdaily.com.kh/wp-content/uploads/2024/06/0561b1522d50d674180bef0459f296c1.jpg)
![](https://kohsantepheapdaily.com.kh/wp-content/uploads/2024/06/99ec467f729245d8e04ecc7f43520733.jpg)
![](https://kohsantepheapdaily.com.kh/wp-content/uploads/2024/06/05d2c83ea9d0f5c07a921e49b56c9fdd.jpg)
ចែករំលែកព័តមាននេះ