ខេត្តបាត់ដំបង ៖ តំណាងអយ្យការនៃសាលាដំបូងខេត្ត បាននិងកំពុងបន្តនីតិវិធីសួរនាំក្រុមជនសង្ស័យចំនួន០៤នាក់ នៅរសៀលថ្ងៃទី២៧ មិថុនា នេះ ដែលត្រូវកម្លាំងអធិការស្រុកសំពៅលូនឃាត់ខ្លួនពីបទ«រំលោភទំនុកចិត្តនិងរៀបគំរោងប្លន់» ។ នេះបើតាមការឲ្យដឹងពីមន្ត្រីការិយាល័យព្រហ្មទណ្ឌកំរិតស្រាល នៃស្នងការខេត្ត ។
![](https://kohsantepheapdaily.com.kh/wp-content/uploads/2024/06/7e8d490d6a54baa8f62eab5d40e13ec6.jpg)
មន្ត្រីការិយាល័យនគរបាលព្រហ្មទណ្ឌកំរិតស្រាលបានឲ្យដឹងថា ក្រុមជនសង្ស័យទាំង០៤នាក់ត្រូវបានកម្លាំងអធិការស្រុកសំពៅលូនឃាត់ខ្លួន ជាមួយនឹងរថយន្តម៉ាកព្រូសមួយគ្រឿង ។ មន្ត្រីជំនាញបានកសាងសំណុំរឿងបញ្ជូនក្រុមនេះទៅសាលាដំបូងខេត្ត កាលពីថ្ងៃទី២៦ មិថុនា តែរហូតមកដល់រសៀលថ្ងៃទី ២៧ មិថុនា នេះ តំណាងអយ្យការកំពុងបន្តនីតិវិធីសួរនាំនៅឡើយទេ ។
![](https://kohsantepheapdaily.com.kh/wp-content/uploads/2024/06/6fda3fe1ecc6678cd84acfb55a0369e9.jpg)
ក្រុមជនសង្ស័យចំនួន០៤នាក់ក្នុងចំណោម០៥នាក់ ត្រូវបានកម្លាំងអធិការស្រុកសំពៅលូនធ្វើការស្រាវជ្រាវឃាត់ខ្លួន កាលពីរសៀលថ្ងៃទី២៤ មិថុនា ពេលក្រុមនេះ កំពុងជិះរថយន្តនៅលើដងផ្លូវត្រង់ចំណុចភូមិចម្ការល្ហុង ឃុំតាស្ដា ស្រុកសំពៅលូន ។
![](https://kohsantepheapdaily.com.kh/wp-content/uploads/2024/06/8f8b5f741829822503524e5d1efff05c.jpg)
អធិការស្រុកសំពៅលូន លោក ទឹម វិឆ័យ បានថ្លែងថា ការឈានដល់ការឃាត់ខ្លួនក្រុមជនសង្ស័យមួយសម្បុកខាងលើនេះ ដែលជិះរថយន្តស៊េរីទំនើបៗផងយកមកសួរនាំដោយយោងលើការផ្ដល់ព័ត៌មានពីប្រជាពលរដ្ឋ ក្រោយពេលឃើញក្រុមនេះបង្ហាញពីសកម្មភាព (ជិះរថយន្តឆ្វៀលស្ថានីយប្រេងចុះឡើងៗ) ដែលគូរឲ្យសង្ស័យ ។
![](https://kohsantepheapdaily.com.kh/wp-content/uploads/2024/06/bf2ebbef3be85f5a479a49153f4cfcd6.jpg)
លោកអធិការបានបញ្ជាក់ថា ក្រោយពីសួរនាំទើបបែកធ្លាយរឿងក្រុមនេះ រួមជាមួយជនម្នាក់ទៀតជាមេខ្លោងដែលគេចខ្លួន «ជួលរថយន្តគេជិះចេញពីភ្នំពេញ យកមកផ្សាយលក់នៅស្រុកសំពៅលូន និង រៀបផែនការប្លន់ម្ចាស់ស្ថានីយប្រេងមួយកន្លែង» តែត្រូវកម្លាំងរបស់លោកទប់ស្កាត់ និងបង្ក្រាបបានទាន់ពេលវេលា។
យោងលើរបាយការណ៍ព្រឹត្តហេតុរបស់អធិការស្រុកសំពៅលូន ក្រុមសង្គមងងឹតចំនួន០៤នាក់ ក្នុងនោះមានជនជាតិវៀតណាម០២នាក់ និងជនជាតិខ្មែរ០២នាក់ ដែលត្រូវឃាត់ខ្លួនបញ្ជូនទៅតុលាការខាងលើនេះមាន ១-ឈ្មោះ វៀន វីនឌីន ហៅវីន អាយុ២២ឆ្នាំ (វៀតណាម) ២-ឈ្មោះ ចាង វាំងឌុង ហៅ តុង អាយុ២៧ឆ្នាំ (វៀតណាម) ៣-ឈ្មោះ សុធី ម៉ាណែត អាយុ២៥ឆ្នាំ (ខ្មែរ) និង៤-ឈ្មោះ ញឹម តាំ ហៅតុង អាយុ២៩ឆ្នាំ (ខ្មែរ) រីឯម្នាក់ទៀតដែលបើករថយន្តស៊េរីទំនើបមួយគ្រឿងរត់គេចខ្លួនបាត់នោះឈ្មោះយិន ។ ពួកគេគ្មានមុខរបរពិតប្រាកដទេ និងស្នាក់បណ្ដោះអាសន្ននៅរាជធានីភ្នំពេញ ។
![](https://kohsantepheapdaily.com.kh/wp-content/uploads/2024/06/e871cae23e67161fd5903bec2a009ba5.jpg)
ជាមួយនឹងការឃាត់ខ្លួនក្រុមជនសង្ស័យទាំង០៤នាក់នេះ សមត្ថកិច្ចបានដកហូតរថយន្តមួយគ្រឿងម៉ាកព្រូស ស៊េរីឆ្នាំ២០១០ ពណ៌ទឹកមាស ពាក់ស្លាកលេខកណ្ដាល 2C-1228 កាតគ្រីរថយន្ត០៣សន្លឹក ក្រដាសឈៀករថយន្ត០២សន្លឹក និងប័ណ្ណបង់ពន្ធរថយន្ត០២សន្លឹក តែគេសង្ស័យជាឯកសារក្លែងបន្លំ ។
![](https://kohsantepheapdaily.com.kh/wp-content/uploads/2024/06/e64b8c8e9d76fcc952d43fb06ef66c6c.jpg)
ដោយឡែក ជនម្នាក់ឈ្មោះយិន ដែលជិះរថយន្តមួយគ្រឿងទៀតរត់គេចនោះ ជិះរថយន្តម៉ាក Lexus 200T ពណ៌ប្រផេះ ពាក់ស្លាកលេខ ភ្នំពេញ 2GB-2968 ។ លោក ទឹម វិឆ័យ បាននិយាយថា មុនពេលត្រូវឃាត់ខ្លួន ក្រុមនេះបាននាំគ្នាជិះរថយន្តបង្ហាញពីសកម្មភាពដែលគួរឲ្យសង្ស័យ ឆ្វែលផ្ទះ និងស្ថានីយប្រេងមួយកន្លែងរបស់ឈ្មោះ ឈុន ម៉េងឈាង ភេទប្រុស អាយុ៤១ឆ្នាំ នៅភូមិ
តាស្ដា ឃុំសន្តិភាព ស្រុកសំពៅលូន មួយថ្ងៃពី២ទៅ៣លើក ។
![](https://kohsantepheapdaily.com.kh/wp-content/uploads/2024/06/4bfc0577729ca524b49f5c03d347a33b.jpg)
លោកថា ពេលខ្លះក្រុមនេះជិះចូលដល់ក្នុងស្ថានីយប្រេងក្នុងបំណងប៉ុនប៉ងធ្វើសកម្មភាពអ្វីមួយ តែដោយសារមានរថយន្តគេចូលចាក់សាំងជាបន្តបន្ទាប់ដែរ ទើបក្រុមនេះជិះរថយន្តចេញទៅបាត់ ។ ហេតុការណ៍នេះ បានកើតឡើងចាប់តាំងពីថ្ងៃទី១៧ មិថុនា រហូតដល់ថ្ងៃទី២៤ មិថុនា ទើបកម្លាំងរបស់លោកធ្វើការស្រាវជ្រាវតាមឃាត់ខ្លួនបាន ។
![](https://kohsantepheapdaily.com.kh/wp-content/uploads/2024/06/a6fd88c0e45299b2a98c80aaaea1bfc5.jpg)
ក្រោយពេលត្រូវឃាត់ខ្លួន ក្រុមនេះបានសារភាពថា ពួកគេមានគ្នាចំនួន០៥នាក់ រាប់ទាំងឈ្មោះយិន ដែលគេចខ្លួនបាត់ផងជិះរថយន្ត០២គ្រឿងដែលមួយគ្រឿងម៉ាកព្រូស (ជួលគេជិះ) និងមួយគ្រឿងទៀតម៉ាកឡិចស៊ីស (រថយន្តរបស់ឈ្មោះយិន) ។ ពួកខ្លួនបានជួលរថយន្តម៉ាកព្រូសជិះក្នុងមួយថ្ងៃ៥០ដុល្លារ ដោយចេញពីភ្នំពេញឆ្ពោះមកកាន់ស្រុកភ្នំព្រឹក និងស្រុកសំពៅលូន ខេត្តបាត់ដំបង ។
![](https://kohsantepheapdaily.com.kh/wp-content/uploads/2024/06/1ff29575b29d90c99bafc314e236dbf3.jpg)
ក្រុមនេះបានសារភាពទៀតថា ពួកខ្លួនបានជិះមកដល់ស្រុកសំពៅលូន ក្នុងគោលបំណងយករថយន្តម៉ាកព្រូសដែលជួលគេជិះនេះលក់ចែកលុយគ្នាចាយ តែលក់មិនទាន់ចេញផងក៏ត្រូវសមត្ថកិច្ចឃាត់ខ្លួន ។
![](https://kohsantepheapdaily.com.kh/wp-content/uploads/2024/06/0f2f5001bc50b3156e8308f404e9a0d8.jpg)
ពាក់ព័ន្ធនឹងរឿងជិះរថយន្តឆ្វែលផ្ទះ និងស្ថានីយប្រេង មួយថ្ងៃ០២ ទៅ០៣ដងឯណោះវិញ បើតាមជនម្នាក់ឈ្មោះញឹម តាំងហៅ តុង បានសារភាពនៅចំពោះមុខសមត្ថកិច្ចថា «រឿងជិះឆ្វែលផ្ទះនិងស្ថានីយប្រេងខាងលើ គឺពួកខ្លុំជិះមើលស្ថានភាពម្ចាស់ផ្ទះនោះ ដើម្បីរៀបគំរោងចូលប្លន់» ។ ជននេះបានទម្លាក់បន្ទុកទៅលើឈ្មោះយិន ដែលរត់គេចខ្លួនជាមួយរថយន្តស៊េរីទំនើបមួយគ្រឿងនោះថា ជាមេខ្លោងរៀបផែនការ«ប្លន់»ម្ចាស់ស្ថានីយប្រេងនោះ ។ ដូច្នេះហើយ ទើបនាំគ្នាជិះរថយន្តឆ្វែលឡើងឆ្វែលចុះពិនិត្យមើលស្ថានភាពជាក់ស្ដែងនៅកន្លែងស្ថានីយប្រេងនោះ ។
![](https://kohsantepheapdaily.com.kh/wp-content/uploads/2024/06/ea339aeed1942c4185c7030bf4640582.jpg)
លោក ទឹម វិឆ័យ អធិការស្រុកសំពៅលូនបានបញ្ជាក់ដែរថា ពិតជាសំណាងមែន ដែលម្ចាស់ស្ថានីយប្រេង បានតាមដានពីសកម្មភាពក្រុមជនសង្គមងងឹតនេះជាប់ជាប្រចាំ និងមានការសង្ស័យពីសកម្មភាពពួកគេ ហើយរាយការណ៍ប្រាប់លោក ហើយកម្លាំងរបស់លោកធ្វើការស្រាវជ្រាវរហូតឈានដល់ការបង្ក្រាប និងទប់ស្កាត់បានទាន់ពេលវេលា បើមិនដូច្នេះទេអំពើ«ប្លន់» អាចនឹងកើកឡើងជាក់ជាមិនខាន។
![](https://kohsantepheapdaily.com.kh/wp-content/uploads/2024/06/af67316b8f5cc53e17ad02269747af1b.jpg)
យ៉ាងណាក្ដី ពេលនេះ ក្រុមជនសង្ស័យទាំង០៤នាក់ ត្រូវបានមន្ត្រីការិយាល័យជំនាញបញ្ជូនទៅប្រគល់ឲ្យតុលាការហើយ ខណៈជនម្នាក់ដែលជិះរថយន្តគេចខ្លួនបាត់នោះ កំពុងត្រូវបានមន្ត្រីជំនាញបន្តតាមស្វែងរកនៅឡើយ៕
ចែករំលែកព័តមាននេះ