រាជធានីភ្នំពេញ ៖ ថ្លែងក្នុងសន្និសីទសារព័ត័មាន ឯកឧត្តមឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌បានប្រកាសនឹងដើរចេញពីតំណែង ប្រសិនបើឧក្រិដ្ឋជន ស្រី ស៊ីណា…
រាជធានីភ្នំពេញ ៖ ថ្លែងក្នុងសន្និសីទសារព័ត័មាន ឯកឧត្តមឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌បានប្រកាសនឹងដើរចេញពីតំណែង ប្រសិនបើឧក្រិដ្ឋជន ស្រី ស៊ីណា មិនកាត់ទោស ឬដូចគេនិយាយថា «ជាប់ទោស២ ឬ៣ឆ្នាំ ហើយត្រូវដោះលែងវិញ»។
ករណីនេះ ត្រូវបានឯកឧត្តម ឧបនាយករដ្ឋមន្ដ្រីបានបញ្ជាក់ថា ឧក្រិដ្ឋជន ស្រី ស៊ីណា ត្រូវតែជាប់ពន្ធគារ ទៅតាមនីតិវិធីច្បាប់ជាធរមាន ហើយក្នុងនាមជារដ្ឋមន្ត្រីដែលច្បាប់ផ្តល់សិទ្ធិឲ្យឯកឧត្តមនឹងតាមដានលើសំណុំរឿងហ្នឹង។ ការលើកឡើងបែបនេះ របស់ឯកឧត្តមឧបនាយករដ្ឋមន្ត្រី បន្ទាប់ពីមានអ្នកវិភាគមួយក្ដាប់តូចបានលើកឡើងថា ការកាត់ទោស ស្រី ស៊ីណា ត្រឹមតែ២ ឬ៣ឆ្នាំប៉ុណ្ណោះ ហើយដោះលែងវិញ។
ថ្លែងក្នុងសន្និសីទសារព័ត៌មានពាក់ព័ន្ធ «ករណីឃាតកម្ម ប្រព្រឹត្តដោយជនល្មើសឈ្មោះ ស្រី ស៊ីណា» នារសៀលថ្ងៃទី២៦ ខែមិថុនា ឆ្នាំ២០២៤ នៅទីស្តីការក្រសួងឯកឧត្តមឧបនាយករដ្ឋមន្ដ្រី កើត រិទ្ធ បានឆ្លើយតបវិញថា ជនល្មើស ស្រី ស៊ីណា ត្រូវតែជាប់គុកទៅតាមនីតិវិធីច្បាប់ជាធរមាន ដោយគ្មានការលើកលែងទោស ឬបន្ធូរបន្ថយទោសជាដាច់ខាត ដោយឧក្រិដ្ឋជនរូបនេះអាចនឹងជាប់គុកពី ២០ ទៅ ៣០ឆ្នាំ។
ឯកឧត្តមឧបនាយករដ្ឋមន្ដ្រី បានគូសបញ្ជាក់យ៉ាងដូច្នេះថា៖ «ខ្ញុំយកឱកាសនេះ ដើម្បីបញ្ជាក់ជូនដល់បងប្អូនអ្នកសារព័ត៌មាន ថា ប្រសិនបើបុគ្គលម្នាក់នេះ (ស្រី ស៊ីណា) មិនត្រូវបានកាត់ទោស ឬត្រូវបានកាត់ទោសដូចគេនិយាយថា ជាប់ ២ ឬ ៣ឆ្នាំ ចេញមកវិញ ខ្ញុំ អ្នកទទួលខុសត្រូវមុនគេ ហើយទទួលខុសត្រូវ គឺមានដើរចេញ ឈប់ធ្វើការងារផ្នែកច្បាប់»។
សូមរំលឹកថា នៅរសៀល ថ្ងៃទី១៧ ខែមិថុនា ឆ្នាំ២០២៤ ស្ថិតក្នុងបុរីប៉េងហួតបឹងស្នោរ សង្កាត់និរោធ៍ ខណ្ឌច្បារអំពៅ មានករណីឃាតកម្មបាញ់ ប្រហារដ៏រន្ធត់មួយនេះ បង្កឡើងដោយខ្មាន់កាំភ្លើងឈ្មោះ ស្រី ស៊ីណា បណ្ដាលឲ្យមនុស្ស ២នាក់ស្លាប់ ដែលជាគូដណ្ដឹងនឹងគ្នា និង ២នាក់ផ្សេងទៀតរងរបួស។ ការស្លាប់របស់ជនរងគ្រោះទាំង២នាក់គូដណ្ដឹង ដែលត្រៀមចូលរោងការ នៅអំឡុងខែតុលា ឆ្នាំ២០២៤ខាងមុខនេះ បានបន្សល់នូវភាពសោកសៅយ៉ាងខ្លាំងនៅលើបណ្ដាញសង្គម។
ក្រោយពីហេតុការណ៍នេះកើតឡើងមានសាធារណៈមតិមួយចំនួនបានសម្ដែងការខឹងសម្បារ និងថ្កោលទោសយ៉ាងធ្ងន់ធ្ងរទៅលើឃាតករឈ្មោះ ស្រី ស៊ីណា ដែលបានប្រព្រឹត្តដ៏សាហាវបែបនេះ
រហូតចង់ឱ្យតុលាការដាក់ទោសមួយជីវិត ឬអាចឈានទៅទោសប្រហារជីវិតចំពោះជនល្មើសទៀតផង។ ប៉ុន្តែមិនអាចទៅរួចឡើយចំពោះការចង់បាននេះ ព្រោះអ្វីៗត្រូវសំអាងទៅតាមខ្លឹមសារច្បាប់ជាធរមាន៕
ចែករំលែកព័តមាននេះ