ប្រជាជនបានមានចម្ងល់ទាក់ទងនឹងការផ្លាស់ប្តូរ និងតែងតាំងថ្មី អភិបាលខេត្តដល់ទៅ៨រូបក្នុងពេលតែមួយ ។ ប៉ុន្តែមន្ត្រីជាន់ខ្ពស់រដ្ឋាភិបាលពន្យល់ថា មិនមានអ្វីត្រូវឆ្ងល់ទេ ។ ការផ្លាស់ប្តូរ និងតែងតាំងថ្មីនេះ គឺដើម្បីពង្រឹងប្រសិទ្ធភាពការងារថ្នាក់ជាតិ…
ប្រជាជនបានមានចម្ងល់ទាក់ទងនឹងការផ្លាស់ប្តូរ និងតែងតាំងថ្មី អភិបាលខេត្តដល់ទៅ៨រូបក្នុងពេលតែមួយ ។ ប៉ុន្តែមន្ត្រីជាន់ខ្ពស់រដ្ឋាភិបាលពន្យល់ថា មិនមានអ្វីត្រូវឆ្ងល់ទេ ។ ការផ្លាស់ប្តូរ និងតែងតាំងថ្មីនេះ គឺដើម្បីពង្រឹងប្រសិទ្ធភាពការងារថ្នាក់ជាតិ និងក្រោមជាតិ ។
អ្នកនាំពាក្យរាជរដ្ឋាភិបាលបានអោយដឹងថា ការផ្លាស់ប្តូរអភិបាលខេត្តថ្មីទាំង៨រូប គឺជាការពង្រឹងប្រសិទ្ធភាពការងារ ធានាការប្រព្រឹត្តទៅជាប្រក្រតីនៃដំណើរការរដ្ឋបាលទាំងថ្នាក់ជាតិ និងថ្នាក់ក្រោមជាតិ ធានាសម្រេចគោលដៅចក្ខុវិស័យរាជរដ្ឋាភិបាលឆ្នាំ២០៥០ ក្លាយជាប្រទេសដែលមានចំណូលខ្ពស់ ។
លោក ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាអ្នកនាំពាក្យរាជរដ្ឋាភិបាល បានអោយដឹងថា កម្ពុជាតែងតែមានការផ្លាស់ប្តូរ ជាយូរមកហើយរបស់រាជរដ្ឋាភិបាលដែលដឹកនាំ ដោយគណបក្សប្រជាជនកម្ពុជា តាំងពីជំនាន់សម្តេចតេជោ ហ៊ុន សែន អតីតនាយកដ្ឋរដ្ឋមន្ត្រី តែងតែមានការផ្លាស់ប្តូរដូចជា អភិបាលខេត្តពីខេត្តមួយទៅខេត្តមួយជារឿងធម្មតា ។ លោក ប៉ែន បូណា បានអោយកម្មវិធីលុយនៃសារព័ត៌មានកោះសន្តិភាពដឹងថា «ពួកគាត់មិនមានកំហុសអីទេ ការផ្លាស់ប្តូរហ្នឹង គឺដើម្បីពង្រឹងប្រសិទ្ធភាពការងារអោយអភិបាលខេត្តមួយៗគាត់មានបទពិសោធកាន់ តែច្រើន ពីខេត្តមួយទៅខេត្តមួយកុំអោយគាត់នៅកន្លែងដដែល។ នេះជាគោលការណ៍ធម្មតាក្នុងការដឹកនាំ ទី២សម្រាប់ការផ្លាស់ប្តូរតែងតាំងថ្មីមួយចំនួននេះក៏ជាដំណើរការធម្មតាដែរ»។
លោក ប៉ែន បូណា បន្តថា រាជរដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជា ដល់ដំណាក់កាលបន្តវេនដល់អ្នកជំនាន់ក្រោយពីរៀមច្បងទៅអ្នកជំនាន់ក្រោយ ។ នេះជាការមិនចម្លែកនោះទេដែលការផ្តល់តំណែងតួរនាទីដល់យុវជនជំនាន់ក្រោយ ដែលជាអ្នកបន្តវេន គឺជារឿងធម្មតា ។ ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានត្រាស់បង្គាប់តែងតាំងអភិបាលខេត្តថ្មីចំនួន៤រូប និងផ្លាស់ប្តូរទៅខេត្តផ្សេងចំនួន៤រូប ។ នេះបើយោងតាមព្រះរាជក្រឹត្យ ផ្សេងៗគ្នា ចុះថ្ងៃទី២៤ ខែមិថុនា ឆ្នាំ២០២៤។
លោក ម៉ាង ស៊ីណេត អតីតអភិបាលរងខេត្តព្រះសីហនុ ត្រូវបានតែងតាំងជាអភិបាលខេត្ត ព្រះសីហនុ ។ លោក សរ សុពុត្រា អតីតអភិបាលរងខេត្តកំពង់ស្ពឺ ត្រូវបានតែងតាំងជាអភិបាលខេត្តស្ទឹងត្រែង ។ លោក មាន ចាន់យ៉ាដា អតីតអភិបាលរងរាជធានីភ្នំពេញត្រូវបានតែងតាំងជាអភិបាលខេត្ត ឧត្តរមានជ័យ និង លោក នួន ផារ័ត្ន ដែលជាអតីតអភិបាលរងរាជធានីភ្នំពេញ ត្រូវបានតែងតាំងជាអភិបាលខេត្តកំពង់ធំ។
ជាមួយគ្នានេះ ព្រះរាជក្រឹត្យក៏បានអោយដឹងផងដែរថា លោក វ៉ី សំណាង អតីតអភិបាលខេត្តកំពង់ស្ពឺត្រូវបានផ្ទេរទៅធ្វើជាអភិបាលខេត្តតាកែវ ។ រីឯលោក គួច ចំរើន អតីតអភិបាលខេត្តព្រះសីហនុ ត្រូវបានផ្ទេរទៅជាអភិបាលខេត្តកណ្តាល ។ លោក ជាម ច័ន្ទសោភ័ណ អតីតអភិបាលខេត្តត្បូងឃ្មុំ ត្រូវបានផ្ទេរទៅជាអភិបាលខេត្តកំពុងស្ពឺ និងលោក ប៉ែន កុសល្យ អតីតអភិបាលខេត្តឧត្តរមានជ័យ ត្រូវបានផ្ទេរទៅជាអភិបាលខេត្តត្បូងឃ្មុំ ។
ក្រៅពីនេះ លោក គង់ សោភ័ណ្ឌ អតីតអភិបាលខេត្តកណ្តាល; លោក អ៊ូច ភា អតីតអភិបាលខេត្តតាកែវ; លោក ស្វាយ សំអ៊ាង អតីតអភិបាលខេត្តស្ទឹងត្រែង និងលោក ងួន រតនៈ អតីតអភិបាលខេត្តកំពង់ធំ ត្រូវបានដំឡើងទៅជារដ្ឋលេខាធិការក្រសួងមហាផ្ទៃ ៕
ចែករំលែកព័តមាននេះ