ខេត្តតាកែវ ៖ ឈ្មួញដឹកដីលក់មួយក្រុមធំដែលមានខ្នងបង្អែកជាមន្ត្រីថ្នាក់ឧត្តមសេនីយ៍យោធា និងឧត្តមសេនីយ៍ប៉ូលិសចូលនិវត្ត រួមជាមួយអ្នកកាសែតមួយក្រុម កាងមុខរបរគ្មានច្បាប់អនុញ្ញាតត្រឹមត្រូវកំពុងបង្កការក្តៅក្រហាយដល់ប្រជាពលរដ្ឋពីរភូមិ គឺភូមិព្រៃស្នួល និងភូមិក្រាំងធ្នង់ ស្ថិតក្នុងឃុំរវៀង ស្រុកសំរោង…
ខេត្តតាកែវ ៖ ឈ្មួញដឹកដីលក់មួយក្រុមធំដែលមានខ្នងបង្អែកជាមន្ត្រីថ្នាក់ឧត្តមសេនីយ៍យោធា និងឧត្តមសេនីយ៍ប៉ូលិសចូលនិវត្ត រួមជាមួយអ្នកកាសែតមួយក្រុម កាងមុខរបរគ្មានច្បាប់អនុញ្ញាតត្រឹមត្រូវកំពុងបង្កការក្តៅក្រហាយដល់ប្រជាពលរដ្ឋពីរភូមិ គឺភូមិព្រៃស្នួល និងភូមិក្រាំងធ្នង់ ស្ថិតក្នុងឃុំរវៀង ស្រុកសំរោង ខេត្តតាកែវ ដោយសារបញ្ហាក្រុមអ្នកកាងឈ្មួញឡានដឹកដីទាំងនោះ នាំគ្នាជីកកាយដីអូ រួមរបស់អ្នកស្រុកកាន់កាប់អាស្រ័យដឹកលក់ឲ្យឈ្មួយយកលុយចែកគ្នាចាយវាយខុសគោលដៅមិនបានអភិវឌ្ឍន៍ភូមិ-ឃុំឡើយ ។
បញ្ហាខាងលើនេះ បានកើតមានជាបន្តបន្ទាប់ ដូចជាស្រុតផ្លូវខូចជាអន្លើរៗ បែកទុយោទឹកអ្នកភូមិ ហើយពេលប្រជាពលរដ្ឋម្ចាស់ស្រុកឃាត់ឡានសួរនាំឲ្យទទួលខុសត្រូវគឺពួកគេព្រងើយកន្តើយរុញប្រជាពលរដ្ឋឲ្យទៅសួរមេៗគេចុះ ។ ប្រភពស្និទ្ធិបានបង្ហើបថា អ្នកកាងឡានដឹកដីទាំងនោះ គឺជាក្រុមការងារប្រចាំមូលដ្ឋានឃុំរវៀងទៀតផងទើបបានជាមិនគោរពអ្នកស្រុកសោះ ។ លើសពីនេះទៅទៀត ម្ចាស់ទុយោទឹកដែលរងការខូចខាតជួលជាងមកត ដើម្បីបានប្រើប្រាស់ឡើងវិញ តែត្រូវក្រុមឡានដឹកដីបើកបរចង់ជាន់ក្រុមជាងទាំងកំរោលគ្មានគោរពអ្នកស្រុកឡើយ ។
ជុំវិញបញ្ហាខាងលើនេះ អ្នកភូមិរិះគន់ថា មេភូមិព្រៃស្នួល និងប្រជាការពារភូមិជាអ្នកឈរកាងរៀបចំការពារក្រុមឈ្មួញដឹកដីទាំងនោះឲ្យដំណើរការដោយរលូនមិនខ្វល់ពីសុខទុក្ខរបស់អ្នកភូមិឡើយ ។ ដោយឡែក ប្រភពបានទម្លាយថា មេភូមិក្រាំងធ្នង់វិញមិនដូច្នោះទេ គឺ គាត់រួមជាមួយពលរដ្ឋក្នុងភូមិបានបញ្ចេញប្រតិកម្មយ៉ាងខ្លាំងទៅលើទង្វើរបស់ឈ្មួញជីកដីអូរួមរបស់ពលរដ្ឋលក់ចែកផលគ្នារៀងៗខ្លួន។
តែជាលទ្ធផល លោកមេភូមិក្រាំងធ្នង់ក៏ទៅមិនរួចដែរ គឺក្រុមឈ្មួញដែលមានអ្នកកាងជាឧត្តមសេនីយ៍យោធា និងឧត្តមសេនីយ៍ប៉ូលិសចូលនិវត្តន៍ និងអ្នកកាសែតខ្លះផងនោះ មិនឲ្យខ្វល់ឡើយ គឺម្ចាស់ឡាននីមួយៗដឹងតែដឹកឲ្យទាន់តម្រូវការខ្លាចស្អីអាណាចាប់ បើមេភូមិ មេឃុំ មេស្រុក មេខេត្តគេរត់ការរួចរាល់អស់ហើយ កុំខ្វល់ពីអ្នកស្រុកទុកពួកគាត់ចោលម្តុំសិនទៅ គឺជ្រកក្រោមលេសអភិវឌ្ឍន៍ស្តារអូរ ។
ជុំវិញបញ្ហាផ្ទុះបាតុភាពខាងលើនេះ បងប្អូនប្រជាពលរដ្ឋក្នុងភូមិព្រៃស្នួល និងភូមិក្រាំងធ្នង់ សំណូមពរទៅសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មេត្តាជួយមានវិធានការមកចៅហ្វាយខេត្តតាកែវ និងអាជ្ញាភូមិ ឃុំ ស្រុក ខាងលើ ជួយទប់ស្កាត់សកម្មភាពអនាធិតេយ្យរំលោភយកអូររួមរបស់អ្នកស្រុកជីកដីដឹកលក់ឲ្យឈ្មួញ ដើម្បីទុបស្កាត់រក្សាទុកផ្ទៃដីអូប្រើប្រាស់ជាប្រយោជន៍រួមរបស់អ្នកភូមិដូចដើមឡើងវិញ ហើយបើមានការអភិវឌ្ឍន៍ក៍ស្នើសុំឲ្យមានតម្លាភាពជាប្រយោជន៍រួម ទើបប្រជាពលរដ្ឋទទួលយកបាន ។
ប្រជាពលរដ្ឋត្រៀមធ្វើបាតុកម្មបិទអាជីវកម្មខាងលើ បើសិនជាអាជ្ញាធរខេត្តនៅតែមិនចេញមុខដោះស្រាយវិបត្តិដូចរៀបរាប់យ៉ាងសង្ខេបខាងលើនេះទេ ។ ដោយ៖ សហការី
ចែករំលែកព័តមាននេះ