លោក យូអ៊ីណូ អាតស៊ូស៊ី (UENO Atsushi) ឯកអគ្គរាជទូតជប៉ុនប្រចាំនៅកម្ពុជា បានអះអាងថា ជប៉ុននឹងបន្តគាំទ្រផែនការអភិវឌ្ឍន៍កំពង់ផែក្រុងព្រះសីហនុ តាមផែនការដែលបានគ្រោង
លោក យូអ៊ីណូ អាតស៊ូស៊ី (UENO Atsushi) ឯកអគ្គរាជទូតជប៉ុនប្រចាំនៅកម្ពុជា បានអះអាងថា ជប៉ុននឹងបន្តគាំទ្រផែនការអភិវឌ្ឍន៍កំពង់ផែក្រុងព្រះសីហនុ តាមផែនការដែលបានគ្រោងនៅឆ្នាំ២០៥០ ។
លោកបានថ្លែងនៅពេលចូលរួមបើកសិក្ខាសាលាផ្សព្វផ្សាយច្បាប់ស្ដីពីការដឹកជញ្ជូនតាមផ្លូវទឹក នៅថ្ងៃទី២៥ ខែមិថុនា ឆ្នាំ២០២៤ ថា រដ្ឋាភិបាលជប៉ុន នឹងបន្តការគាំទ្រនៅការសាងសង់ស្ថានីយកុងតឺន័រថ្មី ក្នុងកំពង់ផែក្រុងព្រះសីហនុ ក៏ដូចជាការអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុ ទៅជាកំពង់ផែក្នុងតំបន់ និងមជ្ឈមណ្ឌលដឹកជញ្ជូន នាឆ្នាំ២០៥០។
ដោយឡែក លោក សានូអ៊ី កាស៊ូម៉ាសា (SANUI KAZUMASA) ប្រធានទីភ្នាក់ងារ JICA ប្រចាំនៅកម្ពុជា ក៏បានលើកឡើងថា ក្រសួងសាធារណការ និងដឹកជញ្ជូន និងទីភ្នាក់ងារ JICA ក្នុងវិស័យរដ្ឋបាលកំពង់ផែ បានចាប់ផ្តើមធ្វើសហប្រតិបត្តិការគ្នាតាំងពីឆ្នាំ២០០៩ ដែលក្នុងនោះ គម្រោងកិច្ចសហប្រតិបត្តិការបច្ចេកទេស ត្រូវបានអនុវត្តនាពេលនោះ គឺគម្រោងបង្កើតគោលនយោបាយកំពង់ផែជាតិ និងប្រព័ន្ធរដ្ឋបាល នៅក្នុងព្រះរាជាណាចក្រកម្ពុជា។
កំពង់ផែក្រុងព្រះសីហនុ គឺជាកំពង់ផែសមុទ្រទឹកជ្រៅដ៏សំខាន់បំផុតមួយនៅកម្ពុជា ដែលមានផ្ទៃដីប្រតិបត្តិការប្រមាណ១២៥ហិកតា ។ កំពង់ផែនេះ ដែលជាកំពង់ផែទឹកជ្រៅមួយ ដែលកំពុងសម្រួលដល់ការដឹកជញ្ជូនតាមសមុទ្រ ដែលទទួលបានភាពអនុគ្រោះពីធម្មជាតិ ដូចជា ៖មានជម្រៅទឹកជ្រៅ មានកោះជារបាំងខ្យល់ និងរលកធំៗ ហើយស្ថិតនៅចំទីតាំងដែលពុំតម្រូវឱ្យមានការបូមស្តារឃ្លងនាវាជាប្រចាំឡើយ ។
កំពុងផែនេះ កសាងនៅឆ្នាំ១៩៥៦ ហើយបានពង្រីក និងពង្រឹងសមត្ថភាពជាបន្តបន្ទាប់ ដើម្បីក្លាយជាកំពង់ផែលំដាប់អន្តរជាតិ ដែលអាចសម្រួលការដឹកជញ្ជូនរបស់នាវាគ្រប់ប្រភេទតាមគោលដៅនៅឆ្នាំ២០៥០ ។
ដោយ ៖ ស ផាន់
ចែករំលែកព័តមាននេះ