ខេត្តកំពង់ស្ពឺ ៖ ស្នងការដ្ឋាននគរបាលខេត្តកំពង់ស្ពឺ នៅរសៀលថ្ងៃទី២៥ ខែមិថុនា ឆ្នាំ២០២៤នេះ បានចេញសេចក្តីប្រកាសព័ត៌មានចំពោះបុគ្គលជាម្ចាស់រថយន្ដ និងជាអ្នកបើកបររថយន្ដដឹកកម្មករ កម្មការិនី ដែលបានបង្កគ្រោះថ្នាក់…
ខេត្តកំពង់ស្ពឺ ៖ ស្នងការដ្ឋាននគរបាលខេត្តកំពង់ស្ពឺ នៅរសៀលថ្ងៃទី២៥ ខែមិថុនា ឆ្នាំ២០២៤នេះ បានចេញសេចក្តីប្រកាសព័ត៌មានចំពោះបុគ្គលជាម្ចាស់រថយន្ដ និងជាអ្នកបើកបររថយន្ដដឹកកម្មករ កម្មការិនី ដែលបានបង្កគ្រោះថ្នាក់ នាវេលាម៉ោង៦និង២៥នាទីព្រឹកថ្ងៃទី២៥ ខែមិថុនា ឆ្នាំ២០២៤ លើផ្លូវជាតិលេខ៤(៣៥-៣៦) ចំណុចភូមិព្រៃផ្ដៅ ឃុំត្រពាំងគង ស្រុកសំរោងទង ដោយកត្តាឆ្វេសប្រហែស និងជាការទទួលខុសត្រូវទាំងស្រុង ចំពោះអ្នកដំណើរ ដែលជាអ្នកជិះរថយន្ដរក្សាកម្រៃសេវាឈ្នួលរបស់ខ្លួន ។
ស្នងការដ្ឋាននគរបាលខេត្តកំពង់ស្ពឺ បានបញ្ជាក់ថា ដោយបានពិនិត្យ និងបានវាស់វែងស្រាវជ្រាវលើលក្ខណៈបច្ចេកទេសយានយន្ដ ក្នុងពេលបង្កគ្រោះថ្នាក់ ជំនាញចរាចរណ៍កំណត់បានថា គ្រោះថ្នាក់ចរាចរណ៍ គឺបណ្ដាលមកពីកត្ដាឆ្វេសប្រហែសរបស់អ្នកប្រើប្រាស់យាន ដូច្នេះសូមបុគ្គលដែលមានឈ្មោះ តន សុខទីន (TON SOKTIN) នៅភូមិបន្ទាយខ្មែរ ឃុំជើងរាស់ ស្រុកសាមគ្គីមុនីជ័យ ខេត្តកំពង់ស្ពឺ ចេញមុខមកទទួលខុសត្រូវលើការផ្ដល់សំណង រ៉ាប់រងថ្លៃព្យាបាលជូនអ្នករងគ្រោះតាមផ្លូវច្បាប់ ។
ក្នុងករណីមិនចេញមុខមកដោះស្រាយ សមត្ថកិច្ច និងបន្ដនីតិវិធីអនុវត្តតាមផ្លូវតុលាការ ។
សូមជម្រាបផងដែរថា «រថយន្តដឹកកម្មករ-កម្មការិនីបុករថយន្ត១គ្រឿង មិនទាន់អស់ល្បឿនប៉ះម៉ូតូ ហើយក្រឡាប់បណ្តាលឲ្យមនុស្សជិត៦០នាក់ រងរបួសធ្ងន់ស្រាល» កម្មករ-កម្មការិនីជាង៦០នាក់រងរបួស ដោយសាររថយន្តក្រឡាប់លើផ្លូវជាតិលេខ៤ចន្លោះគីឡូម៉ែត្រ៣៥-៣៦ចំណុចភូមិព្រៃផ្ដៅ ឃុំត្រពាំងគង ស្រុកសំរោងទងខេត្តកំពង់ស្ពឺ កាលពីព្រឹកថ្ងៃទី២៥ ខែមិថុនា ឆ្នាំ២០២៤ ។
មុនកើតហេតុគេឃើញ រថយន្ដ១គ្រឿងម៉ាកហ៊ីយ៉ាន់ដាយ ពណ៌ស ពាក់ផ្លាកលេខកំពង់ស្ពឺ 3A-1352 បើកបរដោយឈ្មោះ តន សុខ ភេទប្រុស អាយុ៣៤ឆ្នាំ រស់នៅភូមិបន្ទាយខ្មែរ ឃុំជើងរាស់ ស្រុកសាមគ្គីមុនីជ័យ ខេត្តកំពង់ស្ពឺ ដឹកកម្មករ កម្មការិនីប្រមាណ៦០នាក់ បើកបរពីទិសខាងលិចទៅទិសខាងកើ មកដល់ចំណុចនេះ បានបុកពីក្រោយរថយន្ដម៉ាកកៀ (ម៉នីង) ពណ៌លឿងទុំ ពាក់ផ្លាកលេខព្រះសីហនុ 2B-5456 បើកបរដោយឈ្មោះ ឈឹម សោភា ភេទប្រុស អាយុ៤៣ឆ្នាំ រស់នៅភូមិក្រាំងខ្វាវ ឃុំគីរីវ័ន្ដ ស្រុកភ្នំស្រួច ។
បន្ទាប់មករថយន្ដម៉ាកហ៊ីយ៉ាន់ដាយ បានជ្រុលទៅប៉ះម៉ូតូមួយគ្រឿងទៀត ម៉ាកហុងដា សេ១២៥ ពណ៌ខ្មៅ ពាក់ផ្លាកលេខភ្នំពេញ 1KE-9184 បើកបរដោយឈ្មោះ ថៃ សេង ភេទប្រុស អាយុ៣៥ឆ្នាំ ឌុបមនុស្ស២នាក់, ទី១, ឈ្មោះ ប៉ិច ជី ភេទស្រី អាយុ៤១ឆ្នាំ និងទី២, ឈ្មោះ ប៉ិច ជេ ភេទស្រី អាយុ២៦ឆ្នាំ អ្នកទាំង៣រស់នៅភូមិក្រាំងតារ័ត្ន ឃុំព្នាយ ស្រុកសំរោងទង ខេត្តកំពង់ស្ពឺ ។
សមត្ថកិច្ច បានបន្តទៀតថា រថយន្តទាំងពីរគ្រឿង កំពុងបើកបរស្របទិសគ្នា ពីលិចទៅកើត បណ្ដាលឲ្យរងរបួសធ្ងន់ និងស្រាលតែម្តងទៅ ។ ចំណែកអ្នករបួសកម្មករធ្ងន់ស្រាល ដែលជិះលើរថយន្ដកំពុងស្រាវជ្រាវ ភាគីម៉ូតូ បញ្ជូនទៅសង្គ្រោះនៅមន្ទីរពេទ្យបង្អែកខេត្តកំពង់ស្ពឺ និងសង្គ្រោះនៅមន្ទីរសម្រាកព្យាបាល បសស ព្រៃផ្ដៅ ៤នាក់។ រីឯវត្ថុតាងកំពុងចាត់ចាត់យកទៅរក្សាទុក នៅអធិការដ្ឋាននគរបាលស្រុកសំរោងទងរងចាំដោះស្រាយនៅពេលក្រោយ ៕
ចែករំលែកព័តមាននេះ