ថ្ងៃនេះ រដ្ឋាភិបាលកូរ៉េខាងត្បូងចេញបញ្ជាឱ្យស្ថាប័នពាក់ព័ន្ធចុះធ្វើអធិការកិច្ចនៅតាមទីតាំងរោងចក្រ-សហគ្រាសនានាដើម្បីចង់ដឹងថាតើទីតាំងទាំងនោះមានសុវត្ថិភាពគ្រប់គ្រាន់ដែរឬទេ។ ជាពិសេស អាជ្ញាធរត្រូវពិនិត្យតាមដានបញ្ហាប្រឈមនឹងគ្រោះថ្នាក់។ នេះជាវិធានការដែលធ្វើឡើងក្រោយហេតុការណ៍ឆេះរោងចក្រផលិតថ្មវិទ្យុតូចៗដែលបណ្ដាលឱ្យស្លាប់មនុស្សយ៉ាងតិច២២នាក់។
កាលពីព្រឹកមិញ មន្ត្រីមកពីការិយាល័យកោសល្យវិច័យជាតិ, សមត្ថកិច្ច និងការិយាល័យពន្លត់អគ្គិភ័យបានទៅពិនិត្យមើលទិដ្ឋភាពនៅក្នុងរោងចក្រ។ ក្រោយពេលឆេះឃ្លាំងដាក់ថ្មវិទ្យុចំនួន៣៥០០០គ្រាប់នោះធ្វើឱ្យមានផ្សែងពុលយ៉ាងខ្លាំង។ គេគិតថាគ្រាន់តែឆេះភ្លាម កម្មករនៅក្នុងរោងចក្រនោះចាប់ផ្ដើមពុលសន្លប់ព្រូសៗ និងស្លាប់ភ្លាមៗត្រឹមតែមួយប៉ប្រិចភ្នែក។ នេះបើតាមការសន្និដ្ឋានរបស់មន្ត្រីទទួលបន្ទុកខាងពន្លត់អគ្គិភ័យ។
នាយករដ្ឋមន្ត្រីកូរ៉េខាងត្បូងស្នើសុំទៅក្រសួងការងារ និងឧស្សាហកម្ម និងទីភ្នាក់ងារពន្លត់អគ្គិភ័យចុះពិនិត្យមើលប្រព័ន្ធសុវត្ថិភាពនៅតាមរោងចក្រទូទាំងផ្ទៃប្រទេស។ បើពិនិត្យឃើញភាពមិនប្រក្រតីកើតឡើង ត្រូវចាត់វិធានការឆ្លើយតបភ្លាមៗ។ នៅក្នុងចំណោមជនរងគ្រោះទាំង២២នាក់នោះ ជនជាតិចិនមាន១៧នាក់ និងឡាវម្នាក់។ ពួកគេជាបុគ្គលិកជាប់កិច្ចសន្យារយៈពេលខ្លីៗ និងធ្វើការផ្នែកវេចខ្ចប់។ សមត្ថកិច្ចកំពុងស្វែងរកអ្នកបាត់ខ្លួនម្នាក់ មិនដឹងថាគាត់ស្លាប់ ឬរស់នៅឡើយទេ។
គេឃើញក្រុមអ្នកពន្លត់អគ្គិភ័យដែលមានបណ្ដើរឆ្កែសម្រាប់ហិតក្លិនទៅជាមួយផងបានដើរកកូរកកាយកាត់ខ្មោចអគារដែលឆេះនេះ។ នៅទីបំផុត សមត្ថកិច្ចរកឃើញសាកសពមនុស្សម្នាក់ត្រូវភ្លើងឆេះឡើងខ្លោចមើលលែងស្គាល់។ ដូច្នេះ គេកំពុងផ្ទៀងផ្ទាត់ឌីអឹនអេ (DNA) ដើម្បីកំណត់អត្តសញ្ញាណ។ ក្រុមហ៊ុនផលិតថ្មអារីសែលរបស់កូរ៉េខាងត្បូងនេះបង្កើតឡើងកាលពីឆ្នាំ២០២០ ហើយផលិតថ្មសម្រាប់ប្រព័ន្ធត្រួតពិនិត្យ និងវិទ្យុទាក់ទង។
ក្រសួងការងារកំពុងស៊ើបអង្កេតចង់ដឹងថាតើក្រុមហ៊ុនបានអនុវត្តត្រឹមត្រូវតាមវិធានការធានាសុវត្ថិភាពដែរឬទេ និងបានបណ្ដុះបណ្ដាលវិធីការពារខ្លួនសម្រាប់កម្មករបរទេសដែរឬទេ។ បើអាជ្ញាធរស៊ើបឃើញថាក្រុមហ៊ុនអនុវត្តមិនបានត្រឹមត្រូវតាមបទបញ្ញត្តិនៃច្បាប់ការងារទេ ម្ចាស់ក្រុមហ៊ុនត្រូវឡើងតុលាការដើម្បីទទួលខុសត្រូវផ្នែកព្រហ្មទណ្ឌនៅចំពោះមុខច្បាប់៕
ចែករំលែកព័តមាននេះ