រាជធានីភ្នំពេញ ៖ អតីតភោជនីយដ្ឋានប្រែនឌី និងភោជនីយដ្ឋានបង ស្ថិតនៅមុខក្រោយ ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្តាលអោយការខូចខាតទាំងស្រុង ។ ទោះយ៉ាងណា ពុំបណ្តាលអោយមនុស្សរងគ្រោះថ្នាក់ឡើយ…
រាជធានីភ្នំពេញ ៖ អតីតភោជនីយដ្ឋានប្រែនឌី និងភោជនីយដ្ឋានបង ស្ថិតនៅមុខក្រោយ ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្តាលអោយការខូចខាតទាំងស្រុង ។ ទោះយ៉ាងណា ពុំបណ្តាលអោយមនុស្សរងគ្រោះថ្នាក់ឡើយ ។
ហេតុការណ៍អគ្គិភ័យនេះ បង្កអោយមានការភ្ញាក់ផ្អើល កាលពីវេលាម៉ោង១១និង២០នាទីថ្ងៃត្រង់ ទី២៥ ខែមិថុនា ឆ្នាំ២០២៤ នៅតាមបណ្តោយផ្លូវលេខ២៦៥ កែងផ្លូវលេខ១៩២ (សំណង់១២) សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ ។
តាមព័ត៌មានបានអោយដឹងថា នៅមុនពេលកើតហេតុគេឃើញភ្លើង បានឆាបឆេះចេញពីអតីតភោជនីយដ្ឋានប្រេនឌី នៅពេលដែលជាងកំពុងតែជួសជុល និងផ្សារដែកយ៉ាងសន្ធោសន្ធៅ ហើយបានឆេះរាលដាលយ៉ាងរហ័សទៅផ្នែកខាងក្រោយ និងរាលដាលទៅភោជនីយដ្ឋាន បង ដែលស្ថិតនៅផ្នែកខាងក្រោយ តាមផ្លូវលេខ១៩២ ។
តាមព័ត៌មានដឹងទៀតថា ភោជនីយដ្ឋានប្រេនឌី បានបិទទ្វារជាយូរមកហើយ នៅពេលថ្មីៗនេះ ម្ចាស់ក៏បានសេងទៅអោយម្ចាស់ថ្មី ហើយក៏បានជួលជាងមកផ្សារដំបូងជួសជុល ស្រាប់តែភ្លើងបានឆាបឆេះតែម្តង ។ ភ្លាមៗក្រុមជាងក៏បានគេចខ្លួនអស់ ។ នៅក្នុងហេតុការណ៍ គេឃើញអាជ្ញាធរ និងសមត្ថកិច្ច បានចុះទៅដល់កន្លែងកើតហេតុទាក់ទងរថយន្តពន្លត់អគ្គិភ័យជាច្រើនគ្រឿងទៅអន្តរាគមន៍ តែពុំអាចទប់ស្កាត់បានភ្លាមៗឡើយ ព្រោះភ្លើងបានឆាបឆេះពេញបន្ទុក ។
តាមនគរបាលការិយាល័យ បង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាល រាជធានីភ្នំពេញបានអោយដឹងថា នៅក្នុងហេតុការអគ្គិភ័យនេះ រថយន្តពន្លត់អគ្គិភ័យចំនួន៣០គ្រឿង បានទៅអន្តរាគមន៍បា.ញ់ពន្លត់ ។
តាមនគរបាលអោយដឹងទៀតថា អគ្គិភ័យនេះ បណ្តាលអោយអតីតភោជនីយដ្ឋានប្រេនឌីទំហំប្រមាណ២០ម៉ែត្រ គុណ២៥ម៉ែត្រ ត្រូវភ្លើងឆាបឆេះអស់ទាំងស្រុង ហើយបានឆេះរាលដាលទៅភោជនីយបង ដែលនៅផ្នែកខាងក្រោយ រងការខូចខាតស្ទើរតែទាំងស្រុង និងឆេះអស់ម៉ូតូ១គ្រឿង ។
នៅក្នុងហេតុការណ៍បណ្តាលអោយមន្ត្រីពន្លត់អគ្គិភ័យម្នាក់បានរងរបួសដោយសារតែមុតដែកផងដែរ ។ តាមនគរបាលមូលដ្ឋាន បានអោយដឹងថា អគ្គិភ័យនេះបណ្តាលមកពីជាងផ្សារដែក ។ បន្ទាប់ពីកើតហេតុក្រុមជាងបានរត់គេចខ្លួនបាត់ ហើយសមត្ថកិច្ចកំពុងតែស្រាវជ្រាវ ៕
ចែករំលែកព័តមាននេះ