ខេត្តកំពង់ស្ពឺ ៖ សូមបងប្អូនប្រជាពលរដ្ឋកុំចាញ់ល្បិចចោរ ជាក់ស្តែងដូចករណីនេះ !មុខសញ្ញាទម្លាក់ដុំប្រាក់ដូរយកមាសសុទ្ធ ត្រូវជាប់អន្ទាក់នគរបាលស្រុកបសេដ្ឋ ខេត្ដកំពង់ស្ពឺ នាព្រឹកថៃ្ងទី២២ មិថុនា ២០២៤ នេះ ។ នេះបើយោងតាមស្នងការដ្ឋាននគរបាលខេត្តកំពង់ស្ពឺបានបង្ហោះនាថ្ងៃទី២២ ខែមិថុនានេះ ។
នៅចំណុចផ្សាស្លាបលែង ស្រុកបសេដ្ឋ ខេត្តកំពង់ស្ពឺ មានជនសង្ស័យចំនួន០៣នាក់ (ប្រុស០១)មិនស្គាល់អត្តសញ្ញាណជិះម៉ូតូ០១គ្រឿងម៉ាកហុងដាឌ្រីមC125 មិនស្គាល់សេរីឆ្នាំ ពាក់ផ្លាកលេខភ្នំពេញ xxxx ធ្វើសកម្មភាព ទម្លាក់ដុំថង់មាស(ក្លែងក្លាយ) មុខជនរងគ្រោះ ដែលកំពុងតែធ្វើដំណើរក្នុងផ្សារដោយធ្វើជាហេតុចៃដន្យ មិនអោយមានការភ្ញាក់ផ្អើលដល់អ្នកដទៃ ឬម្ចាស់ទ្រព្យ ចំពោះមុខជនរងគ្រោះ រួចបានហៅជនរងគ្រោះខ្សឹបថា កុំមាត់ប្រាប់គេចាំចែកគ្នា ។
ជនសង្ស័យមានឈ្មោះ សៅ សារឿន ហៅចន្ដា ភេទស្រី អាយុ៤០ឆ្នាំ រស់នៅភូមិដើមផ្ដៀក ឃុំព្រៃស្លឹក ស្រុកទ្រាំង ខេត្តតាកែវ បច្ចុប្បន្នស្នាក់នៅរាជធានីភ្នំពេញ បានទទួលស្គាល់ថា ខ្លួន និងបក្ខពួកចំនួន០២ទៀត ពិតជាបានធ្វើសកម្មភាពដូចអ្វី ដែលជនរងគ្រោះរៀបរាប់អញ្ចឹង ។
ជាចៃដន្យ ស្រាប់តែកំពុងនិយាយហៅជនរងគ្រោះដើរចេញក្រៅផ្សារទៅរកកន្លែងស្ងាត់ ដើម្បីបើកថង់មាស និងចែកគ្នា ស្រាប់តែមានសមត្ថកិច្ចនគរបាលមកសាកសួរ និងទទួលបានសេចក្ដីរាយការណ៍ពីជនរងគ្រោះទើបបែកការ រួចសមត្ថកិច្ចឃាត់មកសួរនាំតែម្ដង ។
តាមចម្លើយរបស់ជនសង្ស័យឈ្មោះសៅ សារឿន ហៅចន្ដា បានឆ្លើយសារភាពថា ខ្លួននិងបក្ខពួកពិតជាបានធ្វើសកម្មភាពប្រើល្បិចទម្លាក់ថង់ និងមានបំណងឆបោ.កយកទ្រព្យ មានតម្លៃពីជនរងគ្រោះឈ្មោះ ឡាយ គីមសុខ ពិតប្រាកដមែន ។
បច្ចុប្បន្នសមត្ថកិច្ចនគរបាលកំពុងដំណើរការនីតិវិធីកសាងសំណុំរឿងបញ្ជូនទៅ ស្នងការដ្ឋាននគរបាលខេត្ត បន្ដទៅអយ្យការអមសាលាដំបូងខេត្ដកំពង់ស្ពឺចំណាត់ការនីតិវិធី ៕
ចែករំលែកព័តមាននេះ