ខេត្តពោធិ៍សាត់ ៖ កាលថ្ងៃទី២៤ ខែមិថុនា ឆ្នាំ២០២៤ លោកខូយ រីដា អភិបាលនៃគណៈអភិបាលខេត្តពោធិ៍សាត់ និងជាប្រធានគណៈកម្មាធិការ ទប់ស្កាត់បទល្មើសធនធានធម្មជាតិថ្នាក់ខេត្ត បានជួបប្រជុំជាមួយក្រុមចម្រុះបង្ក្រាបបទល្មើសធនធានធម្មជាតិទាំង០៦ក្រុម នៅសាលាស្រុកវាលវែង ដើម្បីពង្រឹងការងារបន្ថែម និងរៀបចំផែនការដាំដើមឈើឡើងវិញ លើដីដែលដកហូតបានជិត៤០.០០០ហិកតា ពិសេស នៅផ្លូវអន្ទង់អាំងជើងភ្នំ១៥០០ ដែលជាផ្ទាំងស៊ីបរបស់ប្រមុខរាជរដ្ឋាភិបាល និងមហាជនគ្រប់គ្នា។
លោក ខូយ រីដា មានប្រសាសន៍ថា យុទ្ធនាការបង្ក្រាបបទល្មើសធនធានធម្មជាតិដ៍ក្ដៅគគុក នៅស្រុកវាលវែងនិងស្រុកភ្នំក្រវាញ ដោយកម្លាំងថ្នាក់ជាតិនិងថ្នាក់ក្រោមជាតិ មកដល់ពេលនេះយើងដកហូតដីបានជិត៤០.០០០ហិកតាហើយ ។ យើងបានឡើងផែនទីនិងឃ្លុមទុកជាសម្បត្តិរដ្ឋ ព្រមទាំងដាក់កម្លាំងឈរជើងនៅតាមគោលដៅនីមួយៗ ដើម្បីការពារនិងបន្តបង្ក្រាបដូចភ្លៀងរលឹម ។
ឯកឧត្តមសូមឲ្យក្រុមនីមួយៗក្នុងមួយសប្ដាហ៍ត្រូវចុះ០៤ថ្ងៃ សម្រាក០៣ថ្ងៃ។ ត្រូវទទួលខុសត្រូវនិងគ្រប់គ្រងភូមិសាស្ត្រឲ្យបានហើយចែកឲ្យដាច់ថា តើកន្លែងណាត្រូវដកហូតមកវិញដាច់ខាត? កន្លែងណាទុកសុំគោលការណ៍ពីថ្នាក់លើ? កន្លែងណាដើមឈើដុះឡើងវិញ? កន្លែងណាត្រូវដាំដើមឈើឡើងវិញ?
កន្លែងណាដែលមិនច្បាស់លាស់ ត្រូវឃ្លុំទុកបណ្ដោះអាសន្ន សុំគោលការណ៍ពីគណៈកម្មការគ្រប់គ្រងដីរដ្ឋខេត្ត ដើម្បីពិគ្រោះយោបល់ជាមួយប្រធានក្រុមការងាររាជរដ្ឋាភិបាលចុះមូលដ្ឋានខេត្តពោធិ៍សាត់ សុំគោលការណ៍បន្តទៅប្រមុខរាជរដ្ឋាភិបាលសម្រេច។
លោក ខូយ រីដា មានប្រសាសន៍ថា យើងធ្វើលើកនេះមិនឲ្យបរាជ័យទេ រាជរដ្ឋាភិបាលបានផ្ដល់សិទ្ធិអំណាច ដល់រដ្ឋបាលថ្នាក់ក្រោមជាតិ ធ្វើជាមុខមាត់ដើម្បីជាតិ បើយើងធ្វើមិនល្អមានន័យថា យើងកម្ទេចការអនុវត្តតួនាទីភារកិច្ចរបស់ខ្លួន ហើយប្រើប្រាស់កញ្ចប់ថវិការជាតិ គ្មានតម្លាភាពនិងគ្មានប្រសិទ្ធភាពទៀតផង។
នៅផ្លូវអន្ទង់អាំងចាប់ពីជើងភ្នំ១៥០០ទៅ មានប្រវែង១០គមដែលត្រូវដាំដើមផ្កា ដើម្បីឲ្យមានសម្រស់ស្រស់ស្អាតតាមដងផ្លូវ សម្រាប់ភ្ញៀវទេសចរណ៍ទៅលេងកំសាន្ត។ ដូច្នេះ យើងត្រូវធ្វើប្លង់គោលឲ្យបានច្បាស់លាស់ ដាំតាមលក្ខណៈបច្ចេកទេសឲ្យបានត្រឹមត្រូវ ព្រោះតំបន់នោះជាផ្ទាំងស៊ីបរបស់មហាជន និងជាគម្រោងរបស់រាជរដ្ឋាភិបាល ដែលត្រូវប្រុងប្រយ័ត្នបំផុត។ យើងដាំដើមក្ងោកនិងដើមលឿងរាជអមសងខាងផ្លូវ ឯដើមឈើប្រណិតគ្រប់ប្រភេទ ដាំនៅខាងក្នុង។
លោក ខូយ រីដា ព្រមានចំពោះមន្ត្រីណាដែលជាប់ពាក់ព័ន្ធបញ្ហាដីធ្លី និងឃុបឃិតប្រព្រឹត្តអំពើពុករលួយ លើដីដែលដកហូតបានហើយ ត្រូវដកខ្លួនចេញជាបន្ទាន់និងទទួលខុសត្រូវដោយខ្លួនឯង។ ចំណែកបុគ្គលជានាយទាហ៊ានម្នាក់ ដែលសាងសង់ផ្ទះនៅលើកំពូលភ្នំ និងប្រជាជនចំនួន៣០គ្រួសារទៀត ដែលមិនព្រមចេញទៅនៅកន្លែងថ្មី រដ្ឋបាលខេត្តកំណត់រយៈពេល៣០ថ្ងៃប៉ុណ្ណោះ បើមិនចេញទេ នឹងអនុវត្តវិធានការតាមផ្លូវច្បាប់ជាធរមាន។
ចែករំលែកព័តមាននេះ