រាជធានីភ្នំពេញ ៖ នាងកម្មការិនីរោងចក្រកាត់ដេរម្នាក់ ដែលជាស្រីមេម៉ាយ វ័យក្មេងកូន១ បានខិតខំធ្វើការរកប្រាក់ចិញ្ចឹមឪពុកពិការ និងម្ដាយចាស់ ព្រមទាំងកូនតូចម្នាក់ទៀតផងបានទទូចសុំឲ្យលោកឧត្ដមសេនីយ៍ឯកជួន ណារិន្ទ អគ្គស្នងការរង…
រាជធានីភ្នំពេញ ៖ នាងកម្មការិនីរោងចក្រកាត់ដេរម្នាក់ ដែលជាស្រីមេម៉ាយ វ័យក្មេងកូន១ បានខិតខំធ្វើការរកប្រាក់ចិញ្ចឹមឪពុកពិការ និងម្ដាយចាស់ ព្រមទាំងកូនតូចម្នាក់ទៀតផងបានទទូចសុំឲ្យលោកឧត្ដមសេនីយ៍ឯកជួន ណារិន្ទ អគ្គស្នងការរង និងជាស្នងការនគរបាលរាធានីភ្នំពេញ ជួយស្វែងរកម៉ូតូរបស់នាងដែលត្រូវចោរលួចយកចេញពីផ្ទះជួលមួយកន្លែង ដែលនាងស្នាក់នៅ ។
នាងបានរៀបរាប់ថា ម៉ូតូដែលបាត់នោះ គឺនាងទើបតែទិញបង់រំលស់បានរយៈពេល២ខែប៉ុណ្ណោះ ដើម្បីជិះទៅធ្វើការងារ និងគេ ហើយពេលត្រឡប់មកពីធ្វើការវិញ នាងបានទុកនៅក្នុងផ្ទះជួលខាងលើក៏ត្រូវចោរលួចយកទៅបាត់តែម្ដង ។ នាងក៏បានអះអាងផងដែរថា នៅផ្ទះជួលនោះ មានចោរចូលលួចម៉ូតូយកម៉ូតូអស់ចំនួន៤គ្រឿង ទាំងម៉ូតូរបស់នាងនេះហើយ ប៉ុន្តែចោរមានសុវត្ថិភាពណាស់មិនត្រូវបានរកឃើញចាប់បានឡើយ ។
ក្រោយពេលដឹងថា បាត់ម៉ូតូភ្លាមនាងបានពឹងសុំឲ្យម្ចាស់ផ្ទះជួលខាងលើជួយឆែកកាមេរ៉ាមើលដែរ ប៉ុន្តែដំបូងម្ចាស់ផ្ទះជួលនោះបានប្រាប់ថា ពេលថ្ងៃអត់ដាក់កាមេរ៉ាទេ គឺដកចេញ ហើយដាក់កាមេរ៉ាតែពេលយប់ប៉ុណ្ណោះ ។ បន្ទាប់មកនាងក៏បានទៅប្ដឹងនគរបាលប៉ុស្តិ៍កំបូលឲ្យជួយអន្តរាគមន៍ដែរ ប៉ុន្តែរយៈពេល៤ថ្ងៃហើយដូចគ្មានតម្រុយ ឬ សង្ឃឹមថានិងអាចរកម៉ូតូឃើញវិញសោះ ។
មិនតែប៉ុណ្ណោះ ខណៈដែលនាងរវល់តែតាមរកម៉ូតូនេះ នាងមិនសូវបានទៅធ្វើការងារឡើយ ក៏ត្រូវបានថៅកែបណ្ដេញចេញថែមទៀត ពេលនេះនាងមិនអស់ចិត្តនោះទេ ហើយបានសង្ស័យថា ម្ចាស់ផ្ទះជួលខាងលើមានការលាក់លៀមអំពីរឿងនេះផងដែរ ។
ហេតុការណ៍ខាងលើនោះ បានកើតឡើងកាលពីវេលាម៉ោង១១ព្រឹក ថ្ងៃទី១៩ ខែមិថុនា ឆ្នាំ២០២៤ នៅចំណុចផ្ទះជួល ក្នុងភូមិតាសេក សង្កាត់កំបូល ខណ្ឌកំបូល រាជធានីភ្នំពេញ ។
នាងកម្មការិនីរងគ្រោះឈ្មោះខាងលើឈ្មោះ ផន គា អាយុ១៨ឆ្នាំ មានទីលំនៅអចិន្ត្រៃយ៍ ភូមិក្រសាំងទង ឃុំអង្គររាជ្យ ស្រុកព្រះស្ដេច ខេត្តព្រៃវែង ហើយបច្ចុប្បន្នស្នាក់នៅផ្ទះជួលកើតហេតុខាងលើ ។ នាងបាននិយាយពីដំណើររឿងដូចតទៅ ៖ នាងជាស្រីមេម៉ាយ ដែលបានលែងលះគ្នាជាមួយប្ដីក្រោយបង្កើតបានកូន១នាក់ ហើយបានទទួលបន្ទុករ៉ាប់រងចិញ្ចឹមឪពុកពិកា ម្ដាយចាស់ និងកូនផង តាមរយៈការងាររោងចក្រ ហើយនាងក៏បានឆ្លៀតទិញម៉ូតូ១គ្រឿង ម៉ាកហុងដាប៊ីត ពណ៍ស លាយខៀវ ពាក់ស្លាកលេខភ្នំពេញ 1KS-4446 ក្នុងតម្លៃ១,៨០០ដុល្លារ ដើម្បីជិះទៅធ្វើការ ។
ដោយឡែក កាលពីវេលាម៉ោង៨យប់ ថ្ងៃទី១៨ ខែមិថុនា ឆ្នាំ២០២៤ ក្រោយត្រឡប់មកពីធ្វើការរោងចក្រវិញ នាងបានទុកនៅខាងក្រោមជាមួយម៉ូតូអ្នកដទៃច្រើនគ្រឿងទៀត ដូចរៀងរាល់ថ្ងៃដែរ បន្ទាប់ពីទុកដាក់រួចរាល់ហើយនាងក៏បានឡើងទៅដេកនៅក្នុងបន្ទប់ជាន់ទី២ផ្ទះជួលនោះ ។ លុះដល់ព្រឹកឡើង ថ្ងៃទី១៩ ខែមិថុនា ដោយមិនស្រួលខ្លួននាងអត់បានទៅធ្វើការនោះទេ បានសុំច្បាប់រោងចក្រសម្រាក១ព្រឹក ហើយក៏អត់បានចុះទៅមើលម៉ូតូឡើយ រហូតដល់វេលាម៉ោង១១ព្រឹក ថ្ងៃដដែលទើបចុះទៅយកម៉ូតូ ដើម្បីជិះទៅធ្វើការ ស្រាប់តែបាត់មិនឃើញ មិនដឹងថា ចោរលួចម៉ូតូបាត់តាំងពីពេលណានោះទេ ។
នាងកម្មការិនីមេម៉ាយរូបនោះបាននិយាយទៀតថា ភ្លាមៗនោះនាងក៏បានសុំពឹងឲ្យម្ចាស់ផ្ទះជួលជួយឆែកកាមេរ៉ាមើលសុវត្ថិភាព ប៉ុន្តែមុនដំបូងម្ចាស់ផ្ទះប្រាប់នាងថា ឆែកមិនកើតទេដាច់ភ្លើង ទាំងដែលថ្ងៃនោះភ្លើងអត់ដាច់ផង ។ លុះនាងនៅតែទទូចសុំឆែកទៀត ម្ចាស់ផ្ទះដដែលបែរជាប្រាប់ថា គាត់អត់ចេះឆែកទេ ហើយកាលពីពេលបាត់ម៉ូតូលើកមុនៗគាត់ឲ្យប៉ូលិសមកឆែកឲ្យដែរ ។ បន្ទាប់មកនាងក៏បានទៅដាក់ពាក្យបណ្ដឹងនៅប៉ុស្តិ៍នគរបាលកំបូលឲ្យជួយ ពេលនោះនគរបាលបានប្រាប់ឲ្យនាងត្រឡប់ទៅផ្ទះជួលវិញមុនទៅ នគរបាល និងទៅតាមក្រោយ ។
លុះរហូតដល់វេលាម៉ោងប្រមាណ៤ល្ងាចថ្ងៃដដែល ទើបនគរបាលប៉ុស្តិ៍ខាងលើចុះទៅដល់ ប៉ុន្តែអត់បានឆែកកាមេរ៉ាសវត្ថិភាពមើលទេ ដោយសារតែម្ចាស់ផ្ទះប្រាប់នគរបាលថា គាត់ដាក់កាមេរ៉ាតែពេលយប់ ចំណែកពេលថ្ងៃអត់ដាក់ទេ ព្រមទាំងអះអាងថា ពេលម៉ោង៧ព្រឹកគាត់បានឃើញម៉ូតូនាងនៅផ្ទះនោះនៅឡើយទេ ។ នាងរងគ្រោះបានប្រាប់ឲ្យដឹងបន្តទៀតថា តែនាងមិនអស់ចិត្តឡើយ និងបានសុំឲ្យម្ចាស់ផ្ទះឆែកមើលពេលយប់ទៀត ប៉ុន្តែម្ចាស់នៅតែមិនព្រមឆែកឲ្យមើលសោះ ហើយបែរជានាំនាងទៅសុំឆែកមើលកាមេរ៉ារបស់អ្នកជិតខាងទៅវិញ ។
ចំណែកអ្នកជិតខាងនោះក៏ចិត្តល្អណាស់ បានយល់ព្រមឲ្យឆែក បន្ទាប់មកបានឆែកមើលចន្លោះពីម៉ោង៨ ដល់ម៉ោង១០ព្រឹក តែអត់មានឃើញសកម្មភាពចោរយកម៉ូតូនាងចេញទេ ពេលនោះម្ចាស់ផ្ទះជួលរូបនោះក៏បានប្រាប់នាងទៀតថា កាមេរ៉ាអ៊ុំដាក់នៅម៉ោង៥ល្ងាច ហើយបានដកចេញនៅម៉ោង៥ព្រឹក ។ ព្រោះនៅពេលយប់មានម៉ូតូច្រើនទើបគាត់ដាក់ លុះពេលព្រឹកគេចេញទៅធ្វើការអស់អត់មានម៉ូតូគាត់អត់ដាក់កាមេរ៉ាទេ ចំណែកនគរបាលប៉ុស្តិ៍កំបូលឯណោះវិញបានប្រាប់នាងថា ពេលបានវីដេអូពីអ្នកជិតខាងមានតម្រុយអ្វីចាំប្រាប់នគរបាលផង ។
នារីខាងលើបានបញ្ជាក់ប្រាប់បន្ថែមថា បន្ទាប់មកទៀតនាងមិនបានទៅធ្វើការទេ ដោយរវល់ដើរកម៉ូតូផង និងនៅរង់ចាំនគរបាលទៅឆែកកាមេរ៉ាមើលផងរហូតដល់ត្រូវថៅកែបណ្ដេញចេញពីការងារ លុះរយៈពេល៤ថ្ងៃក្រោយមក គឺនៅថ្ងៃទី២១ ខែមិថុនា នាងបានទាក់ទងទៅកាន់នគរបាលដដែលឲ្យពន្លឿនក្នុងការឆែកកាមរ៉ាសុវត្ថិភាពដែលម្ចាស់ផ្ទះជួលអះអាងថា ដាក់ពេលយប់នោះ ។
ខណៈនោះនគរបាលប្រាប់ថា និងចុះទៅនៅវេលាម៉ោង១១ព្រឹក ថ្ងៃទី២២ ខែមិថុនា លុះដល់ម៉ោង១១ព្រឹក មិនឃើញទៅនាងក៏បានទាក់ទងទៅម្ដងទៀត នគរបាលបានប្រាប់ថា បងក៏រវល់ដែរ អញ្ចឹងចាំម៉ោង៣ឬម៉ោង៤រសៀលទៅ ។
ពេលនោះនាងក៏បានសុខចិត្តបន្តរង់ចាំស្រាប់តែនគរបាលមានទៅឆែកនៅវេលាម៉ោង៣ឬ៤ រសៀលឯណា គឺទៅឆែកស្ងាត់ៗជាមួយម្ចាស់ផ្ទះនៅវេលាម៉ោង១សៀលថ្ងៃដដែលនោះទៅវិញ ដោយមិនបានហៅនាងចូលរួមមើលឡើយ ។ ហើយនាងក៏មិនបានដឹងដែរ ប៉ុន្តែនាងបានចុះលើជាន់ទី២មកក្រោម ហើយបានឃើញដោយចៃដន្យទើបនគរបាលហៅឲ្យនាងចូលរួមឆែកមើល ប៉ុន្តែឆែកពុំឃើញពីសកម្មភាពចោរលួចម៉ូតូទៅទាល់តែសោះ ពិតជាធ្វើឲ្យមានការងឿងឆ្ងល់ខ្លាំងណាស់ ។
ស្ត្រីម្ចាស់ម៉ូតូរូបនេះបាននិយាយទៀតថា ក្រោយពេលបាត់ម៉ូតូ៤ថ្ងៃហើយ គ្មានសង្ឃឹមថា អាចរកឃើញបែបនេះ ម្យ៉ាងត្រូវថៅកែដកចោលទៀតទើបនាងរត់រកក្រុមអ្នកសារព័ត៌មានឲ្យជួយផ្សាយ ដើម្បីឲ្យលោកឧត្ដមសេនីយ៍ឯកជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញបានជ្រាបពីរឿងនេះ ។
ពេលនេះនាងអស់សង្ឃឹមខ្លាំងណាស់ ម៉ូតូក៏បាត់ហើយជំពាក់ប្រាក់ថ្លៃបង់រំលស់ម៉ូតូគេ ហើយនាងគ្មានប្រាក់សម្រាប់បង់ថ្លៃម៉ូតូ និងចិញ្ចឹមឪពុកពិការម្ដាយចាស់ និងកូនតូចទៀតទេ ព្រោះត្រូវថៅកែបញ្ឈប់ការងារទៀតនោះ ៕
ចែករំលែកព័តមាននេះ