ក្រុងប៉ោយប៉ែត ៖ កាលពីរសៀលថ្ងៃទី៩ មិថុនា មន្ត្រីកាំកុងត្រូលសាខាខេត្តបន្ទាយមានជ័យសហការជាមួយសមត្ថកិច្ចចម្រុះមាន នគរបាលប្រឆាំងបទល្មើសសេដ្ឋកិច្ចខេត្តនិងក្រសួងមហាផ្ទៃ បានចុះត្រួតពិនិត្យទំនិញតាមផ្សារនានា ក្នុងក្រុងប៉ោយប៉ែត ក្នុងគោលបំណងដកហូតទំនិញខូចគុណភាពនិងហួសកាលបរិច្ឆេទ
ក្រុងប៉ោយប៉ែត ៖ កាលពីរសៀលថ្ងៃទី៩ មិថុនា មន្ត្រីកាំកុងត្រូលសាខាខេត្តបន្ទាយមានជ័យសហការជាមួយសមត្ថកិច្ចចម្រុះមាន នគរបាលប្រឆាំងបទល្មើសសេដ្ឋកិច្ចខេត្តនិងក្រសួងមហាផ្ទៃ បានចុះត្រួតពិនិត្យទំនិញតាមផ្សារនានា ក្នុងក្រុងប៉ោយប៉ែត ក្នុងគោលបំណងដកហូតទំនិញខូចគុណភាពនិងហួសកាលបរិច្ឆេទ។
ការចុះត្រួតពិនិ្យទំនិញនេះបានធ្វើឡើងជាច្រើនកន្លែងរួមមាន១-ផ្សារទំនើបស៊ីវសុជាតិដា(លីសែ) មានទីតាំងស្ថិតនៅជាប់ផ្លូវជាតិលេខ៥ក្នុងភូមិបាលិលេយ្យ ២-នៅចំណុចផ្សាររាត្រីប្លុកកាស៊ីណូផ្កាយ៥ និង៣-ត្រួតពិនិត្យនៅចំណុចក្រោមខ្លោងទ្វារប្រាសាទកំពូល៣មាត់ច្រកទ្វារអន្តរជាតិប៉ោយប៉ែត។ ដោយឡែកនៅចំណុចចុងក្រោយនេះគេឃើញមានផ្ទុះសង្គ្រាមពាក្យសម្តីមួយប្រាវដាក់គ្នាយ៉ាងតឹងសរសៃកផងដែរ ពីសំណាក់មន្ត្រីប៉ូលិសអន្តោប្រវេសន៍ច្រកទ្វារដែលបានមកតវ៉ា និងខឹងសម្បាមន្ត្រីជំនាញនិងសមត្ថកិច្ចចម្រុះថា មិនមានការសហការជាមួយពួកគេដែលជាសមត្ថកិច្ចគ្រប់គ្រងមាត់ច្រក ។ ជម្លោះពាក្យសម្តីដាក់គ្នានេះមានរយៈពេលប្រមាណជិត១ម៉ោងទើបគេឃើញសមត្ថកិច្ចទាំងនោះសម្រួលគ្នាជាធម្មតាវិញ ហើយបន្ទាប់មកមន្ត្រីជំនាញនិងសមត្ថកិច្ចចម្រុះក៏បានធ្វើការជាបន្តទៅតាមនីតិវិធី ។
ក្នុងការត្រួតពិនិត្យទំនិញខូចគុណភាពនិងហួសកាលបរិច្ឆេទនេះ មន្ត្រីជំនាញបានដកហូតយកគ្រឿងឧបភោគបរិភោគមួយចំនួនរួមមាន ស្រា BLACK LABEL, GOLD LABEL, RED LABEL ចំនួន៥៤ដប និងទឹកបរិសុទ្ធម៉ាកណាមធីប ជាផលិតផលរបស់ប្រទេសសៀមចំនួន៥០យួរ ព្រមទាំងគ្រឿងឧបភោគបរិភោគមួយចំនួនដែលសុទ្ធតែជារបស់ខូចគុណភាព ។ មន្ត្រីជំនាញបានឱ្យដឹងថា ស្រាដែលពួកគេដាក់តាំងលក់នេះគឺជាស្រាដែលក្លែងបន្លំយីហោរបស់ក្រុមហ៊ុនអ៊ែតវូត ។
គួរកត់សម្គាល់ថា មន្ត្រីជំនាញនិងសមត្ថកិច្ចចម្រុះដែលចុះត្រួតពិនិត្យទំនិញនិងអាហារហួសកាលបរិច្ឆេទនេះគឺដើម្បីជួយថែរក្សាសុខភាពនិងអាយុជីវិតរបស់ប្រជាពលរដ្ឋយើង ។ ទោះជាបែបណាក៏ដោយ ក៏ប្រជាពលរដ្ឋបានសំណូមពរដល់មន្ត្រីជំនាញដែលចុះត្រួតពិនិត្យនៅតាមកន្លែងនីមួយៗសូមឱ្យមានការយកចិត្តទុកដាក់និងឱ្យម៉ត់ចត់ផង ព្រោះការរស់នៅរបស់ពួកគាត់សព្វថ្ងៃនេះគឺផ្ញើវាសនាលើមន្ត្រីជំនាញទាំងស្រុង ចំពោះគ្រឿងឧបភោគបរិភោគនេះ ៕
ចែករំលែកព័តមាននេះ