ខេត្តកណ្តាល ៖ ឆ្លងចរន្តអគ្គិសនី ឆាបឆេះផ្ទះឈើលើថ្មក្រោមយ៉ាងសន្ធោសន្ធៅ បណ្តាលអោយលោកយាយម្នាក់ ស្លាប់យ៉ាងអាណោចអាធ័មក្នុងភ្នក់ភ្លើងកាលពីវេលាម៉ោង១១ និង៤០នាទីព្រឹក ថ្ងៃទី២៣ ខែសីហា ឆ្នាំ២០២៥…
ខេត្តកណ្តាល ៖ ឆ្លងចរន្តអគ្គិសនី ឆាបឆេះផ្ទះឈើលើថ្មក្រោមយ៉ាងសន្ធោសន្ធៅ បណ្តាលអោយលោកយាយម្នាក់ ស្លាប់យ៉ាងអាណោចអាធ័មក្នុងភ្នក់ភ្លើងកាលពីវេលាម៉ោង១១ និង៤០នាទីព្រឹក ថ្ងៃទី២៣ ខែសីហា ឆ្នាំ២០២៥ ស្ថិតនៅចំណុចផ្លូវបេតុង ភូមិព្រែកតាពៅ សង្កាត់ដើមមាន ក្រុងតាខ្មៅ ខេត្តកណ្តាល ។
លោកវរសេនីយ៌ឯក យី វណ្ណដា អធិការដ្ឋាននគរបាលក្រុងតាខ្មៅ បានឲ្យដឹងថា ជនរងគ្រោះជាម្ចាស់ផ្ទះ ដែលបានស្លាប់បាត់បង់ជីវិតមានឈ្មោះ ឡា មុំ ភេទស្រី អាយុ៧៥ឆ្នាំ ជាជនពិការ (ក្នុងវ័យចាស់ជរា) ស្នាក់នៅក្នុងផ្ទះកើតហេតុខាងលើ ភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្ដាល ។
បើយោងតាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុពួកគាត់ កំពុងតែពិសារបាយ ស្របពេលនោះក៏ មានធំក្លិនឈ្ងៀម ទើបចេញមកមើល ស្រាប់តែឃើញមានផ្សែងហុយខ្មៅខ្មួលខ្មាញ់ លាយឡំអណ្តាតភ្លើងយ៉ាងសន្ធោសន្ធៅ ចេញពីខាងក្រោមផ្ទះកើតហេតុបាត់ទៅហើយ។ ភ្លាមៗប្រជាពលរដ្ឋបាននាំគ្នាចូលទៅជួយសង្គ្រោះលោកយាយចាស់ជរា ជាប់នៅខាងក្នុងផ្ទះ តែដោយសារអំណាចភ្លើងឆេះសន្ធោរសន្ធៅខ្លាំងពេក ទើបជួយលោកយាយមិនបាន ។ ទើបប្រញាប់រាយការណ៍ជូនសមត្ថកិច្ចអោយជួយចុះមកអន្តរាគមន៍ ។
បន្ទាប់ពីទទួលបានដំណឹងថា មានករណីអគ្គិភ័យឆាបឆេះផ្ទះប្រជាពលរដ្ឋភ្លាមៗ លោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាល បានឲ្យរថយន្តបង្ការអគ្គិភ័យពន្លត់ និងសង្គ្រោះចេញរថយន្តទៅជួយអន្តរាគមន៍ពន្លត់អគ្គិភ័យផងដែរ ។
សូមបញ្ជាក់ផងដែលក្នុងករណីអគ្គិភ័យនេះបណ្តាលឲ្យឆេះផ្ទះចំនួន០១ខ្នង ឈើលើថ្មក្រោមប្រក់ក្បឿងទំហ៊ុ ១០ ម៉ែត្រ × ១២ ម៉ែត្រ ឆេះខូចខាតទាំងស្រុង, ម៉ូតូចំនួន០១គ្រឿង និងខូតខាតសម្ភារទាំងស្រុងនៅក្នុងផ្ទះ ។ កម្លាំងនគរបាលបានប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលខេត្តកណ្ដាល ចំនួន០៣គ្រឿង, រថយន្តពន្លត់អគ្គិភ័យរបស់បញ្ជាការដ្ឋានអង្គរក្សចំនួន០១គ្រឿង ប្រើប្រាស់ទឹកសរុបចំនួន០៤ គ្រឿង រលត់ជាស្ថាពរនៅវេលាម៉ោង១២និង៣០នាទីថ្ងៃដដែល។ ចំពោះមូលហេតុសមត្ថកិច្ចបានបញ្ជាក់ថា បណ្តាលមកពីឆ្លងចរន្តអគ្គិសនី (ទុស្សេខ្សែភ្លើង) ៕
ចែករំលែកព័តមាននេះ