ព្រះមហាក្សត្រ ចេញព្រះរាជក្រឹត្យ ត្រាស់បង្គាប់បញ្ចប់គោរមងារឧកញ៉ា ស្រី ស៊ីណា
រាជធានីភ្នំពេញ ៖ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅថ្ងៃទី២០…
រាជធានីភ្នំពេញ ៖ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅថ្ងៃទី២០ ខែមិថុនា ឆ្នាំ២០២៤ បានចេញព្រះរាជក្រឹត្យ ត្រាស់បង្គាប់ បញ្ចប់គោរមងារ ឧកញ៉ា ពីឧកញ៉ាស្រី ស៊ីណា តាមសេចក្តីក្រាបបង្គំទូលថ្វាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។
សូមរម្លឹកថា ហេតុការណ៍ផ្ទុះអាវុធមួយបានកើតឡើងនៅវេលាម៉ោង១៥និង៣០នាទីថ្ងៃទី១៧ ខែមិថុនា ឆ្នាំ២០២៤ បណ្ដាលឲ្យមនុស្ស២នាក់ស្លា.ប់ និង២នាក់ទៀតរងរបួសធ្ងន់ស្រាល ត្រង់ចំណុចបុរីប៉េងហួតបឹងស្នោ សង្កាត់និរោធ ខណ្ឌច្បារអំពៅ រាជធានីភ្នំពេញ បង្កដោយជនដៃដល់ម្នាក់ឈ្មោះ ស្រី ស៊ីណា គ្រាន់តែទំនាស់រឿងស្នួហាលខោអាវលើរបងព្រំផ្ទះ ដែលនៅជាប់គ្នា ក្នុងបុរីប៉េងហួត ។
ក្រោយបាញ់ប្រហាររួច អតីតឧកញ៉ា ស្រី ស៉ីណា បានគេចខ្លួនពីកន្លែងកើតហេតុ រហូតដល់ម៉ោង១៧និង៣០នាទីថ្ងៃដដែល នៅចំណុចផ្លូវជាតិ៥១ ភូមិអន្ទង់ក្រវែន ឃុំម្កាក់ ស្រុកអង្គស្នួល ខេត្តកណ្តាល កម្លាំងជំនាញ សហការជាមួយកម្លាំងជំនាញស្នងការដ្ឋាននគរបាលខេត្តកណ្តាល ធ្វើការបង្ក្រាប និងឃាត់ខ្លួនជនសង្ស័យឈ្មោះ ស្រី ស៊ីណា ភេទប្រុស អាយុ៥០ឆ្នាំ ដើម្បីយកមកធ្វើការសាកសួរតាមនីតិវិធី ដែលក្នុងនោះ ជនសង្ស័យចំនួន២នាក់ទៀត ក៏ត្រូវឃាត់ខ្លួនផងដែរ ម្នាក់ជាអ្នកដឹកជនសង្ស័យទៅធ្វើសកម្មភាព និងម្នាក់ទៀត ដឹកជនសង្ស័យ ក្រោយធ្វើសកម្មភាពឡើងជិះរថយន្ដ ។
ក្រោយបញ្ចប់ការសួរនាំ នាយកដ្ឋាននគរបាលព្រហ្មទណ្ឌ បានកសាងសំណុំរឿងបញ្ជូនជនសង្ស័យ៣នាក់ ដោយម្នាក់ជាជនដៃដល់អតីតឧកញ៉ា ស្រី ស៊ីណា និង២នាក់ទៀត ជាអ្នកឌុប ដើម្បីទៅធ្វើសកម្មភាព និងក្រោយធ្វើសកម្មភាព បញ្ជូនទៅកាន់សាលាដំបូងរាជធានីភ្នំពេញ ៕
ចែករំលែកព័តមាននេះ