ទីក្រុងម៉ានីឡា៖ អគ្គបញ្ជាការកងទ័ពហ្វ៊ីលីពីនទាមទារឱ្យប្រទេសចិនប្រគល់កាំភ្លើងវែងដែលចិនរឹបអូសបានពីទូកហ្វ៊ីលីពីនដើម្បីប្រគល់ទៅឱ្យហ្វ៊ីលីពីនវិញបើមិនចង់មានរឿងធំជាមួយគ្នា។ គេដឹងថាកងទ័ពចិនក៏បានរឹបអូសគ្រឿងបរិក្ខារយោធាមួយចំនួនផងដែរនៅប្រជុំកោះមានជម្លោះ។ អគ្គបញ្ជាការរូបនេះថែមទាំងទាមទារឱ្យចិនផ្ដល់សំណងចំពោះការខូចខាតនៅក្នុងការប៉ះទង្គិចគ្នាថ្មីៗនេះដែលលោកចាត់ទុកថាជាទង្វើដូចចោរហារយ។
ទាហានជើងទឹកចិនឡើងជិះអូប័រជាង៨គ្រឿង ហើយឡោមព័ទ្ធទូកកៅស៊ូ២គ្រឿងរបស់ហ្វ៊ីលីពីន។ បន្ទាប់ពីហ៊ុមព័ទ្ធជាប់ហើយ ពួកគេឡើងទៅលើទូកនោះដើម្បីទប់ស្កាត់មិនឱ្យទាហានជើងទឹកហ្វ៊ីលីពីនដឹកម្ហូបអាហារ និងគ្រឿងសាស្ត្រាវុធទៅឱ្យគ្នារបស់ពួកគេនៅប្រជុំកោះថូម៉ាស់ទី២ (Second Thomas Shoal)ដែលជាតំបន់ប្រទាញប្រទង់គ្នា ហើយដែលត្រូវប្រទេសចិនចាត់ទុកជាទឹកដីរបស់ខ្លួន។
ខ្មោចកប៉ាល់នៅប្រជុំកោះ Thomas Shoal ដែលបន្សល់ទុកតាំងពីសម័យសង្គ្រាមលោកលើកទី២។ ហ្វ៊ីលីពីនយកខ្មោចកប៉ាល់នេះជាតឹកតាងប្រវត្តិសាស្ត្របញ្ជាក់ថាទឹកដីរបស់ខ្លួននៅត្រឹមហ្នឹង។ កប៉ាល់នេះមានទាហានជើងទឹកហ្វ៊ីលីពីនស្នាក់នៅក្នុងនោះ។ ដូចនេះ ហ្វ៊ីលីពីនត្រូវដឹកជញ្ជូនស្បៀងអាហារទៅឱ្យពួកគេ។ ប៉ុន្តែមុននឹងទៅដល់ទីនោះត្រូវឆ្លងកាត់ខ្សែការពាររបស់ទាហានជើងទឹកចិនជាមុនសិន។ អីចឹងហើយបានជាមានការប្រទាំងប្រទើសគ្នា។បន្ទាប់ពីមានហេតុការណ៍ប្រទាំងប្រទើសគ្នា និងបើកទូកប៉ះពារគ្នាជាញឹកញាប់ កងទ័ពជើងទឹកចិនសម្រេចចិត្តរឹបអូសទូកទាំងនោះ ហើយកាប់បំផ្លាញខូចខាតយ៉ាងដំណំដោយប្រើប្រាស់ពូថៅដៃ, កាំបិត និងញញួរ។ ពួកគេរឹបអូសបានកាំភ្លើងវែងធុនអឹមបួន (M4) ចំនួន៨ដើមដែលលាក់ទុកនៅក្នុងកេស, រឹបអូសគ្រឿងបរិក្ខារ និងបង្ករបួសស្នាមចំពោះទាហានហ្វ៊ីលីពីន។ ក្នុងនោះទាហានម្នាក់ដាច់មេដៃខាងស្ដាំ។ នេះបើយោងតាមមន្ត្រីសន្តិសុខហ្វ៊ីលីពីន២នាក់និយាយប្រាប់អ្នកសារព័ត៌មាន។
តាមរយៈរូបវីឌីអូឃ្លីប និងរូបថតសន្លឹកមួយចំនួនដែលផ្សព្វផ្សាយដោយទាហានហ្វ៊ីលីពីនកាលពីយប់ថ្ងៃពុធ គេឃើញថាទាហានចិន និងហ្វ៊ីលីពីនពិតជាបានប្រឈមមុខដាក់គ្នាខ្លាំងក្លាណាស់។ គេឃើញទាហានចិនបង្ហាញកាំបិតផ្គាក់ ពូថៅដៃ និងឈើជ្រុងដើម្បីត្រៀមកាប់ចាក់ និងវាយសំពងទាហានហ្វ៊ីលីពីន បើពួកគេហ៊ានធ្វើខ្លាំងដាក់ខ្លួន។ ពេលនោះ ទាហានចិនបានហ៊ុមព័ទ្ធទូកកៅស៊ូរបស់ហ្វ៊ីលីពីន។ គេស្ដាប់ឮសំឡេងស៊ីរ៉ែនស្រែកកងរំពងពេញផ្ទៃសមុទ្រនៅពេលភាគីទាំង២ស្រែកជំទាលខ្លាំងៗដាក់គ្នា។ ក្រោយមក ទាហានចិនយកដំបងវាយទូករបស់ហ្វ៊ីលីពីន និងចាប់ទាញសាក់កាដូដោយប្រើឈើជ្រុង។
តាមរយៈរូបថតសន្លឹកទាំងនោះ គេឃើញទូកហ្វ៊ីលីពីន១គ្រឿងរងការខូចខាត។ ពោះវៀនឡានដែលដាក់នៅចំហៀងទូកក៏ត្រូវចិនយកកាំបិតឆូតឱ្យធ្លាយចេញខ្យល់អស់រលីង។ ទូក១គ្រឿងទៀតមានក្បាំងការពារនៅខាងមុខ និងអេក្រង់សម្រាប់មើលផ្លូវក៏ត្រូវទាហានចិនវាយបែកបាក់។ គេឃើញបុរសម្នាក់លើកបង្ហាញទូរស័ព្ទដៃរបស់ខ្លួនដែលត្រូវគេវាយបែកអេក្រង់។
ឧត្ដមសេនីយ៍រ៉ូម៉េអូ ប្រនណឺ (Romeo Brawner) ជាអគ្គបញ្ជាការកងទ័ពហ្វ៊ីលីពីនបានថ្លែងប្រាប់អ្នកសារព័ត៌មាននៅកោះផាឡាវ៉ាន់ (Palawan) ជាទីដែលលោកចុះសួរសុខទុក្ខទាហានរបួស។ លោកទាមទារឱ្យចិនប្រគល់កាំភ្លើង និងរបស់របរដែលពួកគេយកទៅ ហើយត្រូវសងការខូចខាត។ លោកយល់ថាធ្វើបែបហ្នឹងមិនសមទាល់តែសោះ។ ពួកគេកាន់កាំបិត និងពូថៅប្រុងកាប់ចាក់ទៅលើទាហានជើងទឹករបស់យើងដែលគ្មានអាវុធនៅក្នុងដៃ។ ពួកយើងគ្រាន់តែតវ៉ាដោយដៃទទេ។
បើគេស្ដាប់ការបកស្រាយពីភាគីចិនវិញម្ដង។ ចិនដាក់ការស្ដីបន្ទោសទៅលើហ្វីលីពីន។ ទោះបីទាហានជើងទឹកចិនដាក់បារ៉ាស់ហាមឃាត់មិនឱ្យចេញចូលតំបន់ហាមឃាត់យ៉ាងណាក្ដី ក៏ទាហានជើងទឹកហ្វ៊ីលីពីននៅតែជម្នះចិត្តបើកចូលឱ្យទាល់តែបាន។ អីចឹងហើយ បានជាទាហានជើងទឹកចិនប្រើប្រាស់សិទ្ធិការពារខ្លួននៅពេលភាគីហ្វ៊ីលីពីនធ្វើផ្គើននឹងការព្រមាន។
នៅទីក្រុងប៉េកាំង អ្នកនាំពាក្យថ្មីរបស់ក្រសួងការបរទេសចិន លោកលីនជៀន (Lin Jian) ថ្លែងថាមូលហេតុដែលនាំឱ្យមានការប្រទាំងប្រទើសគ្នាគឺផ្ដើមចេញពីទាហានជើងទឹកហ្វ៊ីលីពីនធ្វើផ្គើនដាក់ទាហានចិន។ លោកថ្លែងថា «ឆ្មាំការពារដែនសមុទ្ររបស់ចិនបានធ្វើរឿងត្រឹមត្រូវស្របតាមច្បាប់អន្តរជាតិដើម្បីពង្រឹងការអនុវត្តច្បាប់សមុទ្រ។ លោកថានេះជាវិធានការទប់ស្កាត់មិនឱ្យហ្វ៊ីលីពីនដឹកស្បៀងអាហារដោយខុសច្បាប់ទៅផ្គត់ផ្គង់គ្នារបស់គេនៅប្រជុំកោះមានជម្លោះ។ ចិនគ្រាន់តែចាត់វិធានការមិនឱ្យទូកទាំងនោះបើកទៅមុខរួច ហើយមិនមានបំណងបង្កការប៉ះពាល់ចំពោះទាហានជើងទឹកហ្វ៊ីលីពីនទេ»៕
ចែករំលែកព័តមាននេះ