ខេត្តពោធិ៍សាត់ ៖ នៅថ្ងៃទី១៩ ខែមិថុនា ឆ្នាំ២០២៤ រដ្ឋបាលខេត្តពោធិ៍សាត់ ដោយមានកិច្ចសហការ និងសម្របសម្រួល ពីស្នងការដ្ឋាននគរបាលខេត្ត ជាពិសេស…
ខេត្តពោធិ៍សាត់ ៖ នៅថ្ងៃទី១៩ ខែមិថុនា ឆ្នាំ២០២៤ រដ្ឋបាលខេត្តពោធិ៍សាត់ ដោយមានកិច្ចសហការ និងសម្របសម្រួល ពីស្នងការដ្ឋាននគរបាលខេត្ត ជាពិសេស លោកវរសេនីយ៍ឯក ហែម មុន្នី ស្នងការរងទទួលផែនប្រយុទ្ធប្រឆាំងគ្រឿងញៀន និងមន្ត្រីជំនាញពាក់ព័ន្ធទាំងអស់ បានបើកយុទ្ធនាការធ្វើតេស្តរហ័ស ជូនដល់ថ្នាក់ដឹកនាំខេត្ត មន្ត្រីរាជការគ្រប់លំដាប់ថ្នាក់ មន្ត្រីជាប់កិច្ចសន្យា បុគ្គលិកហាត់ការនៃសាលាខេត្តពោធិ៍សាត់ សរុបចំនួន ២០៧នាក់ ដើម្បីរកសារធាតុញៀនតាមទឹកមូត្រ ។
ពិធីនេះស្ថិតក្រោមអធិបតីភាពលោក ខូយ រីដា អភិបាល នៃគណៈអភិបាលខេត្តពោធិ៍សាត់ និងជាប្រធានគណៈកម្មាធិការត្រួតពិនិត្យគ្រឿងញៀនខេត្ត និងលោក ម៉ក់ រ៉ា ប្រធានក្រុមប្រឹក្សាខេត្ត ព្រមទាំងមានការចូលរួមពីលោក លោកស្រី ជាសមាជិកក្រុមប្រឹក្សាខេត្ត និងអភិបាលរងខេត្ត ផងដែរ ។
លោក ខូយ រីដា មានប្រសាសន៍ថា ការធ្វើតេស្តរកសារធាតុញៀននេះ ដោយអនុវត្តតាមបទបញ្ជាលេខ ០១បប ចុះថ្ងៃទី២០ ខែកុម្ភៈ ឆ្នាំ២០២៤ របស់រាជរដ្ឋាភិបាលកម្ពុជា ស្តីពីការដាក់ចេញវិធានការម៉ឺងម៉ាត់ ក្នុងការប្រយុទ្ធប្រឆាំងគ្រឿងញៀនខុសច្បាប់ នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ។ ជាការចូលរួមក្នុងការអនុវត្តតាមអនុសាសន៍ណែនាំដ៍ខ្ពង់ខ្ពស់របស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៍ដូចជាសេចក្ដីណែនាំរបស់អគ្គលេខាធិការដ្ឋាន នៃអាជ្ញាធរជាតិប្រយុទ្ធប្រឆាំងគ្រឿងញៀនផងដែរ។ ម្យ៉ាងវិញទៀត ការធ្វើតេស្តរកសាធាតុញៀន លើមន្ត្រីរាជការ និងមន្ត្រីជាប់កិច្ចសន្យានាពេលនេះ ក៍ដើម្បីចូលរួមចំណែកធានាប្រសិទ្ធភាព នៃការអនុវត្តយុទ្ធនាការប្រឆាំងគ្រឿងញៀនខុសច្បាប់លើកទី៩ ដែលជាអាទិភាពនយោបាយរបស់រាជរដ្ឋាភិបាល ក៏ដូចជាការលើកកម្ពស់ជំនឿទុកចិត្ត ប្រសិទ្ធភាពការងារ និងអភិបាលកិច្ចល្អ នៅក្នុងស្ថាប័ន មន្ទីរ អង្គភាពជុំវិញខេត្ត។
សូមបញ្ជាក់ថា ការធ្វើតេស្តរកសារធាតុញៀននេះ មានថ្នាក់ដឹកនាំខេត្ត សមាជិកក្រុមប្រឹក្សាខេត្ត មន្ត្រីរាជការសាលាខេត្ត មន្ត្រីជាប់កិច្ចសន្យា បុគ្គលិកហាត់កានៃរដ្ឋបាលខេត្ត មន្ត្រីជួរក្រោយនៃអង្គភាពច្រកចេញចូលតែមួយ និងការិយាល័យប្រជាពលរដ្ឋ សរុបចំនួន២០៧នាក់ស្រី៨១នាក់។ បន្ទាប់ពីក្រុមការងារបានធ្វើតេស្តរកសារធាតុញៀននៅរដ្ឋបាលខេត្តរួច នឹងបន្តធ្វើតេស្តរកសារធាតុញៀននៅតាមបណ្តារដ្ឋបាលក្រុងស្រុកឃុំសង្កាត់ និងសមាជិកភូមិ ក៍ដូចមន្ទីរអង្គភាពជុំវិញខេត្ត កងកម្លាំងប្រដាប់អាវុធ គ្រូបង្រៀន និងក្រុមគ្រូពេទ្យបន្តទៀត ដើម្បីបញ្ជាក់នូវភាពស្អាតស្អំ ភាពត្រឹមត្រូវ ក៏ដូចជាបញ្ជាក់ពីការចូលរួមគាំទ្រ យុទ្ធនាការប្រយុទ្ធប្រឆាំងគ្រឿងញៀននផងដែរ ៕
ចែករំលែកព័តមាននេះ