បុរសចិនលោ.តពីលើអគារ ក្រោយពីថៅកែបង្ខាំ.ងបង្អ.ត់អាហារ
- ព្រះសីហនុ
ខេត្តព្រះសីហនុ ៖ បាតុភាពទាក់ទិននឹងជនជាតិចិន ផុតពីរឿងមួយដល់រឿងមួយចាប់ពីពាក់កណ្តាលខែមិថុនាមក ហើយករណីថ្មីមួយទៀតក៏បានធ្វើឱ្យមានការភ្ញាក់ផ្អើលដែរនៅក្រុងព្រះសីហនុ ។
ស្ថិតក្នុងសភាពទទឹកជោករងាញ័រញាក់ ងើបចេញពីអូរទឹកស្អុយ ជនជាតិចិនម្នាក់ត្រូវបានអ្នកស្រុកប្រទះឃើញ កាលពីព្រឹកព្រលឹមថ្ងៃទី១៧ ខែមិថុនា ឆ្នាំ២០២៤កន្លងទៅ នៅចំណុចអូអិលវី ស្ថិតក្នុងភូមិ៤ សង្កាត់លេខ៤ ក្រុងព្រះសីហនុ ដោយបានលើកដៃសំពះឱ្យជួយដល់រូបគាត់និងមិត្តភក្កិម្នាក់ទៀត ដែលត្រូវបានមនុស្សនៅក្នុងកាស៊ីណូហ័ងហ្គ័ង ចាប់ខ្លួនចូលទៅក្នុងកាស៊ីណូវិញ ។
ជុំវិញហេតុការណ៍ភ្ញាក់ផ្អើលនេះ អ្នកដែលបានឃើញជនរងគ្រោះដំបូងគេ និយាយថា នៅវេលាព្រលឹមស្រាងៗថ្ងៃទី១៧ ខែមិថុនានោះខណៈចុងភៅរបស់គាត់ងើបពីដំណេក ស្រាប់តែប្រទះឃើញមនុស្សប្រុសម្នាក់នៅក្នុងអូរទឹកស្អុយ លើកដៃសំពះក្នុងសភាពគួរឲ្យអាណិតជាពន់ពេក ។ ភ្លាមៗនោះ រូបគាត់បានទូរស័ព្ទទៅសមត្ថកិច្ចនិងរថយន្តសង្គ្រោះមកដឹកបុរសរូបនេះទៅកាន់មន្ទីរពេទ្យចម្ការចេក ។
ប្រភពដដែលបានបន្តថា បន្ទាប់ពីរូបគាត់ជួយសង្គ្រោះនិងផ្លាស់ប្ដូរសម្លៀកបំពាក់ឲ្យរួចហើយ បុរសម្នាក់នោះបានប្រាប់ថា រូបគេបម្រើការនៅអនឡាញខុសច្បាប់នៅក្នុងកាស៊ីណូហ័ងហ្គ័ង ហើយត្រូវបានថៅកែបង្ខាំងមិនឲ្យចាកចេញនិងបង្អត់អាហារ ក្រោយពីរូបគេសុំលាឈប់ ។ ដោយសារថៅកែមិនព្រមឱ្យចាកចេញនោះ រូបគេនិងមិត្តភក្តិម្នាក់ទៀត បានសម្រេចចិត្តលួចគាស់បង្អួច ហើយលោតចេញមកក្រៅ តែមិត្តភក្តិរបស់គេម្នាក់នោះរងរបួសបាក់ជើងមិនអាចដើរនិងលូនបាន ហើយក៏ត្រូវមនុស្សមួយក្រុមរបស់ថៅកែចាប់យកទៅកន្លែងដើមវិញ ។ ឯរូបគេបានព្យាយាមគេចខ្លួនតាមប្រឡាយទឹកស្អុយ រហូតត្រូវបានជួយសង្គ្រោះ ។បុរសចិនរូបនេះ បានអំពាវនាវដល់សមត្ថកិច្ច សូមជួយរំដោះមិត្តភក្តិរបស់ខ្លួនដែលត្រូវខាងកាស៊ីណូចាប់យកទៅវិញផង ។
បុរសចិនរូបនេះឈ្មោះ Bin Bin អាយុ២២ឆ្នាំ មានស្រុកកំណើតនៅខេត្តហ៊ឺណាន ប្រទេសចិន បច្ចុប្បន្ន កំពុងសម្រាកព្យាបាលនៅមន្ទីរពេទ្យបង្អែកចម្ការចេក ក្រុងព្រះសីហនុ ។
ទាក់ទិនទៅនឹងបញ្ហានេះ ប្រធានរដ្ឋបាលនៃកាស៊ីណូ ហ័ងហ្គ័ង បានបង្ហើបថា ជនរងគ្រោះពិតជាបម្រើការនៅក្នុងបរិវេណកាស៊ីណូប្រាកដមែន ប៉ុន្តែមិនមែនបម្រើការនៅក្នុងកាស៊ីណូទេគឺបម្រើការឲ្យថៅកែផ្សេង ដែលបានមកជួលប្លុកក្នុងកាស៊ីណូដើម្បីបើកអាជីវកម្ម ។
ជុំវិញករណីនេះ សមត្ថកិច្ចបាននិងកំពុងធ្វើការស្រាវជ្រាវនិងស៊ើបអង្កេត ប៉ុន្តែមកដល់ពេលនេះខាងកាស៊ីណូនៅពុំទាន់អាចទាក់ទងជាមួយនឹងថៅកែរបស់បុរសដែលអះអាងថាជាជនរងគ្រោះបាននៅឡើយទេ ។
លោក សំ ប្រាក់ នាយប៉ុស្តិ៍នគរបាលរដ្ឋបាលសង្កាត់លេខ៤ បានថ្លែងប្រាប់បណ្ដាញព័ត៌មាននាល្ងាចថ្ងៃទី១៧ ខែមិថុនានោះថា ជុំវិញការអះអាងរបស់ជនរងគ្រោះថាជាករណីបង្ខាំងមនុស្សមិនមែនជារឿងពិតនោះទេ ព្រោះថៅកែមិនបានបង្ខាំងឡើយ គឺឱ្យបុគ្គលខាងលើចេញចូលសេរីតាមច្បាប់ស្ដីពីការងារ ។ ប៉ុន្តែ មិនដឹងជាយ៉ាងម៉េច បានជាបុគ្គលទាំង២នាក់នេះគាស់បង្អួចលោតចុះពីលើអគារ ហើយអះអាងថាជាករណីបង្ខាំងមនុស្សទៅវិញ ។
បច្ចុប្បន្នបុរសម្នាក់ទៀតដែលអះអាងថាខាងកាស៊ីណូឃាត់ខ្លួននោះ កំពុងសម្រាកព្យាបាលនៅក្នុងមន្ទីរពេទ្យជាមួយគ្នា ។ ដោយឡែក លោកឧត្តមសេនីយ៍ត្រី ណុប បញ្ញា ស្នងការរងនគរបាលខេត្ត ទទួលផែនព្រហ្មទណ្ឌ ថ្លែងថា ជុំវិញករណីខាងលើនេះសមត្ថកិច្ចបាននិងកំពុងធ្វើការស្រាវជ្រាវទៅតាមនីតិវិធី ៕
ចែករំលែកព័តមាននេះ