ខេត្តព្រះសីហនុ ៖ រថយន្តសេរីទំនើបមួយគ្រឿងឆ្លងចរន្តអគ្គីសនីបង្កជាអគ្គិភ័យឆាបឆេះរងការខូចខាតទាំងស្រុង ដែលស្ថិតនៅភូមិ៤ ឃុំអូរត្រេះ ស្រុកស្ទឹងហាវ ។
លោកវរសេនីយ៍ឯក រស់ កី អធិការនគរបាលស្រុកស្ទឹងហាវ បានឲ្យដឹងថា នៅវេលាម៉ោង២០និង២៥នាទី ថ្ងៃទី១៦ ខែមិថុនា ឆ្នាំ២០២៤ នៅតាមបណ្តោយតិរវិថីសម្តេចតេជោ លេខ១៤៨B ស្ថិតក្នុងចន្លោះបង្គោលគីឡូតិ៍ម៉ែត្រលេខ (១៣,១៤ ) ស្ថិតនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ មានករណីឆាបឆេះរថយន្តសេរីទំនើបមួយគ្រឿង ម៉ាក AUDI A6 ពណ៌ទឹកប្រាក់ ពាក់ស្លាកលេខ ភ្នំពេញ២AK១៨៣១ ។
ដោយអ្នកបើកបរជាជនជាតិចិន មានឈ្មោះ LI JIE ភេទប្រុស អាយុ៣៣ឆ្នាំ មានស្រុកកំណើតប្រទេសចិន បើកបរមានទិសដៅពីខេត្តព្រះសីហនុ ទៅស្រុកស្ទឹងហាវ លុះមកដល់ចំណុចកើតហេតុខាងលើ រថយន្តក៏បានខូច ពេលនោះម្ចាស់រថយន្តហៅជាងមកជួសជុល ពេលជាងមកដល់ភ្លាម ជាងក៏កាច់សោបញ្ឆេះរថយន្ត ស្រាប់តែឆ្លងចរន្តបង្កើតជាផ្កាភ្លើងឆាបឆេះរថយន្តដ៏សន្ធោសន្ធៅតែម្ដងទៅ ករណីខាងលើបណ្ដាលឲ្យខូចខាតរថយន្តទាំងស្រុងតែម្តង ។
លោកអធិការបានបន្តឲ្យដឹងទៀតថា ករណីខាងលើមិនបណ្ដាលឲ្យគ្រោះថ្នាក់ដល់ម្ចាស់រថយន្ត ឬក៏ស្ទះចរាចរណ៍នោះទេ ។
នៅពេលកើតហេតុ ករណីខាងលើនេះ កម្លាំងអធិការដ្ឋាននគរបាលស្រុកស្ទឹងហាវ បានចេញរថយន្ត ដើម្បីជួយអន្តរាគមន៍ភ្លាមៗ ប៉ុន្តែដោយសារតែការឆាបឆេះរថយន្តខាងលើលឿនខ្លាំងពេក គួរឲ្យសោកស្តាយ យើងបានប្រើប្រាស់ទឹកអស់ចំនួន១រថយន្តក្នុងការពន្លត់នៅក្នុងហេតុការណ៍ខាងលើនេះ ។ បច្ចុប្បន្ន ក្រោយកើតហេតុរថយន្តត្រូវបានម្ចាស់ហៅរថយន្តស្ទូចយកទៅដោយខ្លួនឯង ៕
ចែករំលែកព័តមាននេះ