ខេត្តសៀមរាប ៖ លោកអនុសេនីយទោ រឿន សារ៉ាវុធ នាយរងប៉ុស្តិ៍នគរបាលខ្នារសណ្តាយនៃអធិការដ្ឋាននគរបាល ស្រុកបន្ទាយស្រី ត្រូវផ្អាកការងារបណ្តោះអាសន្នសិន ដោយសារបានប្រើហិ.ង្សាលើពលរដ្ឋ ដែលកំពុងធ្វើដំណើររតាមផ្លូវ ។ នេះបើយោងតាមការលិខិតបង្គាប់ការដែលចុះហត្ថលេខាដោយឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប នៅថ្ងៃទី១៦ ខែមិថុនា ឆ្នាំ២០២៤ ។
ការសម្រេចផ្អាកការងារបណ្តោះអាសន្នសិនចំពោះនាយរងប៉ុស្តិ៍នគរបាលខ្នារសណ្តាយរូបនេះធ្វើឡើងបន្ទាប់ពីវីដេអូសកម្មភាពហិ.ង្សាមួយត្រូវបានបង្ហោះចែកចាយនៅលើបណ្តាញសង្គម និងចុះផ្សាយយ៉ាងព្រោងព្រាត តាមបណ្តាសារព័ត៌មាននាចុងសប្តាហ៍នេះ ។
តាមរយៈវីដេអូនោះគេឃើញ លោកអនុសេនីយទោ រឿន សារ៉ាវុធ ជាមួយនឹងកងកម្លាំងបុស្តិ៍ នគរបាលខ្នារសណ្តាយ ជាច្រើនបានកាក់បុរសអ្នកដំណើរដែលបើកម៉ូតូម្នាក់សួរនាំ ។ ក្រោយពីចង្អុលមុខ សម្លុតសួរយ៉ាងតឹងសសៃករ នាយរងប៉ុស្តិ៍រូបនេះ បានទះមួយកំផ្លៀងយ៉ាងពេញទំហឹង និងស្រែកជេរទៅលើបុរសអ្នកដំណើរម្នាក់រូបនេះ មុនពេលដែលអនុញ្ញាតឱ្យបន្តដំណើរទៅមុខ ។
សកម្មហិ.ង្សារបស់មន្ត្រីនគរបាលរូបនេះ ត្រូវបានលោកស្នងការនគរបាលខេត្តសៀមរាប អះអាងនៅក្នុងលិខិតបង្គាប់ថា ជាអំពើល្មើសនឹងបទវិន័យនគរបាលជាតិកម្ពុជា លេខៈ៨៧៣ ប្រក ។ ដោយបង្គាប់ឱ្យផ្អាកការងារបណ្តោះអាសន្នពីឋានៈនាយរងប៉ុស្តិ៍នគរបាលរដ្ឋបាលខ្នារសណ្តាយនៃអធិការដ្ឋាននគរបាលស្រុកបន្ទាយស្រី ហើយតម្រូវឱ្យមកបង្ហាញមុខនៅការិយាល័យ បុគ្គលិករៀងរាល់ម៉ោងធ្វើការ ។
យ៉ាងណាក៏ដោយការសម្រេចដាក់ពិន័យផ្អាកការងារតាមវិន័យកងកម្លាំងនគរបាលជាតិ លោកស្នងការនគរបាលខេត្ត សៀមរាប មិនបានបញ្ជាក់ថា នាយរងប៉ុស្តិ៍ខាងលើនឹងត្រូវប្រឈមនឹងទោសទណ្ឌអ្វីតាមច្បាប់នោះទេ ដែលនាំមហាជនលើបណ្តាញផ្ទុះការវែកញែក និងចោទជាសំណួរជាច្រើន ។
ជាក់ស្តែង តាមរយៈការបង្ហោះព័ត៌មានស្តីពីករណីនេះ នៅលើផេក Koh Santepheap Daily ត្រឹមតែរយៈពេលប៉ុន្មានម៉ោងប៉ុណ្ណោះ បានទាក់ទាញអ្នកលេងហ្វេសបុករាប់រយនាក់ចូលទៅបញ្ចេញមតិថា សមមុខ តែអ្នកខ្លះថា ត្រឹមផ្អាកការងារមិនសម ដកចោលទើបសម មន្ត្រីពាលបែបនេះ! មានមតិជាច្រើនចោទសួរថា វ៉ៃគេគ្រាន់តែផ្អាកការងារ ទោសត្រឹមចំណាត់ការរដ្ឋបាល? ឯណាបទល្មើសព្រហ្មទណ្ឌ ?
ពលរដ្ឋធម្មតា បើវ៉ៃគេរបៀបនេះ អាចមានទោសហិ.ង្សាដោយចេទនា មានស្ថានទម្ងន់ទោស បញ្ជូនសំណុំរឿងឡើងតុលាការ? បើប្រជាជនខុសដាក់ខ្នោះ ហេតុអី ប៉ូលិសខុសផ្អាកការងារ ឬផ្ទេរភារកិច្ច តើការអនុវត្តច្បាប់អនុវត្តមានតម្លាភាពទេ? ប្រសិនបើពលរដ្ធអ្នកវៃសមត្ថកិច្ចវិញ ដល់ម៉ោងប៉ុណ្ណឹងប្រាកដជានៅក្នុងឃុំហើយ គ្រួសារត្រូវរកលុយយកមកសងជំងឺចិត្ត តើឯណាទៅយុត្តិធម៍? តើប្រទេសកម្ពុជាយើងពិតជាគ្មានច្បាប់ដាក់ទោសលើមន្ត្រីប្រើអំពើហិ.ង្សាបែបនេះឬ? ចុះតើលោកអ្នកយល់យ៉ាងណា ?ហើយតើអ្នកច្បាប់បកស្រាយយ៉ាងណា?អត្ថបទ៖ អោម ចែតច័ន្ទណារ៉ា
ចែករំលែកព័តមាននេះ