រាជធានីភ្នំពេញ ៖ នារីម្នាក់ជិះម៉ូតូ១គ្រឿង តាមផ្លូវហើយបានទុកទូរស័ព្ទ១គ្រឿង នៅក្នុងហោប៉ៅខោក្រោយ ខណៈនោះស្រាប់តែចោរម្នាក់ជិះម៉ូតូតាមក្រោយទៅដល់ធ្វើសកម្មភាពឆ.ក់យកបានសម្រេច និងព្យាយាមជិះម៉ូតូគេចខ្លួន ។ ប៉ុន្តែនាងបានជិះម៉ូតូដេញតាម ហើយបានស្រែកថា…
រាជធានីភ្នំពេញ ៖ នារីម្នាក់ជិះម៉ូតូ១គ្រឿង តាមផ្លូវហើយបានទុកទូរស័ព្ទ១គ្រឿង នៅក្នុងហោប៉ៅខោក្រោយ ខណៈនោះស្រាប់តែចោរម្នាក់ជិះម៉ូតូតាមក្រោយទៅដល់ធ្វើសកម្មភាពឆ.ក់យកបានសម្រេច និងព្យាយាមជិះម៉ូតូគេចខ្លួន ។
ប៉ុន្តែនាងបានជិះម៉ូតូដេញតាម ហើយបានស្រែកថា «ចោរៗ» បង្កឲ្យមានការភ្ញាក់ផ្អើល សំណាងល្អ មានអ្នកដំណើរម្នាក់ជិះម៉ូតូបញ្ច្រាស់ទិសឃើញបែបនេះក៏បានបើកម៉ូតូបំបុកម៉ូតូចោរ បណ្ដាលឲ្យដួលទើបអ្នកភូមិនាំគ្នាជួយឃាត់ខ្លួនបានរួចដកហូតយកបានទូរស័ព្ទមកវិញ ។
ហេតុការណ៍នេះបានកើតឡើង កាលពីវេលាម៉ោង១រសៀល ថ្ងៃទី១៦ ខែមិថុនា ឆ្នាំ២០២៤ នៅតាមផ្លូវបេតុងភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យឈ្មោះ ហេង លីហ៊ាង អាយុ១៨ឆ្នាំ បានធ្វើសកម្មភាពឆ.ក់ទូរស័ព្ទ១គ្រឿងម៉ាកIphone11 ពីនារីម្នាក់ឈ្មោះ សយ ស៊ី ណេត អាយុ១៨ឆ្នាំ មុខរបរកម្មការិនីរោងចក្រ ។
អ្នកភូមិត្រពាំងពោធិ៍បាននិយាយថា នៅមុនពេលកើតហេតុនារីរងគ្រោះបានជិះម៉ូតូ១គ្រឿងម៉ាកហុងដាឌ្រីម សេ១២៥ ពណ៍ស ពាក់ស្លាកលេខភ្នំពេញ1JR-4144 ធ្វើដំណើរក្នុងទិសដៅពី ត្បូងទៅជើង ដោយបានទុកទូរស័ព្ទនៅក្នុងហោប៉ៅខោក្រោយ ។ ខណៈនោះជនសង្ស័យបានជិះម៉ូតូម៉ាកហុងដាឃ្លីកពណ៍ស ពាក់ស្លាកលេខភ្នំពេញ1JS-0265 ក្នុងទិសដៅស្របគ្នាតាមពីក្រោយ លុះពេលទៅដល់ត្រង់ចំណុចកើតហេតុបានឆក់យកទូរស័ព្ទរួចព្យាយាមជិះគេចខ្លួន ។
អ្នកភូមិដដែលបានប្រាប់ទៀតថា ភ្លាមៗនោះ ជនរងគ្រោះបានជិះម៉ូតូដេញតាមពីក្រោយនិងស្រែកថា «ចោរៗ» បង្កឲ្យមានការភ្ញាក់ផ្អើលឆោឡោ ហើយបន្តិចក្រោយមកមានអ្នកដំណើរតាមផ្លូវម្នាក់ឃើញនារីរងគ្រោះដេញតាមផងស្រែកថាចោរៗផងបែបនេះ ក៏បានជិះម៉ូតូទៅបំបុកម៉ូតូចោរ បណ្ដាលឲ្យដួលទើបពួកគាត់ដែលជាអ្នកភូមិជួយចាប់ខ្លួនបាន ។
បន្ទាប់មកបានដកហូតបានទូរស័ព្ទត្រឡប់មកវិញ រួចរាយការណ៍ជូននគរបាលប៉ុស្តិ៍ចោមចៅទី៣ ឲ្យទៅយកជននោះ ដើម្បីសាកសួរ និងកសាងសំណុំរឿងចាត់ការតាមច្បាប់តែម្ដង ៕
ចែករំលែកព័តមាននេះ