ADផ្ទាំងផ្សព្វផ្សាយពាណិជ្ជកម្ម

Picture

សួនសត្វ​ភ្នំ​តា​ម៉ៅ ឥឡូវ​មាន​សត្វព្រៃ​ប្រមាណ​ជាជាង៣០០០ក្បាល​ឯណោះ

3 អាទិត្យ មុន

ក្រុម​អ្នក​អភិរក្ស​នៅ​ឧទ្យាន​សួនសត្វ ព្រៃ​ការពារ និង​សួន​ភូតគាម ដែល​គេ​ស្គាល់​ជា​ទូទៅ​ថា​«​ភ្នំ​តា​ម៉ៅ​» ឥឡូវ​មាន​សត្វព្រៃ​ប្រមាណ​ជា ៣០០០ ក្បាល​ឯណោះ ។ លោក ហុង…

ក្រុម​អ្នក​អភិរក្ស​នៅ​ឧទ្យាន​សួនសត្វ ព្រៃ​ការពារ និង​សួន​ភូតគាម ដែល​គេ​ស្គាល់​ជា​ទូទៅ​ថា​«​ភ្នំ​តា​ម៉ៅ​» ឥឡូវ​មាន​សត្វព្រៃ​ប្រមាណ​ជា ៣០០០ ក្បាល​ឯណោះ ។

លោក ហុង សុ​ផា​ន ដែល​ជា​មន្ត្រី​អនុរក្ស​នៅ​សួនសត្វ​នោះ ​បាន​អះអាង​ កាលពី​ថ្ងៃ​ទី​១៤ ខែមិថុនា ឆ្នាំ​២០២៣ ថ្មី​ៗ​នេះ​ថា មន្ត្រី​អនុរក្ស​នៅ​ទី​នេះ ដើម្បី​ធានា​រក្សា​ និង​ការពារ​សត្វ​ទាំង​អស់នេះឲ្យ​បាន​ដិត​ដល់ គឺ​ត្រូវ​បាន​ចែក​ចែក​ភារកិច្ច​គ្នា​ជួយ​ថែ​ និង​បំប៉នក៏​ដូច​ជា​អោយ​ចំណី​សត្វ​ទាំងនោះ ។ លោក​បាន​បញ្ជាក់​ថា« ដូច​ខ្ញុំ គឺ​មាន​ភារៈ​មើល​សត្វ​ក្រពើ ប្រើស ឈ្លូស ឆ្កែ ជាដើម​» ។

លោក​បាន​បន្ត​ទៀត​ថា សត្វ​ទាំងអស់​គួរ​ឲ្យ​ស្រលាញ់ ហើយ​ត្រូវ​បាន​ចិញ្ចឹម​បំប៉ន​យ៉ាង​ដិត​ដល់ ប៉ុន្តែ​សត្វ​ដែល​ត្រូវ​ប្រយ័ត្ន​គឺ​ក្រពើ​ដោយនៅ​សួនសត្វ​ទាំងមូល​មាន​ក្រពើ​សរុប​ប្រមាណ​ជា ២៦៦ ក្បាល​។ លោក​បាន​បញ្ជាក់​ថា «​រៀង​រាល់ពេល​ដែល​ចូល​ទៅ​ឲ្យ​ចំណី​ក្រពើ​ គឺ​ត្រូវ​មាន​គ្នា​ពីរ​នាក់ ហើយ​មួ​យស​ប្តា​ហ៍​យើង​អោយ​វា​ស៊ី​តែ​ម្តង​ទេ» ។

ដោយឡែក លោក សម វឿ​ន ដែល​បាន​ធ្វើការ​នៅ​សួនសត្វ​ប្រមាណ​ជា ២៥ ឆ្នាំ បាន​ឲ្យ​ដឹង​ថា លោក​មាន​ភារៈ​ថែរក្សា​សត្វ​ខ្ទីង តោ ប្រើស រមាំង ជាដើម ។

លោក សាំង សុ​ផាត ជា​ប្រជាពលរដ្ឋ​នៅ​រាជធានី​ភ្នំពេញ ​បាន​ឲ្យ​ដឹង​ថា លោក​ឧស្សាហ៍​នាំ​កូន​ទៅ​ទីនោះ ដោយសារ​មាន​ម្ហូបអាហារ​លក់​ស្រាប់ ហើយ​មិនសូវ​ឆ្ងាយ​ណាមួយ​កូន​តូច​ៗ​ពួក​គេ​ចូល​ចិត្ត​មើល​សត្វ ។ លោក​បាន​បញ្ជាក់​ថា « អូ​ហ៍​! ដូច​កូន​ខ្ញុំ​អី​ពូក​គេ​ចូល​ចិត្ត​បំផុត ដំរី ហើយ​គេ​ចម្លែក​បានឃើញ​ពស់វែករនាម ដែល​យើង​ឭ​តែ​ឈ្មោះ​ផង​ដែរ » ។ លោក​បាន​បន្ត​ទៀត ទីនោះ​មាន​សត្វ​ច្រើន សត្វ​ខ្លះ​មិនមែន​នៅ​ក្នុងស្រុក​ក៏​មាន​ដូច​ជា​អូ​ទ្រី​ស ហើយ​ពពួក​អា​បង្កួយ​យក្ស​ធំ​ៗ​ខ្លះ​ជាដើម ។

ភ្នំ​តា​ម៉ៅ ដែល​មាន​ផ្ទៃដី​សរុប​ប្រមាណ​ជា ២.០២៥ ហិ​កតា មាន​ទីតាំង​ស្ថិត​នៅ​ក្នុងភូមិ​សាស្ត្រ ស្រុក​បាទី ខេត្តតាកែវ គឺជា​កន្លែង​អភិវឌ្ឍន៍​សួន​ភូតគាម​សាស្ត្រ​ដែល​មានពូជ​ឈើប្រណិត និង​មាន​តម្លៃ​សេដ្ឋកិច្ច​ខ្ពស់​, អភិវឌ្ឍន៍ ទៅ​ជា​តំបន់​គោលដៅ​ទេសចរណ៍ធម្មជាតិ វប្បធម៌ និង​ប្រវត្តិសាស្ត្រ ដែល​ផ្ដល់​ការ​ថែរក្សា​សង្គ្រោះ​សត្វព្រៃ ព្យាបាល និង​ស្តារ​លទ្ធភាព​សត្វព្រៃ​, ការ​ធ្វើ​វិបុល​កម្ម​សត្វព្រៃ ប្រភេទ​សត្វ និង​រុក្ខជាតិ​កម្រ ជិត​ផុត​ពូជ​។

ភ្នំ​តា​ម៉ៅ ត្រូវ​បាន​បែងចែក​ជា ៣​តំបន់ ដោយ ទី​១ ជា​តំបន់​ព្រៃ​ការពារ​សម្រាប់​ស្ដារ​លទ្ធភាព​សត្វព្រៃ ជា​តំបន់​សម្រាប់​ធានា​ការ​ធ្វើ​វិបុល​កម្ម​សត្វព្រៃ ការ​អភិរក្ស និង​ការ​អភិវឌ្ឍ​ធនធានធម្មជាតិ​ប្រកបដោយ​និរន្តរភាព ដែល​មាន​ផ្ទៃដី​ទំហំ ១.០២១​ហិ​កតា​ ។ ទី​២ តំបន់​សួន​ភូតគាម​ឈើប្រណិត​ភ្នំ​តា​ម៉ៅ ជា​តំបន់​សម្រាប់​ធានា​ថែរក្សា​កូន​ឈើ និង​អភិវឌ្ឍ​ជា​សួន ភូតគាម មានពូជ​ឈើប្រណិត និង​សោភ័ណ​ភាព ដែល​មាន​ផ្ទៃដី​ទំហំ៥៣០​ហិ​កតា និង​ទី​៣ តំបន់​ឧទ្យាន​សួនសត្វ​ភ្នំ​តា​ម៉ៅ​ជា​តំបន់​សម្រាប់​ថែរក្សា​សត្វព្រៃ ព្យាបាល សង្គ្រោះ​សត្វព្រៃ អប់រំ​ផ្សព្វ ផ្សាយ និង​បម្រើសេវា​ទេសចរណ៍ ដែល​មាន​ផ្ទៃដី​ទំហំ ៤៧៤​ហិ​កតា​។

សួនសត្វ​ភ្នំ​តា​ម៉ៅ​មាន​ចម្ងាយ ផ្លូវ​ប្រមាណ​ជា​៤០​គីឡូម៉ែត្រ​ពី​រាជធានី​ភ្នំពេញ​ធ្វើ​ដំណើរ​តាម​ផ្លូវជាតិ​លេខ​២​រួច​បត់​ស្តាំ​តាម​ផ្លូវលំ​ចម្ងាយ​៥​គីឡូម៉ែត្រ ៕

អត្ថបទសរសេរ ដោយ

កែសម្រួលដោយ