អស់លោកជ្រាបទេ? ខេត្តកំពង់ចាមមានភ្នំតូចធំជាង៤០
- កំពង់ចាម
ខេត្តកំពង់ចាម ៖ នៅខេត្តកំពង់ចាម ភ្នំដែលកើតឡើងតាមធម្មជាតិ និងភ្នំខ្លះមានការតំណាល
ខេត្តកំពង់ចាម ៖ នៅខេត្តកំពង់ចាម ភ្នំដែលកើតឡើងតាមធម្មជាតិ និងភ្នំខ្លះមានការតំណាលក្នុងរឿងនិទានផងនោះ ត្រូវបានគេដឹងថា នៅតាមក្រុង-ស្រុកចំនួន១០នៃខេត្តមួយនេះ មានភ្នំទាំងអស់ជាង៤០ ។
ប៉ុន្តែ ភ្នំដែលមានអ្នកទេសចរជាតិនិងអន្តរជាតិតែងនិយមទៅលេងកម្សាន្តជាមនោរម្យនោះ ជាពិសេសក្នុងរដូវបុណ្យទាន និងនៅថ្ងៃឈប់សម្រាក មាន ភ្នំប្រុសភ្នំស្រី ភ្នំហាន់ជ័យ ក្នុងស្រុកកំពង់សៀម ភ្នំបែកពាង ភ្នំបាធាយ ក្នុងស្រុកបាធាយ ។
មន្ត្រីអាជ្ញាធរស្រុកបាធាយនិយាយថា នៅស្រុកមួយនេះមានភ្នំតូចភ្នំធំសរុបទាំងអស់ប្រមាណ៣០ ក្នុងនោះមាន ភ្នំធំត្រូវបានគេធ្វើអាជីវកម្មកាយយកថ្មរាល់ថ្ងៃដោយមានច្បាប់អនុញ្ញាត ។ ភ្នំបែកពាង ជាទីកម្សាន្តដែលមានអ្នកទៅលេងមិនថារដូវណានោះទេ ។ ភ្នំតាព្រៀង ភ្នំតាំងិល១ ភ្នំតាងិល២ ព្រមទាំងមានភ្នំតូចៗជាច្រើនទៀត នៅតាមឃុំនានាក្នុងស្រុកបាធាយ ។
លោក ស៊ាន សុគុណ ប្រធានមន្ទីរទេសចរណ៍ខេត្ត ថ្លែងថា នៅស្រុកជើងព្រៃមានភ្នំចំនួន២ គឺភ្នំប្រុសនិងភ្នំស្រី ឬហៅថា ភ្នំជើងព្រៃ ។ ភ្នំនេះល្បីល្បាញណាស់នៅទឹកដីខេត្តកំពង់ចាម មិនខុសពីបទចម្រៀងរបស់អធិរាជសំឡេងមាស ស៊ីន ស៊ីសាមុត ដែលច្រៀងថា «ភ្នំប្រុស ភ្នំស្រី ដីកំពង់ចាម ប្រឡាក់ជាប់ស្នាមដានជីវិតខ្ញុំ» ។
ភ្នំជើងព្រៃ ឬ ភ្នំប្រុសភ្នំស្រី មានប្រាសាទភ្នំជើងព្រៃ និងជារមណីយដ្ឋានទេសចរណ៍វប្បធម៌និងធម្មជាតិ ស្ថិតនៅក្នុងភូមិគោករវៀង ឃុំគោករវៀង ស្រុកជើងព្រៃ មានចម្ងាយ៥៥គីឡូម៉ែត្រ ពីក្រុងកំពង់ចាម ។ ភ្នំជើងព្រៃ មានទីតាំងនៅខាងកើតផ្សារផ្អាវប្រមាណ៣គីឡូម៉ែត្រ ខាងជើងផ្លូវជាតិលេខ៦ ប្រមាណ ២ ៣០០ម៉ែត្រ ។
តាមការសិក្សាស្រាវជ្រាវរបស់អ្នកបុរាណវិទ្យា ប្រាសាទភ្នំជើងព្រៃនេះ ត្រូវបានកសាងឡើង
ក្នុងរាជ្យព្រះបាទសុរិយវរ្ម័នទី១ នាសតវត្សរ៍ទី១១ ឧទ្ទិសចំពោះព្រះសិវ: ក្នុងលទ្ធិព្រហ្មញ្ញសាសនា ។ ប្រាសាទនេះ កសាងអំពីថ្មបាយក្រៀមនិងថ្មភក់ ដោយមានកំពែងព័ទ្ធជុំវិញ ។
ភ្នំជើងព្រៃ ចែកចេញជា២ដាច់ពីគ្នា គឺមួយស្ថិតនៅខាងកើតហៅថា ភ្នំស្រី ឬភ្នំធំ រីឯខាងលិច
ហៅថាភ្នំប្រុស ឬភ្នំព្រះបាទ ដូចរឿងភ្នំប្រុសភ្នំស្រី នៅស្រុកកំពង់សៀមដែរ ។
មានរឿងតំណាលថា កាលពីដើម មនុស្សប្រុសនិងមនុស្សស្រីបានភ្នាល់គ្នាលើកភ្នំនេះ ប្លែកតែខាងភ្នំជើងព្រៃ រណ្ដៅដីនៅភ្នំស្រីដែលខាងស្រីជីកយកមកធ្វើភ្នំបានក្លាយទៅជាស្រះធំមួយមានទឹកហូរខួបប្រាំងខួបវស្សា ហៅថាស្រះទឹកព្រះ ។ រីឯរណ្ដៅនៅជិតភ្នំប្រុសដែលខាងប្រុស ជីកយកមកធ្វើភ្នំក្លាយជាស្រះទឹកធំមួយដែរ ប៉ុន្តែគ្មានទឹកទេ ទោះបីខែវស្សាមានភ្លៀងធ្លាក់ខ្លាំងយ៉ាងណាក៏ដោយ ហើយគេឲ្យឈ្មោះថាស្រះកំពែងស្ងួត ។
សព្វថ្ងៃ ស្រះទឹកព្រះនៅល្អដូចដើម មានទឹកថ្លាឈ្វេង ជាទីស្នាក់អាស្រ័យនៃពួកមច្ឆជាតិ និងឈូកដុះប្រកបដោយផ្កាដេរដាស ប្រៀបបាននឹងបឹងតូចមួយ ។ នៅលើភ្នំស្រីខាងមុខ មានដានជើងមនុស្សលើថ្ម ដែលអ្នកស្រុកហៅថាដានជើងតាព្រេង ។ ចំណែកនៅទិសឦសាន មានដីរាបស្មើគេហៅថាកន្លែងឃុនឆាង ។ ម្យ៉ាងទៀតនៅជុំវិញបរិវេណ មានកំពែងធ្វើអំពីថ្មបាយក្រៀម ដែលមួយៗមានទំហំ០,៤ម៉ែត្រគុណនឹង០,៦ម៉ែត្រ ។ រមណីយដ្ឋាននេះមានទេសភាពស្រស់បំព្រង ខ្យល់អាកាសបរិសុទ្ធ ធ្វើឲ្យភ្ញៀវទេសចរ៍ចូលចិត្តទៅកម្សាន្តនិងទស្សនា ព្រមទាំងទទួលទានអាហារនៅទីនោះទៀតផង ។
នៅស្រុកកំពង់សៀម មានភ្នំចំនួន៣គឺ ភ្នំប្រុស ភ្នំស្រី និង ភ្នំហាន់ជ័យ រួមទាំងភ្នំតូចៗមួយចំនួនទៀត ។
ភ្នំប្រុសភ្នំស្រី ជារមណីយដ្ឋានវប្បធម៌ប្រវត្តិសាស្ត្រ ស្ថិតនៅភូមិត្រពាំងចារ្យ ឃុំក្រឡា ខាងលិចក្រុងកំពង់ចាមប្រមាណ៧គីឡូម៉ែត្រ ខាងជើងផ្លូវជាតិលេខ៧ ។ រមណីយដ្ឋាននេះ មានរឿងរ៉ាវទាក់ទងនឹងរឿងព្រេងបុរាណខ្មែរគឺរឿងភ្នំប្រុសភ្នំស្រី ។
វត្តភ្នំប្រុសមានឈ្មោះជាផ្លូវការថា«វត្តសុវណ្ណគិរីរតនៈភ្នំប្រុស» ហើយនៅខាងឆ្វេងដៃមានភ្នំមួយទៀតកម្ពស់ប្រហែល១០០ម៉ែត្រ ដែលមានកំពូលស្រួចហៅថាភ្នំស្រី ។ ភ្នំប្រុសទាបជាងភ្នំស្រី គឺមានកម្ពស់ប្រហែល៣០ម៉ែត្រ ។ ភ្នំស្រីមានកំពូលស្រួចអាចឡើងតាមជណ្ដើរដែលមានចំនួន ៣០៨កាំ ។
ភ្នំហាន់ជ័យ មានឈ្មោះជាផ្លូវការថា ភ្នំគិរី មានទីតាំងស្ថិតនៅប៉ែកខាងកើតខេត្តកំពង់ចាម និងប៉ែកខាងលិចទន្លេមេគង្គ ។ ភ្នំនេះស្ថិតនៅក្នុងភូមិហាន់ជ័យ ឃុំហាន់ជ័យ ស្រុកកំពង់សៀម មានចម្ងាយប្រមាណ១៨គីឡូម៉ែត្រ តាមផ្លូវទឹក និង២០គីឡូម៉ែត្រតាមផ្លូវគោក ពីទីរួមខេត្តកំពង់ចាម ។
ភ្នំហាន់ជ័យ មានកម្ពស់ ៦៣ម៉ែត្រ ។ នៅលើភ្នំនេះ មានព្រះវិហារនិងប្រាសាទគុកនៅខាងត្បូង ដែលស្ថាបនាឡើងអំពីឥដ្ឋតាន់បុរាណ មានទំហំ៧ម៉ែត្រ៤ជ្រុង និងកម្ពស់១២ម៉ែត្រ កសាងឡើងក្នុងសតវត្សរ៍ទី៧ រជ្ជកាលព្រះបាទឥសានវរ្ម័នទី១ ។ បច្ចុប្បន្នប្រាសាទនេះមានសភាពទ្រុឌទ្រោមទៅហើយ ។
ក្នុងចំណោមប្រាសាទឥដ្ឋនិងថ្មជាច្រើន ដែលមិនអាចកំណត់ចំនួនឲ្យបានប្រាកដមាន ប្រាសាទតែ៣ទេ ដែលនៅរក្សារូបរាងល្អ ស្ថិតក្នុងបរិវេណនៃវត្តហាន់ជ័យបច្ចុប្បន្ន ។ ក្រៅពីនេះគេឃើញតែតួប្រាសាទ និងគ្រឹះឥដ្ឋនៃសំណង់ប្រាសាទបុរាណតែប៉ុណ្ណោះ ។ ក្រុមប្រាសាទទាំងនោះ ត្រូវបានកសាងឡើងក្នុងអន្តរកាលសម័យនគរភ្នំ និងចេនឡា ។ ក្រសួងវប្បធម៌និងវិចិត្រសិល្បៈ បានជួសជុលប្រាសាទហាន់ជ័យខាងជើងហៅប្រាសាទគុកព្រះធាតុនៅអំឡុងឆ្នាំ១៩៩៤ ។
នៅស្រុកស្ទឹងត្រង់ ត្រូវបានអាជ្ញាធរឲ្យដឹងថា មានភ្នំចំនួន៣ ក្នុងនោះភ្នំមន្ទីរ ត្រូវបានឈូស
ឆាយសម្រាប់ផ្លូវធ្វើដំណើរតាមដងទន្លេមេគង្គ ហើយភ្នំនេះស្ទើរតែបាត់រូបរាងទៅហើយ ។
ដូចគ្នានេះដែរ ភ្នំអំពិលក៏ត្រូវបានឈូសឆាយសម្រាប់ធ្វើផ្លូវពីស្ទឹងត្រង់ឆ្ពោះមកស្រុកចំការលើ ដែលបច្ចុប្បន្នស្ថាបនារួចរាល់ និងភ្នំមួយទៀតគឺភ្នំព្រែកសង្កែ ។
នៅស្រុកចំការលើមានភ្នំចំនួន២ គឺភ្នំប្រុសភ្នំស្រី ឬហៅថាភ្នំទែត ស្ថិតនៅឃុំបុសខ្នុរ ។នៅទីនោះ មានវត្តអារាមសម្រាប់ព្រះសង្ឃគង់នៅ ហើយរាល់រដូវភ្ជុំបិណ្ឌ និងចូលឆ្នាំថ្មីប្រពៃណីជាតិ តែងមានអ្នកទៅលេងកម្សាន្តយ៉ាងច្រើនកុះករ ។ ចំណែកនៅក្រុងកំពង់ចាម ស្រុកកងមាស និងស្រុកកោះសូទិន មិនមានភ្នំទេ ៕
ចែករំលែកព័តមាននេះ