ADផ្ទាំងផ្សព្វផ្សាយពាណិជ្ជកម្ម

Picture

ច្បាប់មិនឱ្យប្រើម៉ាស៊ីនអូសលៀសក្នុងរដូវបិទនេសាទទេ

1 ខែ មុន
  • ពោធិ៍សាត់

ខេត្តពោធិ៍សាត់ ៖ ប្រជា​នេសាទ​រស់នៅ​លើ​ផ្ទៃ​ទឹក​បឹង​ទន្លេសាប ប្រមាណ​ជាង​៦០​គ្រួសារ មក​ពី​ខេត្តសៀមរាប កំពង់ធំ កំពង់ឆ្នាំង និង​ខេត្តពោធិ៍សាត់ កាលពី​ថ្ងៃ​ទី​១១ ខែមិថុនា…

ខេត្តពោធិ៍សាត់ ៖ ប្រជា​នេសាទ​រស់នៅ​លើ​ផ្ទៃ​ទឹក​បឹង​ទន្លេសាប ប្រមាណ​ជាង​៦០​គ្រួសារ មក​ពី​ខេត្តសៀមរាប កំពង់ធំ កំពង់ឆ្នាំង និង​ខេត្តពោធិ៍សាត់ កាលពី​ថ្ងៃ​ទី​១១ ខែមិថុនា ឆ្នាំ​២០២៤ បាន​មក​ជួបជុំ​គ្នា​នៅ​ក្នុង​បរិវេណ​សាលាខេត្ត​ពោធិ៍សាត់ ដើម្បី​សុំ​ឲ្យ​ឯកឧត្តម​អភិបាលខេត្ត ជួយ​អន្តរា​គមន៍​ដល់​ពួក​គាត់​បាន​ប្រើប្រាស់​ឧបករណ៍​ម៉ាស៊ីន​អូស​លៀស​ក្នុង​រដូវ​បិទ​នេសាទ តែ​ឯកឧត្តម​អភិបាលខេត្ត​មិន​អនុញ្ញាត​នោះ​ទេ ព្រោះ​វា​ខុស​នឹង​ច្បាប់​ជលផល ដែល​អនុញ្ញាត​ឱ្យ​បាន​តែ​លក្ខណៈ​អូស​ដៃ​ប៉ុណ្ណោះ ។

លោក ភុំ វិមល នាយ​ខណ្ឌ​រដ្ឋបាល​ជលផល​ពោធិ៍សាត់ បាន​ជម្រាប​ទៅ​ប្រជា​នេសាទ​ទាំងអស់​ដែល​បាន​មក​តវ៉ា​នេះ​ថា ក្នុង​នាម​លោក​ជា​មន្ត្រី​ជំនាញ​ផ្នែក​រដ្ឋបាល​ជលផល គឺ​ពុំ​អនុញ្ញាត​ឱ្យ​បងប្អូន​រកស៊ី​ប្រើ​ម៉ាស៊ីន​អូស​លៀស ក្នុង​រដូវ​បិទ​នេសាទ​ដូច​ការ​ស្នើ​សុំ​នេះ​ឡើយ ហើយ​ច្បាប់រដ្ឋបាល​ជលផល​នឹង​ចាត់វិធានការ​យ៉ាង​តឹង​រឹង​បំផុត ។

ម្យ៉ាងវិញទៀត ចំពោះ​លៀស​តូច​ៗ គឺ​ហាម​ដាច់ខាត បើសិនជា​ដឹក​តាម​រថយន្ត​យក​ទៅ​លក់​នៅ​ប្រទេស​វៀតណាម នឹង​ត្រូវ​ចាប់​យក​ទាំង​រថយន្ត​នោះ​ទៀត ។ លោកនាយ​ខណ្ឌ​ជលផល​ពោធិ៍​សាត់​បន្ត​ទៀត​ថា ក្នុង​រដូវ​បិទ​នេសាទ​នេះ ច្បាប់​អនុញ្ញាត​បាន​តែ​ឧបករណ៍​អូស​ដោយ​ដៃ ក្រឡា​ពីរ​ហ៊ុន​កន្លះ​ឡើង​ទៅ​តែ​ប៉ុណ្ណោះ ដែល​ចេញ​ដោយ​ក្រសួងកសិកម្ម រុក្ខា​ប្រមាញ់ និង​នេសាទ ។

លោក​គិត​ថា រដ្ឋបាល​ខេត្ត​មិន​អាច​ជួយ​អន្តរាគមន៍​បាន​ទេ ព្រោះ​ច្បាប់​ធំ​ជាង​រដ្ឋបាល​ខេត្ត​ទៅ​ទៀត ។ លោក​សូម​អង្វរ​ទៅ​ប្រជាពលរដ្ឋ​វិញ មេត្តា​ឈប់​ស្រមើស្រមៃ​សុំ​អន្តរាគមន៍​ពី​អាជ្ញាធរ​ខេត្ត​បែប​នេះ​តទៅ​ទៀត ហើយ​ការ​ការពារ​ទាំងឡាយ​នេះ គ្មាន​យក​ទៅ​ណា ​នោះ​ទេ គឺ​សម្រាប់​ការ​ចិញ្ចឹម​ឆ្នាំងបាយ​បងប្អូន​អ្នកនេសាទ​ប៉ុណ្ណោះ ។

បើ​ទោះ​រដូវ​នេះ​ជា​រដូវ​បិទ​នេសាទ​ក៏​ដោយ​ចុះ តែ​បច្ចុប្បន្ន​គេ​នៅ​តែ​សង្កេត​ឃើញ​ឈ្មួញ​រកស៊ី​ដឹក​លៀស​ខុសច្បាប់​មួយ​ចំនួន នៅ​តែ​បន្ត​ដឹក​លៀស​តាម​ទូក​យក​មក​ដឹក​បន្ត​តាម​រថយន្ត នៅ​ក្នុងភូមិ​សាស្ត្រ​ខេត្តកំពង់ឆ្នាំង​ជា​បន្តបន្ទាប់ ស្ទើរតែ​រៀង​រាល់​យប់​មាន​រាប់​តោន ខណៈ​មន្ត្រី​ជំនាញ​អះអាង​ថា នេះ​ជា​បទល្មើស​ខុសច្បាប់ ហើយ​ក៏​មិន​មាន​មន្ត្រី ឬ​អាជ្ញាធរ​ណា​អនុញ្ញាត​ឱ្យធ្វើ​ដូច្នោះ​ឡើយ ។ ចំពោះ​ករណី​ការ​ដឹក​ជញ្ជូន​លៀស​ខាងលើ​នេះ មន្ត្រី​រដ្ឋបាល​ជលផល​កំពុង​តាម​ឃ្លាំមើល និង​ចាត់ការ​ហើយ ។

ករណី​ដែល​ឈ្មួញ​នៅ​តែ​បន្ត​ដឹក​លៀស​យក​មក​ឡើង​រថយន្ត នៅ​ក្នុងភូមិ​សាស្ត្រ​ខេត្តកំពង់ឆ្នាំង​ជា​បន្តបន្ទាប់​ស្ទើរ​រាល់​យប់ ក្នុង​រដូវ​បិទ​នេសាទ​ដូច​ខាងលើ​នេះ ត្រូវ​បាន​ប្រជាពលរដ្ឋ​ចោទ​ជា​សំណួរ​ថា ហេតុ​ដូច​ម្ដេច​ក៏​ឈ្មួញ​ទាំងនេះ​ហ៊ាន​ប្រព្រឹត្ត​ទ​ង្វើ​ផ្ទុយ​ទៅ​នឹង​ច្បាប់ ស្ដី​ពី​ជលផល ពិសេស​គឺ​ការ​ធ្វើ​សកម្មភាព​ដឹក​លៀស​មាន​លក្ខណៈ​ទ្រង់ទ្រាយ​ធំ ដោយ​ដឹក​តាម​រថយន្ត​ធុន​ធំ​មាន​ចំណុះ​រាប់​តោន ដោយ​គេ​បាន​ធ្វើ​សកម្មភាព​នៅ​ក្នុង​រដូវ​បិទ​នេសាទ​ទៀត​ផង តើ​គេ​អាច​ធ្វើ​បាន​ដោយ​របៀប​ណា ? ករណី​នេះ ពួក​គាត់​បាន​រាយការណ៍​ថា ភូមិសាស្ត្រ​ដែល​ត្រូវ​បាន​ក្រុម​ឈ្មួញ​ដឹក​លៀស​យក​មក​ឡើង​រថយន្ត​ខាងលើ​នេះ ទី​១-​ស្ថិត​នៅ​ចំណុច​ព្រែក​ក្រពើ​ពុល ក្នុង​ឃុំ​ស្វាយ​ជ្រុំ ស្រុក​រលាប្អៀរ និង​ចំណុច​ទី​២-​ឡើង​នៅ​ចំណុច​ចុង​កោះ ក្នុងភូមិ​ទី​៧ សង្កាត់​ខ្សា​ម ក្រុង​កំពង់ឆ្នាំង ។

ប្រជាពលរដ្ឋ​បាន​សំណូមពរ​ដល់​មន្ត្រី​ជំនាញ អាជ្ញាធរ​មូលដ្ឋាន សមត្ថកិច្ច​ពាក់ព័ន្ធ សូម​អនុវត្ត​ច្បាប់​ឲ្យ​បាន​ម៉ឺងម៉ាត់ និង​ឱ្យ​បាន​ស្មើភាព​គ្នា ជា​ពិសេស គឺ​អនុវត្ត​ឲ្យ​បាន​ត្រឹមត្រូវ​ទៅ​តាម​ច្បាប់ ស្ដី​ពី​ជលផល​ដែល​មាន​ស្រាប់ ដើម្បី​ការពារ និង​អភិរក្ស​ធនធានធម្មជាតិ​ក្នុង​បឹង​ទន្លេសាប ។ ដែល​បច្ចុប្បន្ន​នេះ មាន​ស្ថានភាព​កាន់តែ​ហោចទៅ​ៗ គួរ​ឱ្យ​បារម្ភ ។

ជុំវិញ​ករណី​ដឹក​លៀស​តាម​រថយន្ត ក្នុង​រដូវ​បិទ​នេសាទ​ដោយ​ខុសច្បាប់​ខាងលើ​នេះ លោក លី ឡា នាយ​ខណ្ឌ​រដ្ឋបាល​ជលផល​កំពង់ឆ្នាំង បាន​ប្រាប់​បណ្ដាញ​ព័ត៌មាន​មួយ​នៅ​រសៀល​ថ្ងៃ​ទី​១១ ខែមិថុនា ឆ្នាំ​២០២៤​ថា លោក​បាន​ចាត់​ឱ្យ​លោក តាត សី​ហាក់ នាយ​ផ្នែក​រដ្ឋបាល​ជលផល​កំពង់ឆ្នាំង ចុះ​ទៅ​ពិនិត្យ និង​ចាត់ការ​ម្ដង​ហើយ តែ​អម្បាញ់មិញ​នេះ មាន​គេ​រាយការណ៍​មក​លោក​ថា មាន​លៀស​ឡើង​ទៀត​ហើយ លោក​ក៏​បាន​ចាត់​ឲ្យ​លោក តាត សី​ហាក់ ទៅ​ពិនិត្យ​មើល​ជាក់ស្ដែង​ម្ដងទៀត ។
លោក តាត សី​ហាក់ នាយ​ផ្នែក​រដ្ឋបាល​ជលផល​កំពង់ឆ្នាំង ក៏​បាន​ប្រាប់​បណ្ដាញ​ព័ត៌មាន​ដដែល នៅ​ល្ងាច​ថ្ងៃ​ទី​១១ ខែមិថុនា ឆ្នាំ​២០២៤​ថា បើ​តាម​សេចក្តីរាយការណ៍​បាន​បញ្ជាក់​ថា លៀស​មាន​ឡើង​២​ចំណុច ។

ចំពោះ​ការ​ដឹក​ជញ្ជូន​លៀស​ធ្វើ​អាជីវកម្ម​ខាងលើ​នេះ លោក​បញ្ជាក់​ថា ប្រសិនបើ​លៀស​នោះ​មាន​ទំហំ​តូច​ល្អិត មាន​ទំហំ​ក្រោម​ក្រឡា​២​ហ៊ុន​កន្លះ លោក​មិន​អនុញ្ញាត​ឱ្យ​ដឹក​ចេញ​បាន​ទេ គឺ​ត្រូវ​យក​លៀស​នោះ​ចាក់​ចូល​ទៅ​ក្នុង​ទន្លេ​វិញ ។

ចំណែក​លៀស​ដែល​មាន​ទំហំ​ធំ​ជាង​ក្រឡា​២​ហ៊ុន​កន្លះ​ឡើង​ទៅ គឺ​លៀស​ដែល​អាច​យក​ស្ងោរ ឬ​ក៏​ហាល​ហូប​បាន គឺ​មិន​មានការ​ហាមឃាត់​នោះ​ឡើយ ។ ចំពោះ​រថយន្ត​ដឹក​ជញ្ជូន​លៀស ប្រសិនបើ​មានច្បាប់​អនុញ្ញាត ឬ​មាន​អាជ្ញាប័ណ្ណ​ធ្វើ​អាជីវកម្ម​ត្រឹមត្រូវ ក៏​មិន​ត្រូវ​បាន​ហាមឃាត់​នោះ​ដែរ តែបើ​រថយន្ត​នោះ​មិន​មានច្បាប់ ឬ​អាជ្ញាប័ណ្ណ​ធ្វើ​អាជីវកម្ម​នោះ​ទេ គឺ​ត្រូវ​ធ្វើការ​ផាកពិន័យ​អន្តរ​ការ ។
ប៉ុន្តែ​បើ​តាម​ពាក្យ​ចចាមអារ៉ាម​ថា រដូវ​បិទ​នេសាទ ជា​រដូវ​ហែ​កឋិន​ចូល​មន្ត្រី​ជលផល​រាល់​ៗ​ឆ្នាំ​…​ហេ​! ហេ​!

អត្ថបទសរសេរ ដោយ

កែសម្រួលដោយ