រាជធានីភ្នំពេញ ៖ រាជរដ្ឋាភិបាលកម្ពុជា តាមរយៈក្រសួងមហាផ្ទៃ និងស្ថាប័នពាក់ព័ន្ធនានា មានយុទ្ធសាស្ត្រថ្មីមួយ ដើម្បីប្រយុទ្ធប្រឆាំងនឹងបញ្ហាគ្រឿងញៀន គឺកំពុងរៀបចំ នូវប្រព័ន្ធទិន្នន័យគ្រប់គ្រងអ្នកពាក់ព័ន្ធនឹងសារធាតុញៀន ដោយប្រមូលទិន្នន័យ…
រាជធានីភ្នំពេញ ៖ រាជរដ្ឋាភិបាលកម្ពុជា តាមរយៈក្រសួងមហាផ្ទៃ និងស្ថាប័នពាក់ព័ន្ធនានា មានយុទ្ធសាស្ត្រថ្មីមួយ ដើម្បីប្រយុទ្ធប្រឆាំងនឹងបញ្ហាគ្រឿងញៀន គឺកំពុងរៀបចំ នូវប្រព័ន្ធទិន្នន័យគ្រប់គ្រងអ្នកពាក់ព័ន្ធនឹងសារធាតុញៀន ដោយប្រមូលទិន្នន័យ ការកំណត់អត្តសញ្ញាណរបស់ពួកគេ ហើយក៏មានឈានទៅដល់បន្ថយ នូវសិទ្ធិមួយចំនួន របស់អ្នកប្រព្រឹត្តិបទល្មើសគ្រឿងញៀន និងអ្នកពាក់ព័ន្ធអាចនឹងឈានដល់មិនអាចចូលធ្វើបានងារផងដែរ ។
លោក ទូច សុខៈ អ្នកនាំពាក្យរង ក្រសួងមហាផ្ទៃ បានឲ្យដឹងនៅថ្ងៃទី១២ ខែមិថុនា ឆ្នាំ២០២៤ ថា ប្រព័ន្ធទិន្នន័យគ្រប់គ្រងអ្នកពាក់ព័ន្ធសារធាតុញៀន រហូតមកដល់ពេលនេះ សម្រេចការរៀបចំតម្លើងបានប្រមាណជាង ៩០ភាគរយហើយ គ្រោងនឹងដាក់ឲ្យដំណើរការ នាពេលឆាប់ៗខាងមុខ ដើម្បីងាយស្រួលដល់ការប្រយុទ្ធប្រឆាំង នឹងបញ្ហាគ្រឿងញៀន ។
លោកបានលើកឡើងថា សម្រាប់គោលបំណង នៃការរៀបចំប្រព័ន្ធនេះឡើង ដើម្បីប្រមូលទិន្នន័យអ្នកពាក់ព័ន្ធគ្រឿងញៀន មានទាំងប្រើប្រាស់ ជួញដូរ រក្សាទុក ចរាចរចែកចាយផ្សេងៗ ដើម្បីលើកផែនការប្រយុទ្ធប្រឆាំងនឹងគ្រឿងញៀន មួយទៀត ដើម្បីកំណត់ចំណាំបុគ្គលពាក់ព័ន្ធ ក្នុងការដាក់ទណ្ឌកម្មពួកគេ មានទាំងផ្នែករដ្ឋបាលផ្សេងៗ បន្ថយសិទ្ធិមួយចំនួន ហើយប្រព័ន្ធនេះ ក៏អាចជួយបំភ័យ អ្នកពាក់ព័ន្ធគ្រឿងញៀនទាំងអស់នោះ ឲ្យមានការខ្លាចរអា មិនប្រព្រឹត្តិបទល្មើសគ្រឿងញៀននេះ ។
គ្រឿងញៀន គឺជាបញ្ហាចម្បងមួយ ដែលរាជរដ្ឋាភិបាល អាណត្តិទី៧ កំពុងមានការគិតគូរយ៉ាងខ្លាំង ហើយមិនត្រឹមតែប៉ុណ្ណោះ សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានដាក់ចេញយុទ្ធនាការបោសសំអាតបញ្ហាគ្រឿងញៀននៅតាមក្រសួងស្ថាប័នរដ្ឋ គឺត្រូវមានការពិនិត្យរកសារធាតុញៀន លើមន្ត្រីរាជការ ហើយបើរកឃើញមន្ត្រីណាមានជាប់ពាក់ព័ន្ធ គឺត្រូវដកចេញពីក្របខណ្ឌ ។
ជាការកត់សម្គាល់ បន្ទាប់ពីបទបញ្ជាដាច់ណាត់នេះ តាមក្រសួងស្ថាប័ន បានពិនិត្យរកសារធាតុញៀនមន្ត្រីរាជការ ក្នុងស្ថាប័នរបស់ខ្លួនជាបន្តបន្ទាប់ ហើយបានរកឃើញជាហូរហែរ និងត្រូវបានដកចេញពីក្របខណ្ឌ ។
អ្នកនាំពាក្យរងក្រសួងមហាផ្ទៃ បានផ្ញើសារផ្តាំទៅក្រុមយុវជនកុំឲ្យពាក់ព័ន្ធបទល្មើសគ្រឿងញៀន ព្រោះកាលណាតែពាក់ព័ន្ធហើយ នឹងបញ្ចូលឈ្មោះទៅក្នុងប្រព័ន្ធទិន្នន័យរបស់ក្រសួងមហាផ្ទៃ ខណៈប្រព័ន្ធនឹងក្រសួងកំពុងរៀបចំដំណើរការ ។
លោកថា ទិន្នន័យនេះ នឹងបញ្ចូលឈ្មោះអ្នកពាក់ព័ន្ធគ្រឿងញៀន ហើយលទ្ធផលអវិជ្ជមាន នៅពេលដែលយុវជនចង់ដាក់ពាក្យបម្រើការងារនៅតាមក្រសួង-ស្ថាប័នរដ្ឋ និងអង្គការជាដើម គេនឹងអាចចូលទៅក្នុងទិន្នន័យតម្កល់ទុកនៅក្រសួងមហាផ្ទៃ ដើម្បីចង់ដឹងពីប្រវត្តិផ្ទាល់ខ្លួន ហើយបើគេចូលទៅឃើញឈ្មោះហើយ នឹងប្រឈមហានិភ័យ ដោយនឹងមិនទទួលឲ្យចូលធ្វើការនោះទេ ។
ការផ្ញើសារដាស់តឿនរបស់អ្នកនាំពាក្យរងក្រសួងមហាផ្ទៃនេះ ធ្វើឡើងក្រោយបង្ក្រាបក្មេងទំនើង៦៨ករណី ឃាត់ខ្លួនជាង ៣០០នាក់ ក្នុងរយៈពេល ៧ថ្ងៃកន្លងមកនេះ ។
គួរបញ្ជាក់ថា ឆ្នាំ២០២៣កន្លងទៅនេះ កម្លាំងសមត្ថកិច្ច បង្ក្រាបបទល្មើសគ្រឿងញៀន បានចំនួន ៧ពាន់ករណី ហើយរឹបអូសបាននូវសាធាតុញៀនខុសច្បាប់ បានចំនួនជាង ៣តោនផងដែរ ៕
ចែករំលែកព័តមាននេះ