ទីក្រុងហាណូយ៖ ប្រធានាធិបតីវៀតណាមដែលទើបតែស្បថចូលកាន់តំណែងថ្មីៗចាប់ផ្ដើមបញ្ចេញសារនយោបាយជាបណ្ដើរៗហើយពាក់ព័ន្ធនឹងការដោះស្រាយបញ្ហាជម្លោះបូរណភាពទឹកដីនៅសមុទ្រចិនខាងត្បូង។ ក្នុងនាមជាអ្នកជំនាញផ្នែកនគរបាល និងសន្តិសុខជាតិ លោកតូឡាមសង្ឃឹមថាបញ្ហាជម្លោះដែនសមុទ្ររវាងវៀតណាម និងចិនអាចដោះស្រាយបានល្អ។
នៅថ្ងៃអង្គារនេះ លោកតូឡាមប្រាប់ឯកអគ្គរដ្ឋទូតចិនប្រចាំទីក្រុងហាណូយថាវាជារឿងសំខាន់ណាស់ដែលប្រទេសទាំង២ត្រូវតែគ្រប់គ្រងជម្លោះនេះឱ្យបានល្អ។ ប្រទេសទាំង២ត្រូវតែគោរព និងឱ្យតម្លៃផលប្រយោជន៍ជាតិរបស់គ្នាទៅវិញទៅមកទើបអាចរស់នៅបានសុខសាន្តជាមួយគ្នា។ ខាងលើនេះជាសេចក្ដីថ្លែងការណ៍របស់ខុទ្ទកាល័យប្រធានាធិបតីវៀតណាម។
ប្រទេសចិនជាដៃគូពាណិជ្ជកម្មដែលធំជាងគេរបស់វៀតណាម។ ប៉ុន្តែប្រទេសទាំង២ក៏មានជម្លោះរ៉ាំរ៉ៃជាមួយគ្នានៅក្នុងបញ្ហាដែនសមុទ្រតាំងពីយូរមកហើយផងដែរ។ លោកតូឡាមថ្លែងនៅក្នុងកិច្ចប្រជុំកាលពីពេលថ្មីៗនេះថាប្រទេសទាំង២ចាំបាច់ណាស់ត្រូវគោរពផលប្រយោជន៍ស្របច្បាប់របស់គ្នាទៅវិញទៅមក។ ប្រទេសទាំង២ត្រូវតែស្វះស្វែងរកដំណោះស្រាយដែលអាចទទួលយកបានទាំងអស់គ្នា និងពេញចិត្តពេញថ្លើមទាំងអស់គ្នា ហើយក៏ត្រូវស្របទៅតាមច្បាប់អន្តរជាតិផងដែរ។
កាលពីថ្ងៃព្រហស្បតិ៍សប្ដាហ៍មុន ក្រសួងការបរទេសវៀតណាមសម្ដែងការព្រួយបារម្ភយ៉ាងខ្លាំងនៅពេលនាវាឃ្លាំរបស់ចិនបង្ហាញខ្លួននៅតំបន់សេដ្ឋកិច្ចផ្ដាច់មុខរបស់វៀតណាម (មានន័យថាបើកចូលតំបន់ដែលវៀតណាមចាត់ទុកថាជាសមុទ្ររបស់ខ្លួន ខណៈដែលចិនក៏ចាត់ទុកជាដែនសមុទ្ររបស់ខ្លួនដែរ។ ដូច្នេះ នៅពេលជួបឯកអគ្គរដ្ឋទូតចិននៅថ្ងៃនេះ លោកតូឡាមក៏ឆ្លៀតនិយាយអំពីបញ្ហានេះ។ លោកថ្លែងថាចំណងមិត្តភាព-សហការរវាងចិន និងវៀតណាមដែលកំពុងតែវិវត្តទៅមុខនេះត្រូវវៀតណាមចាត់ទុកជាមាគ៌ានយោបាយជាយុទ្ធសាស្ត្រ និងជាកន្សោមអាទិភាពនៃនយោបាយការបរទេសរបស់ខ្លួន។
សូមរំលឹកថាកាលពីពេលលោកស៊ីជីនពីងបំពេញទស្សនកិច្ចនៅទីក្រុងហាណូយកាលពីខែធ្នូ ឆ្នាំ២០២៣ ប្រទេសទាំងពីរបានចុះកិច្ចព្រមព្រៀងជាច្រើន។ ក្នុងនោះក៏មានគម្រោងសាងសង់ផ្លូវរថភ្លើងល្បឿនលឿនផងដែរដើម្បីងាយស្រួលដឹកជញ្ជូនទំនិញពីវៀតណាមទៅចិន។ ជាពិសេសទុរេនរបស់វៀតណាមឥឡូវនេះកំពុងតែមានប្រជាប្រិយភាព និងវាយលុកទីផ្សារខ្លាំងណាស់។។
លោកតូឡាមនៅក្នុងឱកាសជួបជាមួយឯកអគ្គរដ្ឋទូតចិននោះ លោកសង្កត់ធ្ងន់ថាវៀតណាមចាំបាច់ណាស់ត្រូវតែសាងសង់ផ្លូវរថភ្លើងល្បឿនលឿនដើម្បីតភ្ជាប់ប្រទេសទាំង២។ លោកក៏បានស្នើសុំឱ្យប្រទេសចិនបើកទូលាយបន្ថែមទៀតដើម្បីអនុញ្ញាតឱ្យទំនិញរបស់វៀតណាមអាចដឹកទៅលក់នៅលើទីផ្សារចិនកាន់តែងាយស្រួល។ ជាសេស ទំនិញប្រភេទកសិផល៕
ចែករំលែកព័តមាននេះ