វៀតណាម ៖ ដូចលោកអ្នកបានដឹងហើយថា កាលពីថ្ងៃទី០៥ ខែមិថុនា ឆ្នាំ២០២៤ ក្នុងរយៈពេលតែជាង៣ម៉ោងប៉ុណ្ណោះ រន្ទះបាញ់ចំនួនជាង១ម៉ឺនរន្ទះបានបាញ់រះមកលើទឹកដីនៃទីក្រុងហាណូយ រួមទាំងបណ្តាខេត្តដែលនៅជុំវិញ។
ភ្ជាប់ជាមួយបាតុភូតរន្ទះបាញ់ក្នុងចំនួនដ៏ច្រើនលើសលប់បែបនេះ ត្រូវបានប្រជាជនវៀតណាម យកទៅភ្ជាប់ជាមួយព្រឹត្តការណ៍ នៃការប្រទះឃើញត្រី Oarfish ឬ ត្រីនាគ ដែលងាប់អណ្តែតនៅលើឆ្នេរសមុទ្រនៃខេត្តធឿធៀនហ្វេ កាលពីពេលថ្មីៗកន្លងទៅនេះ ដោយសារតែ ត្រី Oarfish ត្រូវបានគេចាត់ទុកថា ជាត្រីនាំសារព្រមានអំពីគ្រោះមហន្តរាយ! សំនួរសួរថា តើវាជារឿងចៃដន្យ ឬក៏ជាប្រផ្នូលចម្លែកនៅលើទឹកដីវៀតណាម?
គួររំលឹកថា ប្រជាជនក្នុងទីក្រុងហ្វេ កាលពីល្ងាចថ្ងៃទី១៦ ខែឧសភា ឆ្នាំ២០២៤ បានជួបរឿងភ្ញាក់ផ្អើលជាខ្លាំង ក្រោយពីប្រទះឃើញ ត្រីOarfish ដែលពលរដ្ឋវៀតណាម ហៅថា ត្រីរញ្ជួយដី បានអណ្តែតរសាត់មកទើលើឆ្នេរសមុទ្រក្នុងតំបន់របស់ពួកគេ។ ភ្លាមៗនោះ ទោះបីពលរដ្ឋជាច្រើននាក់បានព្យាយាមនាំយកត្រីមួយក្បាលដ៏ធំ និងប្រវែងវែងគួរសមមួយក្បាលនេះទៅដាក់ក្នុងទឹកសមុទ្រវិញ ប៉ុន្តែវាបានងាប់បាត់ទៅហើយ។
ក្រោយប្រទះឃើញ ត្រីរញ្ជួយដីនេះ អ្នកលេងបណ្តាញសង្គមនៅវៀតណាម បានចែករំលែករឿងរ៉ាវនេះ ដោយព្រួយបារម្ភថា នេះទំនងជាការព្រមានចំពោះប្រផ្នូលមិនល្អដែលនឹងអាចកើតមាននៅក្នុងតំបន់ដែលពួកគេរស់នៅ ជាពិសេសនៅក្នុងរដូវភ្លៀងដែលនាំមកនូវទឹកជំនន់ ការបាក់ដី ខ្យល់ព្យុះនិងរន្ទះបាញ់ជាដើម។
ជាក់ស្តែង ក្រោយត្រីOarfish ងាប់បានតែ៣ថ្ងៃ ពោលគឺកាលពីថ្ងៃទី១៩ ខែឧសភា បាតុភូតផ្គររន្ទះជាង ១០ម៉ឺន ៧ពាន់ដង បានបាញ់រះនៅលើទឹកដីនៃប្រទេសវៀតណាមក្នុងរយៈពេលពេញមួយថ្ងៃ ជាពិសេសត្រឹមតែរយៈពេលបីម៉ោងចាប់ពីម៉ោង៣-៦ល្ងាច រន្ទះបាញ់បានបាញ់មកលើដីរហូតដល់ទៅ ៤ម៉ឺនដង។
រំលងគ្នាមិនយូប៉ុន្មាន ឈានមកដល់ព្រឹកព្រលឹមថ្ងៃទី០៥ ខែមិថុនា មជ្ឈមណ្ឌលជាតិសម្រាប់បណ្តាញឧតុនិយមបានកត់ត្រាថា កំឡុងពេលភ្លៀងធ្លាក់ខ្លាំង ចាប់ពីម៉ោង ៦ ដល់ម៉ោង៩កន្លះព្រឹក មានរន្ទះបាញ់ សរុបជាង ១ម៉ឺន ៥០០រន្ទះ បានកើតឡើងនៅក្នុងទីក្រុងហាណូយ និងផ្នែកខ្លះនៃខេត្តជិតខាង ដូចជា ខេត្តហាយសឿងនិង ខេត្តហ៊ឹងអៀន។
ក្នុងចំណោមរន្ទះទាំងនោះ រន្ទះចំនួន ៧១៥៣ បានបាញ់មកលើដី ដែលតជាមធ្យម គឺរៀងរាល់ ១០នាទីម្តង មានរន្ទះ៤៧៥ដដងបានមកលើកដី ហើយពេលខ្លះ ក្នុងរយៈពេល ១វិនាទី ប៉ុណ្ណោះ រន្ទះបានបាញ់រហូតដល់ទៅ១០ដង។
ដោយសារតែបាតុភូតរន្ទះដ៏ច្រើនសន្ធាប់នេះ ប្រជាជននៅស្រុកក្វាងប៊ិញ នៃខេត្តហាយ៉ាង បានរាយការណ៍ថា ក្របីចិញ្ចឹមរបស់ពួកគេបានងាប់ចំនួន ៥ក្បាល ក្រោយពីត្រូវរន្ទះបាញ់ និង ២ក្បាលទៀត បានងាប់ដោយសារទឹកជំនន់ ដែលគិតជាទឹកប្រាក់ខាតបង់ជាង ១៣០លានដុង។
ក្រៅពីនោះ ភ្លៀងធ្លាក់ខ្លាំងក្នុងតំបន់ក៏បានបណ្តាលឱ្យមានការរអិលបាក់ដី កាលពីវេលាម៉ោង ១និង៣០នាទីរំលេងអាធាត្រ ខណៈដែលគ្រប់គ្នាកំពុងដេកលក់ ស្រាប់តែមានដុំថ្មទម្ងន់ប្រហែល៣តោន បានរមៀលធ្លាក់ពីលើភ្នំចូលទៅក្នុងផ្ទះ បណ្តាលឲ្យកុមារអាយុ១៤៤ឆ្នាំបានស្លាប់។
ជុំវិញបញ្ហាធាតុអាកាសនេះផងដែរ តាមការព្យាករណ៍អាកាសធាតុរយៈពេល១០ ថ្ងៃ ពោលចាប់ពីថ្ងៃទី៧ ខែមិថុនា ដល់ ១៦ ខែមិថុនា នឹងភ្លៀងធ្លាក់ជោគជាំ រួមទាំង ខ្យល់កន្ត្រាក់ ព្យុះកំបុតត្បូង រន្ទះបាញ់ ភ្លៀងទឹកកក រួមទាំងខ្យល់បក់ខ្លាំងនៅតំបន់ភ្នំ និងភាគកណ្តាលខាងជើង ជាពិសេទីក្រុងហាណូយ។
ជាមួយគ្នានេះ ក្រសួងឧតុនិយមនិយម បានព្រមានថា នៅពេលមានភ្លៀងធ្លាក់ខ្លាំង ក្រៅពីរន្ទះ និងខ្យល់នោះ ទឹកជំនន់ភ្លាមៗនៅតាមដងទន្លេ និងអូរតូចៗ ការបាក់ដីនៅលើជម្រាលភ្នំ រួមទាំងកើតមានជំនន់ទឹកភ្លៀងនៅក្នុងតំបន់ទំនាប និងទីក្រុងផងដែរ៕
ចែករំលែកព័តមាននេះ