ADផ្ទាំងផ្សព្វផ្សាយពាណិជ្ជកម្ម

Picture

សម្តេច​តេ​ជោ ​ស្នើ​ប្រទេស​ផ្សេង​ៗ​ កុំ​ភ្ជាប់​កម្ពុជា​ទៅ​ក្នុង​ល្បែង​ភូមិសាស្ត្រ​នយោបាយ​ប្រឆាំង​ចិន ​ក្នុង​រឿង​សន្និសីទ​សន្តិភាព​អ៊ុយ​ក្រែ​ន

1 ខែ មុន

រាជធានី​ភ្នំពេញ ៖ សម្ដេច​អគ្គមហាសេនាបតី​តេ​ជោ ហ៊ុន សែន ប្រធាន​ព្រឹទ្ធសភា​កម្ពុជា និង​ជា​ប្រធាន​គណបក្ស​ប្រជាជន​កម្ពុជា បាន​ស្នើ​ដល់​ប្រទេស​ផ្សេង​ៗ សូមកុំ​ព្យាយាម​ទម្លាក់​កំហុស​ឲ្យ​ចិន ពេល​កម្ពុជា​មិន​ចូលរួម​ក្នុង​សន្និសីទ​សន្តិភាព​អ៊ុយ​ក្រែ​ន…

រាជធានី​ភ្នំពេញ ៖ សម្ដេច​អគ្គមហាសេនាបតី​តេ​ជោ ហ៊ុន សែន ប្រធាន​ព្រឹទ្ធសភា​កម្ពុជា និង​ជា​ប្រធាន​គណបក្ស​ប្រជាជន​កម្ពុជា បាន​ស្នើ​ដល់​ប្រទេស​ផ្សេង​ៗ សូមកុំ​ព្យាយាម​ទម្លាក់​កំហុស​ឲ្យ​ចិន ពេល​កម្ពុជា​មិន​ចូលរួម​ក្នុង​សន្និសីទ​សន្តិភាព​អ៊ុយ​ក្រែ​ន និង​សូម​បញ្ឈប់​ការ​ភ្ជាប់​កម្ពុជា ទៅ​ក្នុង​ល្បែង​ភូមិសាស្ត្រ​នយោបាយ​ប្រឆាំង​ចិន​ទៅ ។

សម្តេច​តេ​ជោ បាន​សរសេ​លើ​បណ្តាញ​សង្គម នៅ​យប់​ថ្ងៃ​ទី​៧ ខែមិថុនា ឆ្នាំ​២០២៤ យ៉ាង​ដូច្នេះ​ថា ៖ «​ថ្ងៃ​ទី​៧ ខែមិថុនា ឆ្នាំ​២០២៤​នេះ មាន​កាសែត​បរទេស​មួយ ចុះ​ផ្សាយ​អំពី​ប្រទេស​អាស៊ី​អាគ្នេយ៍ ចូលរួម​សន្និសីទ​សន្តិភាព​អ៊ុយ​ក្រែ​ន នៅ​ស្វី​សនា​ពេល​ខាង​មុខ​។ គេ​ខិតខំ​ទម្លាក់​កំហុស​ឲ្យ​ចិន ប្រ​សិន​កម្ពុជា​មិន​បាន​ចូលរួម​» ។

សម្តេច​តេ​ជោ បាន​លើក​ឡើង​ថា កាលពី​ស​ប្តា​ហ៍​មុន ក្នុង​ជំនួប​តាម​វី​ដេ​អូ ជាមួយ​ប្រធាន​សភា​អ៊ុយ​ក្រែ​ន ទន្ទឹម​នឹង​ការ​ជម្រាប​ជូន​គាត់​ថា កម្ពុជា​កំពុង​ពិចារណា​លើ​ផែនការ​សន្តិភាព និង​ការ​ចូលរួម ឬ​មិន​ចូលរួម ខ្ញុំ​ក៏​បាន​ជម្រាប​គាត់​ថា សន្និសីទ​មិន​ទទួល​បាន​ជោគជ័យ​ទេ ប្រសិនបើ​ភាគី​ពាក់ព័ន្ធ​ពិសេស​រុ​ស្ស៊ី មិន​ត្រូវ​បាន​អញ្ជើញ​ឲ្យ​ចូលរួម ។

សម្តេច​បាន​បញ្ជាក់​ថា ៖ «​ខ្ញុំ​បាន​ប្រាប់​គាត់​បន្ថែម​ថា មុន​សន្និសីទ​ពេល​សន្និសីទ និង​ក្រោយ​សន្និសីទ រុ​ស្ស៊ី នឹង​វាយ​ខ្លាំង​លើ​សមរភូមិ​យោធា​។ ខ្ញុំ​ក៏​និយាយ​បែប​នេះ​ទៅ​កាន់​អគ្គនាយក CIA នៅ​ថ្ងៃ​២​មិថុនា និង​រដ្ឋមន្ត្រី​ការពារ​ជាតិ​អា​មេ​រិ​ក​ថ្ងៃ​៤​មិថុនា ពេល​ពួក​គាត់​មក​ជួប​ជាមួយ​ខ្ញុំ​។ តើ​សម្ដី​បែប​នេះ ចិន​ណែនាំ​ឲ្យ​ខ្ញុំ​និយាយ​ឬ​កម្ពុជា​មាន​សិទ្ធិ​និយាយ ?​» ។

សម្តេច​បាន​គូសបញ្ជាក់​ថា កម្ពុជា​ជា​រដ្ឋ​ឯករាជ្យ ហើយ​ខ្ញុំ​បាន​ធ្វើការ​ជាមួយ​មេដឹកនាំ​ចិន​ច្រើន​ឆ្នាំ និង​ច្រើន​ជំនាន់ ខ្ញុំ​មិន​ធ្លាប់​លឺ មេដឹកនាំ​ចិន​ណា​ម្នាក់ និយាយ​មក​កាន់​ខ្ញុំ​ឲ្យ​ធ្វើ​នេះ ឬ​ធ្វើ​នោះ​តាម​បំណង​របស់​ចិន​ឡើយ​។ ផ្ទុយ​ទៅ​វិញ ពួក​អ្នក​ដែល​និយាយ​ថា កម្ពុជា​ធ្វើ​តាម​ចិន​ទៅ​វិញ​ទេ ដែល​តែងតែ​មក​ដាក់​ការ​គាបសង្កត់​ឲ្យ​កម្ពុជា ធ្វើ​តាម​ខ្លួន​រហូត​ប៉ះទង្គិច​សម្ដី​ជាមួយ​ខ្ញុំ​ជា​ញឹកញាប់​។ ការ​សម្រេចចិត្ត​មិន​ចូលរួម​សន្និសីទ​របស់​កម្ពុជា វា​ជា​សិទ្ធិ​របស់​កម្ពុជា ដោយ​កម្ពុជា​មើលឃើញ​ថា វា​មិន​មានជោគ​ជ័យ​។ ឯ​ប្រទេស​ផ្សេង​ទៀត ចូលរួម ឬ​មិន​ចូលរួម វា​ជា​សិទ្ធិ​របស់​ប្រទេស​ទាំងនោះ ។

សម្តេច​ប្រធាន​ព្រឹទ្ធសភា បាន​គូសបញ្ជាក់​យ៉ាង​ដូច្នេះ​ថា ៖ «​សូមកុំ​ព្យាយាម​ទម្លាក់​កំហុស​ឲ្យ​ចិន ពេល​កម្ពុជា​មិន​ចូលរួម​ក្នុង​សន្និសីទ និង​សូម​បញ្ឈប់​ការ​ភ្ជាប់​កម្ពុជា​ទៅ​ក្នុង​ល្បែង​ភូមិសាស្ត្រ​នយោបាយ​ប្រឆាំង​ចិន​ទៅ​» ។

សូម​ជម្រាប​ដែរ​ថា សម្តេច​តេ​ជោ ហ៊ុន សែន បាន​ប្រកាស​ថា កម្ពុជា នឹង​មាន​កំហុស​ធ្ងន់ធ្ងរ ប្រសិនបើ​កម្ពុជា​សម្រេច​ទៅ​ចូលរួម​កិច្ចប្រជុំ​កំពូល ដើម្បី​សន្តិភាព​អ៊ុយ​ក្រែ​ន (Global Peace Summit) ដែល​ធ្វើ​ឡើង​នៅ​ប្រទេស​ស្វី​ស ថ្ងៃ​ទី​១៥-១៦ ខែមិថុនា ឆ្នាំ​២០២៤ ដោយ​គ្មាន​វត្តមាន​ភាគី​សំខាន់ គឺ​រុ​ស្ស៊ី ។

សម្តេច​តេ​ជោ ហ៊ុន សែន បាន​ថ្លែង​ក្នុង​កិច្ច​សម្ភាសន៍​ពិសេស​ជាមួយ​សារព័ត៌មាន​ក្នុងស្រុក នៅ​រសៀល​ថ្ងៃ​ទី​០៧ ខែមិថុនា ២០២៤​នេះ​ថា ៖ «​វា​នឹង​ក្លាយទៅជា​កំហុស​ដ៏​ធ្ងន់ធ្ងរ និង​ក្លាយទៅជា​ការ​ប្រមាថ​មួយ ចំពោះ​នយោបាយ​បរទេស​របស់​កម្ពុជា ប្រសិនបើ​កម្ពុជា​សម្រេច​ទៅ​ចូលរួម​កិច្ចប្រជុំ​កំពូល ដើម្បី​សន្តិភាព​អ៊ុយ​ក្រែ​ន​។ ការ​មិន​ទៅ​ចូលរួម​កិច្ចប្រជុំ​កំពូល​សន្តិភាព​សកល​របស់​កម្ពុជា គឺជា​សិទ្ធិ​ស្វ័​យស​ម្រេច​របស់​កម្ពុជា​សុទ្ធសាធ កម្ពុជា មិន​ត្រូវ​ចិន​រារាំង មិន​ឲ្យ​ចូលរួម​ទេ ហើយ​ចិន ក៏​មិន​ធ្វើ​រឿង​បែប​នេះ ដាក់​ចំពោះ​កម្ពុជា​ដែរ​។ ការ​មិន​ទៅ​ចូលរួម​របស់​កម្ពុជា វា​ក៏​នឹង​ក្លាយទៅជា​កំហុស​ដ៏​ធំ​មួយ​របស់​អ្នកវិភាគ​នយោបាយ​មួយ​ចំនួន ឬ​មេដឹកនាំ​ណាមួយ ដែល​តែងតែ​ចាត់​ទុក​ថា ចិន មក​ធ្វើ​ចលនា​រារាំង​កម្ពុជា មិន​ឲ្យ​ទៅ​ចូលរួម​។ សម្តេច​បញ្ជាក់​ថា ប្រសិនបើ​ចិន​ចង់​ធ្វើ​រឿង​បែប​នេះ​ដាក់​កម្ពុជា ចិន​ក៏​គ្មាន​លទ្ធភាព ដើម្បី​រារាំង​កម្ពុជា មិន​ឲ្យ​ចូលរួម​ដែរ​» ។

សម្តេច​តេ​ជោ ហ៊ុន សែន បាន​សង្កាត់​ធ្ងន់​ថា «​អ្វី​ដែល​ជា​ការ​កត់សំគាល់​របស់​កម្ពុជា និង​ចោទសួរ​ថា តើ​លទ្ធផល នៃ​កិច្ចប្រជុំ​កំពូល​នេះ វា​នឹង​ទៅ​ដល់​ណា ? បើសិនជា​កិច្ចប្រជុំ​កំពូល​នេះ នៅ​ត្រឹមតែ​ថ្កោលទោស​រុ​ស្ស៊ី ដែល​ភាគី​សំខាន់​គឺ​រុ​ស្ស៊ី មិន​ត្រូវ​បាន​គេ​អញ្ជើញ​ឲ្យ​ចូលរួម​ដោះស្រាយ តើ​កម្ពុជា មានការ​ចាំបាច់ ដើម្បី​ចូលរួម​ធ្វើ​អ្វី ដែល​វា​គ្រាន់តែ​ជា​ការ​បង្កើន​អរិភាព​បន្ថែម​ទៀត​នោះ​» ៕

អត្ថបទសរសេរ ដោយ

អត្ថបទសរសេរ ដោយ