ខេត្តកំពង់ឆ្នាំង ៖ ក្រោយពីផ្ទុះព័ត៌មានអាស្រូវរឿងមន្ត្រី ក.ប.ប. ដែលមានឈ្មោះពេញហៅថា (អគ្គនាយកដ្ឋានការពារ អ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ )…
ខេត្តកំពង់ឆ្នាំង ៖ ក្រោយពីផ្ទុះព័ត៌មានអាស្រូវរឿងមន្ត្រី ក.ប.ប. ដែលមានឈ្មោះពេញហៅថា (អគ្គនាយកដ្ឋានការពារ អ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ) របស់ក្រសួងពាណិជ្ជកម្មដែលតែងប្រមូលលុយពីអាជីវករលក់គ្រឿងក្រអូបនៅផ្សាររមាស ស្រុកទឹកផុស ខេត្តកំពង់ឆ្នាំង កាលថ្ងៃទី០៤ ខែមិថុនា ឆ្នាំ២០២៤ ថ្មីៗនេះ ហើយត្រូវបានសារព័ត៌មាន និងបណ្ដាញសង្គមចុះផ្សាយព្រោងព្រាត រួមទាំងអាជ្ញាធរស្រុកចុះស្រាវជ្រាវពីភាពមិនប្រកប្រណីនេះផងនោះ នៅល្ងាច ថ្ងៃទី០៥ ខែមិថុនា២០២៤ ស្រាប់តែមន្ត្រីក.ប.បទាំងនោះបានវេរលុយឱ្យអាជីវករទាំងនោះវិញហើយតាមរយៈមន្ត្រីសាលាស្រុកមួយរូប ។ អាចនិយាយបានថា គឺរួចខ្លួនហើយ។ មិនមានទោសទណ្ឌចំណាត់ការតាមផ្លូវច្បាប់លើមន្ត្រីខិលខូចទាំងនោះនៅឡើយនោះទេ ណ្ហើយទុកឈើពុកឱ្យុរលួយទៅទៀតចុះ…ហេ! ហេ! ។
មន្ត្រីសាលាស្រុកទឹកផុសមួយរូបដែលសុំអនុញ្ញាតមិនបញ្ចេញឈ្មោះបានឲ្យដឹងថា អាជីវករចំនួន៣នាក់បានរងគ្រោះពីមន្ត្រីក.ប.បដើរប្រមូលលុយពីអាជីវករលក់គ្រឿងគ្រឿងក្រអូបដោយចោទថា គ្មានពន្ធ និងបានជម្រិតទារប្រាក់ចាប់ពី៣លានរហូតចុះដល់៧០ម៉ឺន, ៥០ម៉ឺន និង១៥ម៉ឺនរៀល កាលពីថ្ងៃទី០៤ ខែមិថុនានោះ បានវេរលុយមកវិញអស់ហើយ តាមរយៈរូបគាត់ដែលបានទទួលចំនួនសរុប១៣៥ម៉ឺនរៀល ។ ក្នុងនោះ ឈ្មោះចែនី ៧០ម៉ឺនរៀលុំ កូនលោកគ្រូបង្រៀន៥០ម៉ឺនរៀល និងចែខួច១៥ម៉ឺនរៀល ។ រូបគាត់បានប្រគល់ជូនអាជីវករទាំងនោះវិញអស់ហើយ ។
អាចនិយាយបានថា ជាមន្ត្រីក.ប.បរបស់ក្រសួងពាណិជ្ជកម្ម បែរជាដើរតួជំនួសមន្ត្រីគយ ហើយចោទលើអាជីវករលក់របស់គ្មានបង់ពន្ធ វាខុសរឿង១០០អង្សា ។ មិនទាន់ដឹងថា ក្រុមមន្ត្រីខិលខូចនេះទៅប្រមូលលុយពីផ្សារណាទៀតទេ ។ តើមានផ្សារណារងគ្រោះទេ សូមប្រាប់កោះសន្តិភាពផង ដើម្បីជួយទារលុយវិញ ។
ជុំវិញបញ្ហាខាងលើនេះ គេមិនទាន់ដឹងថា តើមន្ត្រីទាំងនោះ នឹងអាចទទួលទោសទណ្ឌដែរឬទេ គឺខណៈដែលប្រជាពលរដ្ឋបានលើកឡើងថា ជាមន្ត្រីពាណិជ្ជកម្មហេតុអី ក៏មកទារលុយដូចមន្ត្រីគយ ។ ក្នុងរឿងចោទមន្ត្រីគយដើររទារប្រាក់ពីអាជីវករ កាលពីថ្ងៃទី៤ មិថុនា នេះដែរ មន្ត្រីគយមួយរូបក៏បានបដិសេធជុំវិញបញ្ហានេះដែរថា ពួកគាត់ពុំបានធ្វើយ៉ាងដូច្នេះទេ ។
បងប្អូនប្រជាពលរដ្ឋក៏ដូចអាជីវករលក់ដូរបានសំណូមពរថ្នាក់លើជួយមើលមន្ត្រីខិលខូចទាំងនេះផង បើពុំដូច្នោះទេ ពួកគាត់ប្រហែលជាមិនរាងឡើយ ៕
ចែករំលែកព័តមាននេះ