ការនាំចេញអង្កររបស់ថៃ ត្រូវបានព្យាករណ៍ថានឹងធ្លាក់ចុះជាង ១០% នៅឆ្នាំក្រោយ
ទីក្រុងបាងកក ៖ ការនាំចេញអង្កររបស់ប្រទេសថៃ ត្រូវបានព្យាករណ៍ថា នឹងធ្លាក់ចុះមកត្រឹម ៧ លានតោន នៅឆ្នាំ ២០២៦ ពីប្រហែល…
ទីក្រុងបាងកក ៖ ការនាំចេញអង្កររបស់ប្រទេសថៃ ត្រូវបានព្យាករណ៍ថា នឹងធ្លាក់ចុះមកត្រឹម ៧ លានតោន នៅឆ្នាំ ២០២៦ ពីប្រហែល ៨ លានតោន នៅឆ្នាំនេះ ដោយសារតែការឡើងថ្លៃប្រាក់បាតកាន់តែខ្ពស់ធ្វើឱ្យពិបាកនៅក្នុងការប្រកួតប្រជែងជាមួយការផ្គត់ផ្គង់របស់ប្រទេសឥណ្ឌា។
ថ្លែងក្នុងសន្និសីទសារព័ត៌មានថ្មីៗនេះ លោកស្រី អារ៉ាដា ហ្វួងតុង (Arada Fuangtong) ប្រធាននាយកដ្ឋានពាណិជ្ជកម្មបរទេសនៃក្រសួងពាណិជ្ជកម្មថៃ បានលើកឡើងថា រូបិយប័ណ្ណថៃបច្ចុប្បន្នមានកម្រិតខ្ពស់ជាងរូបិយប័ណ្ណរបស់ប្រទេសជាដៃគូប្រកួតប្រជែងពី ១០ ទៅ ២០%។ លោកស្រីបានបន្ថែមថា បើប្រាក់បាតបន្តឡើងថ្លៃ វានឹងបង្កបញ្ហាប្រឈមដ៏ធំមួយសម្រាប់ផលិតផលកសិកម្មក្នុងស្រុក។
លោកស្រីបានកត់សម្គាល់ថា កិច្ចព្រមព្រៀងលក់អង្ករចំនួន ៥០ ម៉ឺនតោនទៅប្រទេសចិនត្រូវបានគេរំពឹងថានឹងបន្ត។ កាលពីខែមុន ប្រទេសថៃក៏បានយល់ព្រមផ្គត់ផ្គង់អង្កររហូតដល់ ១០ ម៉ឺនតោនទៅកាន់ប្រទេសសិង្ហបុរីក្នុងរយៈពេល ៥ ឆ្នាំ។ ថៃក៏កំពុងស្វែងរកការពង្រីកការនាំចេញអង្ករស និងអង្ករស្ងោ (Parboiled Rice) ទៅកាន់ប្រទេសអ៊ីរ៉ាក់ អារ៉ាប៊ីសាអូឌីត និងប្រទេសដទៃទៀតនៅមជ្ឈិមបូព៌ា រួមទាំងអាហ្វ្រិកផងដែរ។
ប្រទេសថៃក៏មានគម្រោងស្វែងរកឱកាសនៅប្រទេសអាល្លឺម៉ង់ ស្វីស និងសហរដ្ឋអាមេរិកសម្រាប់ពូជអង្ករលំដាប់ខ្ពស់ក្រោមគម្រោង «ខាវប្រានៀត» (Khaopraneat) ដែលលើកកម្ពស់អង្ករថៃជាផលិតផលវប្បធម៌មានរសជាតិ អត្តសញ្ញាណ និងតម្លៃពិសេស។
លោកស្រី អារ៉ាដា បានបន្ថែមថា នៅក្នុងឆ្នាំ ២០២៥ ការដឹកជញ្ជូនអង្កររបស់ថៃ ត្រូវបានព្យាករណ៍ថានឹងឈានដល់ ៧,៨៨ ទៅ ៨ លានតោន លើសពីគោលដៅ ៧,៥ លានតោន ដោយសារតម្រូវការខ្លាំងនៅចុងឆ្នាំ។ ទោះជាយ៉ាងណាក៏ដោយ បរិមាណនឹងនៅតែទាបជាងជិត ១០ លានតោន ដែលបាននាំចេញនៅឆ្នាំ ២០២៤ នៅពេលដែលថៃជាប្រទេសនាំចេញអង្ករធំជាងគេទី ២ លើពិភពលោក បន្ទាប់ពីប្រទេសឥណ្ឌា៕ ប្រភព ៖ VNA
ចែករំលែកព័តមាននេះ