(អន្តរជាតិ)៖ Rory John Gates ដែលជាកូនប្រុសតែម្នាក់គត់របស់មហាសេដ្ឋី លោក Bill Gates និងលោកស្រី Melinda French Gates បានបង្ហាញខ្លួនដ៏កម្រក្នុងពិធីផ្លូវការមួយ ជាមួយនឹងម្តាយកាលពីចុងខែឧសភា ដែលនេះក៏ជាពេលវេលាដ៏កម្រដែលកូនប្រុសរបស់លោក Gates បង្ហាញមុខជាសាធារណៈ និងប្រព័ន្ធផ្សព្វផ្សាយ។

កើតនៅថ្ងៃទី២៣ ខែឧសភា ឆ្នាំ១៩៩៩ Rory បានធំធាត់នៅក្នុងវិមានដ៏ធំមួយដែលមានឈ្មោះថា Xanadu 2.0 ជាមួយនឹងបងប្អូនស្រីពីរនាក់គឺ Jennifer អាយុ ២៨ ឆ្នាំ និង Phoebe អាយុ២១ឆ្នាំ។ កូនប្រុសរបស់ Bill Gates រូបនេះហាក់ដូចជាមានជីវិតសាមញ្ញ ពុំសូវបង្ហាញខ្លួននៅតាមទីសាធារណៈ និងមានទំនាក់ទំនងជិតស្និទ្ធជាមួយម្តាយរបស់គាត់។

លោក Bill Gates និងអតីតភរិយា Melinda Gates បានផ្តល់ឱ្យកូនរបស់ពួកគេនូវវិមានក្នុងក្តីស្រមៃដែលមានទំហំជាង ៦,000 ម៉ែត្រការ៉េ ដែលមានឈ្មោះថា Xanadu 2.0 ដែលជាវិមានដ៏ប្រណិតដែលមានតម្លៃ ១៥០លានដុល្លារ នៅតំបន់ Medina រដ្ឋ Washington ភ្ជាប់មកជាមួយនូវគ្រឿងបរិក្ខារ គ្រឿងសិង្ហារឹមប្រណិតៗ។

ទោះបីជាមានរបៀបរស់នៅដ៏ប្រណិតរបស់ពួកគេក៏ដោយ Bill និង Melinda នៅតែធ្វើឱ្យប្រាកដថាកូនទាំងបីរបស់ពួកគេអនុវត្តតាមច្បាប់ដែលពួកគេកំណត់ ពួកគេមិនអាចប្រើទូរស័ព្ទដៃរហូតដល់អាយុ ១៤ឆ្នាំ ហើយពួកគេត្រូវលាងចានរៀងរាល់យប់។ សូម្បីតែនៅពេលពួកគេមានអាយុគ្រប់គ្រាន់ក្នុងការប្រើទូរស័ព្ទក៏ដោយ ក៏ Rory និងបងប្អូនស្រីរបស់គាត់មានកម្រិតប្រើប្រាស់តែប៉ុណ្ណោះ ហើយត្រូវបានហាមឃាត់មិនឱ្យកាន់វានៅតុអាហារ។

Rory បានចូលរៀននៅសាលា Lakeside School ឯកជននៅទីក្រុង Seattle រដ្ឋ Washington ដូចឪពុករបស់គាត់ដែរ។ បន្ទាប់មកគាត់បានបន្តការសិក្សាថ្នាក់បរិញ្ញាបត្រផ្នែកវិស្វកម្មកម្មវិធីកុំព្យូទ័រ និងសេដ្ឋកិច្ចនៅសាកលវិទ្យាល័យ Duke ហើយទទួលបាន MBA នៅសាលា Fuqua School of Business តាមគន្លងអប់រំរបស់ម្តាយគាត់។

យោងតាម PageSix លោក Bill Gates ត្រូវបានគេនិយាយថានឹងរៀបចំផែនការបែងចែកមរតកដ៏តូចមួយក្នុងចំណោមកូនទាំងបីរបស់គាត់។ ក្នុង​ឆ្នាំ ២០១១ គាត់​ក៏​បាន​និយាយ​ថា គាត់​នឹង​មិន​ទុក​ទ្រព្យ​សម្បត្តិ​ច្រើន​ដល់​កូន​គាត់​ទេ។ ផ្ទុយ​ទៅ​វិញ Melinda ត្រូវ​បាន​គេ​និយាយ​ថា មាន​គំនិត​ខុស​គ្នា​ចង់​បង្កើន​ចំនួន​មរតក​ដែល​នាង​ទុក​ឲ្យ​កូន។ បច្ចុប្បន្ន​នេះ​គេ​មិន​ច្បាស់​ថា​តើ​មរតក​ប៉ុន្មាន​ដែល Rory នឹង​ទទួល​បាន​ពី​ឪពុក​ម្តាយ​មហាសេដ្ឋី​របស់​គាត់៕