ខេត្តពោធិ៍សាត់ ៖ ថ្ងៃទី៣ ខែមិថុនា ឆ្នាំ២០២៤ វេលាម៉ោង១០ព្រឹក កម្លាំងជំនាញនៃអធិការដ្ឋាននគរបាលក្រុងពោធិ៍សាត់ បានធ្វើការឃាត់ខ្លួនជនសង្ស័យម្នាក់ ពាក់ព័ន្ធនឹងករណីលួចម៉ូតូរបស់ប្រជាពលរដ្ឋ ពីស្រុកក្រគរ…
ខេត្តពោធិ៍សាត់ ៖ ថ្ងៃទី៣ ខែមិថុនា ឆ្នាំ២០២៤ វេលាម៉ោង១០ព្រឹក កម្លាំងជំនាញនៃអធិការដ្ឋាននគរបាលក្រុងពោធិ៍សាត់ បានធ្វើការឃាត់ខ្លួនជនសង្ស័យម្នាក់ ពាក់ព័ន្ធនឹងករណីលួចម៉ូតូរបស់ប្រជាពលរដ្ឋ ពីស្រុកក្រគរ ។
ទាក់ទិននឹងករណីនេះ សមត្ថកិច្ចឲ្យដឹងថា កាលពីថ្ងៃទី២ ខែមិថុនា ឆ្នាំ២០២៤ វេលាម៉ោង៨ព្រឹក ប៉ុស្ដិ៍នគរបាលរដ្ឋបាលស្នាអន្សា បានទទួលពាក្យបណ្ដឹងពីប្រជាពលរដ្ឋឈ្មោះ ម៉ក់ ស៊ីណាត ភេទស្រី អាយុ៣៦ឆ្នាំ ជនជាតិខ្មែរ រស់នៅភូមិថ្មី ឃុំស្នាអន្សា ស្រុកក្រគរ ខេត្តពោធិ៍សាត់ថា កាលពីថ្ងៃទី១ ខែមិថុនា ឆ្នាំ២០២៤ វេលាម៉ោង៧យប់ ខ្លួនបានដាក់ម៉ូតូ នៅក្នុងបរិវេណមុខផ្ទះ ហើយបានដើរទៅចូលរួមពិធីមង្គលការបងប្អូននៅចម្ងាយពីផ្ទះប្រហែល២គីឡូម៉ែត្រ ។
លុះដល់វេលាម៉ោង៩និង១០នាទីយប់ ខ្លួនត្រឡប់មកវិញ មិនឃើញម៉ូតូ ។ ដែលម៉ូតូម៉ាកឌ្រីម សេ១២៥ ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ពោធិ៍សាត់ 1I.2928 ។
សមត្ថកិច្ចឲ្យដឹងថា បន្ទាប់ពីទទួលបានពាក្យបណ្ដឹងនេះភ្លាម សមត្ថកិច្ចនគរបាលស្រុកក្រគរ បានសហការគ្នាជាមួយអធិការដ្ឋាននគរបាលក្រុងស្រុកទាំង៧ និងនគរបាលប៉ុស្ដិ៍រដ្ឋបាលឃុំសង្កាត់ទាំង៤៩ ទូទាំងខេត្តពោធិ៍សាត់ ចុះស្រាវជ្រាវយ៉ាងដុតដៃដុតជើង រហូតឃាត់ខ្លួនបានជនសង្ស័យ និងម៉ូតូ កាលពីវេលាម៉ោង១០ព្រឹក ថ្ងៃទី៣ខែមិថុនា ឆ្នាំ២០២៤ នៅសង្កាត់រលាប ក្រុងពោធិ៍សាត់ ។
ជនសង្ស័យដែលឃាត់ខ្លួនឈ្មោះ ហេង រាត្រី ភេទប្រុស អាយុ៣៤ឆ្នាំ ជនជាតិខ្មែរ រស់នៅភូមិថ្មី ឃុំស្នាអន្សា ស្រុកក្រគរ ខេត្តពោធិ៍សាត់ មុខរបរមិនពិតប្រាកដ សមត្ថកិច្ចបានសួរនាំបង្កសំណុំរឿងបញ្ជូនទៅតុលាការ ដើម្បីចាត់ការទៅតាមនីតិវិធី ។ ចំណែកវត្ថុតាងម៉ូតូដូចមានភិនភាគខាងលើ បានប្រគល់ជូនម្ចាស់ដើមវិញ ៕
ចែករំលែកព័តមាននេះ