ខេត្តស្វាយរៀង ៖ នៅដើមរដូវវស្សានភ្លៀងធ្លាក់រាយប៉ាយគ្រប់ស្រុកក្រុងនៃខេត្តស្វាយរៀង ប្រជាកសិករចាប់ផ្តើមភ្ជួររាស់ដាស់ដីខ្លះបានព្រោះស្រូវ និងខ្លះទៀតដែលគេព្រោះមុនមានភ្លៀងធ្លាក់ គឺស្រូវពង្រោះរបស់ពួកគាត់បានដុះខៀវ ពេញស្រែ ហើយចាស់ទុំនៅតាមជនបទគាត់ថាឆ្នាំនេះសង្ឃឹមថា ស្រូវរបស់ពួកគាត់និងមានផលល្អ ។…
ខេត្តស្វាយរៀង ៖ នៅដើមរដូវវស្សានភ្លៀងធ្លាក់រាយប៉ាយគ្រប់ស្រុកក្រុងនៃខេត្តស្វាយរៀង ប្រជាកសិករចាប់ផ្តើមភ្ជួររាស់ដាស់ដីខ្លះបានព្រោះស្រូវ និងខ្លះទៀតដែលគេព្រោះមុនមានភ្លៀងធ្លាក់ គឺស្រូវពង្រោះរបស់ពួកគាត់បានដុះខៀវ ពេញស្រែ ហើយចាស់ទុំនៅតាមជនបទគាត់ថាឆ្នាំនេះសង្ឃឹមថា ស្រូវរបស់ពួកគាត់និងមានផលល្អ ។
ការលើកឡើងបែបនេះ នៅវេលាម៉ោង៩និង០០នាទីព្រឹកថ្ងៃទី២៩ ឧសភា ២០២៤ នៅភូមិធ្លកឃុំធ្លកស្រុកស្វាយជ្រំ ។ បើតាមកសិករម្នាក់ឈ្មោះគង់ចាន់នី ភេទប្រុស អាយុ៥១ឆ្នាំនៅភូមិធ្លក ឃុំធ្លកបានប្រាប់អ្នកសារព័ត៌មានថា គាត់មានដីស្រែជាង៤០អា បានភ្ជួរព្រោះជិតរួចហើយ ដោយឆ្នាំនេះ មានភ្លៀងធ្លាក់ជាប់គ្នាពីបីមេ ធ្វើឲ្យទឹកដក់តាមវាលស្រែ ល្មមប្រជាកសិករភ្ជួររាស់ព្រោះស្រូវវស្សាបាន ។
ប្រភពបន្តថា ឆ្នាំនេះមានភ្លៀងធ្លាក់ដើមឆ្នាំ ចាប់ពីថ្ងៃទី៤ ឧសភា ២០២៤មក កន្លែងខ្លះ មានទឹកដក់ក្នុងស្រែ គេចាប់ភ្ជួរដាស់ហាលដី អ្នកខ្លះគេភ្ជួរដាស់រួច ហាលដី១០ថ្ងៃគេចាប់ផ្តើមព្រោះស្រូវ (ព្រោះស្ងួត)ហើយភ្លៀងចាប់ផ្តើមធ្លាក់ច្រើនចាប់ពីថ្ងៃទី២០ឧសភា២០២៤មក ពីបីមេធំ ទឹកដក់ពេញវាលស្រែ កសិករចាប់ផ្តើមភ្ជួរវាយបំបែកដី ហើយព្រោះពូជស្រូវតែម្តង អ្នកគេព្រោះស្ងួតស្រូវដុះល្អ ខៀវពេញស្រែ។ ចំណែកបុរសម្នាក់ អ្នកបើកត្រាក់ទ័របានលើកឡើងថា គាត់ជាអ្នរស់នៅភូមិធ្លកដែរប្រកបមុខរបរបើកត្រាក់ទ័រភ្ជួរដី ឲ្យអ្នកស្រុក គឺក្នុង១ហិកតា បានតម្លៃឈ្នួល៣០ម៉ឺនរៀល (គឺភ្ជួរ២ដង ភ្ជួរដាស់ដីម្តង រាស់បំបែកដីម្តង) ។
ចំណែកប្រជាកសិករនៅភូមិខ្លាលោត ឃុំជ្រៃធំ ឃុំស្តៅ និងឃុំមុខដា ស្រុករមាសហែក បានព្រោះស្រូវវស្សាបានប្រមាណជិត៥០ភាគរយហើយ ។ ទាក់ទិនករណីនេះដែរ លោកសុខ សទ្ធាវុធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តស្វាយរៀង បានប្រាប់កោះសន្តិភាពថា នៅដើមរដូវវស្សានេះមានភ្លៀងធ្លាក់រាយប៉ាយទូទាំង០៨ស្រុក/ក្រុងនៃខេត្តស្វាយរៀង ក៏ប៉ុន្តែស្រុកដែលមានភ្លៀងធ្លាក់ច្រើនជាងគេ ៖ទី១ ស្រុកកំពង់រោទ៌ ហើយប្រជាពលរដ្ឋដែលរស់នៅតាមបន្ទាត់ព្រំដែនពួកគាត់ភាគច្រើនធ្វើស្រូវប្រាំង ១ឆ្នាំ០៣ដង ដូចជាតំបន់អភិវឌ្ឍន៍ជប់ព្រីងឃុំថ្មី ឃុំញរ ឃុំរាជ្យមន្ទីរ ឃុំសំយ៉ោង។ល។
ទី២ ស្រុករមាសហែក ឃុំជ្រៃធំ ឃុំមុខដា និងឃុំស្តៅ ឃុំក្រសាំង ឃុំអណ្តូងត្របែក។ល។ ទី៣ ស្រុកចន្ទ្រា ទី៤ ស្រុកស្វាយជ្រំ ចំណែកស្រុក/ក្រុងចំនួន០៥ទៀតគឺមានភ្លៀងធ្លាក់រាយប៉ាយដែរ ក៏ប៉ុន្តែ ភ្លៀង រង្វើល ដីហួតទឹកអស់ គ្មានទឹកដក់ក្នុងស្រែ ក៏ប៉ុន្តែ ប្រជាកសិករនៅតែសម្រុកភ្ជួរដាស់ដី ខ្លះក៏ព្រោះស្រូវ(ព្រោះស្ងួតគឺប្រឈមខ្វះទឹកនៅរដូវប្រាំងតូច)។
លោកសុខ សុទ្ធាវុធ បន្តថា បើគិតជាមធ្យម ប្រជាកសិករ ទូទាំងខេត្តភ្ជួរព្រោះស្រូវបានប្រមាណ០៥ភាគរយប៉ុណ្ណោះ គិតមកដល់ថ្ងៃទី២៩ឧសភានេះ។ចំណែកប្រជាកសិករវិញបានលើកឡើងថា ឆ្នាំ២០២៤នេះប្រជាកសិករភាគច្រើន ធ្វើស្រូវពង្រោះ ហើយភាគច្រើនព្រោះស្ងួត ហើយសង្ឃឹមថា បើភ្លៀងនៅតែបន្តធ្លាក់ ២បីថ្ងៃមួយមេ គឺស្រូវពួកគាត់គ្មានហានីភ័យទេ ក៏ប៉ុន្តែជាធម្មតា ប្រជាកសិករធ្វើស្រែប្រវាស់មេឃ គឺតែងតែ ជួបហានីភ័យ ប្រសិនបើរង់ចាំមានទឹកគ្រប់គ្រាន់ជួនកាលទៅជ្រៅ គឺមិនអាចព្រោះស្រូវបានទេ បើអ្នកធ្វើស្រែ ស្ទូង គឺគេរង់ចាំភ្លៀងធ្លាក់គ្រប់គ្រាន់គេដាស់ដីចោល ពេលមានទឹកគ្រប់គ្រាន់គេសាបសំណាប ដល់ខែសីហា ទើបចាប់ផ្តើមដកស្ទូងរហូតដល់ខែកញ្ញា ទើបស្ទូងរួច ក៏ប៉ុន្តែជាង១០ឆ្នាំចុងក្រោយនេះគឺកសិករតិចណាស់ដែលស្ទូងស្រូវ ភាគច្រើនគឺធ្វើស្រែពង្រោះ ដោយកូនចៅទៅធ្វើការរោងចក្រ អស់ហើយ អ្នកធ្វើស្រែគឺមនុស្សចាស់ ក្មេងៗ គេមិនធ្វើស្រែទេ៕
ចែករំលែកព័តមាននេះ