ខេត្តកំពង់ឆ្នាំង ៖ រថយន្តដឹកកម្មករ២គ្រឿងបានបុកគ្នាពីក្រោយ បណ្ដាលឱ្យកម្មករ៤៧នាក់រងរបួសធ្ងន់ និងស្រាល ដែលហេតុការណ៍នេះ បានកើតឡើងនៅវេលាម៉ោង៦ និង១៥នាទីព្រឹកថ្ងៃទី ២៧ ខែឧសភា…
ខេត្តកំពង់ឆ្នាំង ៖ រថយន្តដឹកកម្មករ២គ្រឿងបានបុកគ្នាពីក្រោយ បណ្ដាលឱ្យកម្មករ៤៧នាក់រងរបួសធ្ងន់ និងស្រាល ដែលហេតុការណ៍នេះ បានកើតឡើងនៅវេលាម៉ោង៦ និង១៥នាទីព្រឹកថ្ងៃទី ២៧ ខែឧសភា ឆ្នាំ២០២៤ លើកំណាត់ផ្លូវជាលេខ៥ចន្លោះគីឡូម៉ែត្រលេខ៤៧ និង៤៨ ស្ថិតនៅក្នុងភូមិស្ពានពោធិ៍ ឃុំសេដ្ឋី ស្រុកសាមគ្គីមានជ័យ ។
បើតាមការបញ្ជាក់របស់លោក សេង ចិន្តា អធិការនគរបាលស្រុកសាមគ្គីមានជ័យបានឲ្យដឹងថា នៅមុនពេលកើតហេតុ មានរថយន្តដឹកកម្មករមួយគ្រឿង ម៉ាកហ៊ីយ៉ាន់ដាយ ពណ៌.ស ពាក់ស្លាកលេខកំពង់ឆ្នាំង 3A-1411 បើកបរដោយឈ្មោះ ណែម ប៊ុនធឿន អាយុ៤០ឆ្នាំ មានទីលំនៅឃុំចោងម៉ោង ស្រុកទឹកផុស ក្នុងដំណើរពីជើងទៅត្បូង ។
លុះមកដល់ចំណុចកើតហេតុបានជួបឧបសគ្គ ហើយអ្នកបើកបរជាន់ហ្វ្រាំង ដោយបង្ខំបណ្តាលឱ្យរថយន្តដឹកកម្មករមួយគ្រឿងទៀត ម៉ាកហ៊ីយ៉ាន់ដាយ ពណ៌.ស ពាក់ស្លាកលេខ កំពង់ឆ្នាំង3A.1011 បើកបរដោយបុរសឈ្មោះ ធា អាយុ៣៤ឆ្នាំ មានទីលំនៅភូមិត្រដក់ពង ឃុំខ្នារឆ្មា ស្រុកសាមគ្គីមានជ័យ បើកបរស្របទិសគ្នាពីក្រោយ បានបុករថយន្តខាងមុខពេញទំហឹង បណ្តាលឱ្យរងរបួសកម្មករសរុប៤៧នាក់ (ប្រុស១នាក់) ក្នុងនោះ របួសធ្ងន់២នាក់ ស្រី្តមានផ្ទៃពោះ១នាក់ប្រុស១ នាក់(ជាប់កាប៊ីនក្នុងរថយន្ត)។ ក្រោយពេលកើតហេតុ សមត្ថកិច្ចបានចុះសម្រួលចរាចរណ៍ និងដឹកយកជនរងគ្រោះទៅព្យាបាលនៅមណ្ឌលសុខភាពស្រុកកំពង់ត្រឡាច ។
សូមបញ្ជាក់ថា នៅរសៀលថ្ងៃដដែល គេឃើញ ឯកឧត្តម ស៊ុនសុវណ្ណារិទ្ធិ អភិបាលខេត្តកំពង់ឆ្នាំង រួមជាមួយលោកជំទាវ កែ ច័ន្ទមុន្នី អ្នកតំណាងរាស្ត្រមណ្ឌលកំពង់ឆ្នាំង ព្រមទាំងអភិបាលរងខេត្ត អញ្ជើញចុះសាកសួរសុខទុក្ខ និងផ្តល់ថវិកាដល់កម្មករក្នុងមណ្ឌលសុខភាព ដែលតាមតួលេខ កម្មកររងរបួសឡើងដល់៦៦នាក់ ខុសពីរបាយការណ៍ររបស់អធិការនគរបាលស្រុកមានត្រឹម៤៧នាក់៕
ចែករំលែកព័តមាននេះ