«អនាគតរបស់កម្ពុជា ជាមួយជប៉ុន ក្នុងក្រសែភ្នែកឯកអគ្គរាជទូត»
- ភ្នំពេញ
ដោយ ៖ ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតជប៉ុន នៅកម្ពុជារាជធានីភ្នំពេញ ៖ ជម្រាបសួរ !…
ដោយ ៖ ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតជប៉ុន នៅកម្ពុជា
រាជធានីភ្នំពេញ ៖ ជម្រាបសួរ ! អ្នកអានកាសែត «កោះសន្តិភាព» ទាំងអស់ជាទីរាប់អាន ។ ខ្ញុំឈ្មោះ អ៊ូអិណុ អាត់ស៊ូស៊ី ជាឯកអគ្គរាជទូតជប៉ុន ។ អស់រយៈពេលជាងមួយឆ្នាំកន្លះហើយ ដែលខ្ញុំបានមកដល់រាជធានីភ្នំពេញក្នុងនាមជាឯកអគ្គរាជទូត ហើយខ្ញុំតែងតែទទួលបានការស្វាគមន៍យ៉ាងកក់ក្តៅពីប្រជាជនកម្ពុជា មិនថាខ្ញុំទៅទីណា ឬជួបនរណានោះទេ ។ ក្នុងអំឡុងឆ្នាំស្នាក់នៅរបស់ខ្ញុំនៅទីនេះ ខ្ញុំសប្បាយចិត្តដែលបានដឹងច្បាស់ថា កម្ពុជាមានភាពរួសរាយរាក់ទាក់យ៉ាងណាចំពោះប្រទេសជប៉ុន ។
ជារឿងដែលត្រេកអរ គឺទំនាក់ទំនងរវាងជប៉ុន និងកម្ពុជាកាន់តែរឹងមាំជារៀងរាល់ឆ្នាំ ។ កាលពីឆ្នាំមុន គឺជាខួបលើកទី ៧០ នៃការបង្កើតទំនាក់ទំនងការទូតរវាងប្រទេសជប៉ុន និងកម្ពុជា ហើយក្នុងឱកាសនោះទំនាក់ទំនងទ្វេភាគីរបស់យើងត្រូវបានដំឡើងកម្រិតទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ» ។ លើសពីនេះទៀត ក៏មានដំណើរទស្សនកិច្ចយ៉ាងសកម្មនៃឥស្សរជនរវាងប្រទេសទាំងពីរ គឺសម្តេចមហាធិបតី ហ៊ុន ម៉ាណែត ដែលបានចូលកាន់តំណែងនាយករដ្ឋមន្ត្រី កាលពីខែសីហាឆ្នាំមុន និងនាយករដ្ឋមន្ត្រី គិស៊ីដា ហ្វូមិអុ ដែលបានបើកកិច្ចប្រជុំកំពូលចំនួនពីរលើករួចមកហើយ ។
ក្នុងកិច្ចប្រជុំកំពូលជប៉ុន និងកម្ពុជា រវាងនាយករដ្ឋមន្ត្រី គិស៊ីដា ហ្វូមិអុ និង សម្តេច ធិបតីហ៊ុន ម៉ាណែត កាលពីខែធ្នូ ឆ្នាំមុន នៅទីក្រុងតូក្យូ មេដឹកនាំទាំងពីរបានបញ្ជាក់ពីកិច្ចសហប្រតិបត្តិការលើវិស័យនានាដូចជា ឌីជីថលនីយកម្ម ថាមពល និងការលើកកម្ពស់ការតភ្ជាប់ ។ សម្តេចធិបតី ហ៊ុន ម៉ាណែត បានឈរនាំមុខនៃការអញ្ជើញសហគមន៍ធុរកិច្ចជប៉ុន មកបណ្តាក់ទុននៅកម្ពុជា និងបានបង្ហាញការរំពឹងទុកយ៉ាងមុតមាំចំពោះការវិនិយោគបន្ថែម ទៀតរបស់ក្រុមហ៊ុនជប៉ុន ដោយបានថ្លែងនូវគោលការណ៍សំខាន់ៗ នៅក្នុងសិក្ខាសាលាស្តី ពីការវិនិយោគនៅកម្ពុជា ដែលធ្វើឡើងក្នុងឱកាសទៅបំពេញទស្សនកិច្ចនៅប្រទេសជប៉ុន និងបានជួបពិភាក្សាការងារយ៉ាងស្វាហាប់ជាមួយអ្នកពាក់ព័ន្ធសហគ្រាសជប៉ុនជាដើម ។
កាលពីពេលថ្មីៗនេះ ពិធីបើកសម្ពោធរោងចក្រដំឡើងរថយន្តតូយ៉ូតា បានធ្វើឡើងនៅក្នុងតំបន់សេដ្ឋកិច្ចពិសេសភ្នំពេញ ក្រោមវត្តមានរបស់សម្តេចធិបតី ហ៊ុន ម៉ាណែត និងឧបនាយករដ្ឋមន្ត្រី និងរដ្ឋមន្ត្រីជាច្រើនរូបដែលធ្វើឱ្យយើងមានទំនុកចិត្តថា នេះនឹងនាំឱ្យមានការកើនឡើងនៃការវិនិយោគពីប្រទេសជប៉ុន ។ ក្នុងនាមខ្ញុំជាឯកអគ្គរាជទូត ខ្ញុំនឹងប្រឹងប្រែងឱ្យអស់ពីសមត្ថភាព ដើម្បីទាក់ទាញការវិនិយោគបន្ថែមពីប្រទេសជប៉ុន ។
នៅក្នុងការត្រួតពិនិត្យរយៈពេលបីឆ្នាំម្តង នៃបញ្ជីប្រទេសអភិវឌ្ឍន៍តិចតួច (LDC) ដែលធ្វើឡើងដោយគណៈកម្មាធិការអង្គការសហប្រជាជាតិសម្រាប់គោលនយោបាយអភិវឌ្ឍន៍ (CDP) ក្នុងខែមីនា ឆ្នាំនេះ ប្រទេសកម្ពុជាត្រូវបានណែនាំឱ្យ «ចាកចេញ» ពីបញ្ជី LDC ហើយវាត្រូវបានគេរំពឹងទុកថា កម្ពុជានឹងចាកចេញនៅឆ្នាំ ២០២៩ ។ រដ្ឋាភិបាលជប៉ុននឹងនៅតែបន្តផ្តល់ការគាំទ្រស្របតាមបញ្ហាអភិវឌ្ឍន៍របស់កម្ពុជា ដោយប្រើប្រាស់មធ្យោបាយសាធារណៈ និងឯកជនប្រកបដោយប្រសិទ្ធភាព ជាពិសេសជំនួយអភិវឌ្ឍន៍ផ្លូវការ (ODA) ដើម្បីឱ្យកម្ពុជាអាចសម្រេចបាននូវការអភិវឌ្ឍប្រកប ដោយចីរភាព ទោះបីជាបានចាកចេញពី LDC ក៏ដោយ ។
បច្ចុប្បន្នសហគមន៍អន្តរជាតិបាននិងកំពុងសាកល្បងការប្តេជ្ញាចិត្តរបស់យើងក្នុងការ រក្សាសណ្តាប់ធ្នាប់អន្តរជាតិដោយសេរី និងបើកចំហដោយផ្អែកលើនីតិរដ្ឋតាមវិធីជាច្រើន ។ ក្រៅពីនេះ បញ្ហានានាដែលទាំងជប៉ុន និងកម្ពុជាកំពុងប្រឈមមុខក្នុងសហគមន៍អន្តរជាតិ គឺកាន់តែមានភាពចម្រុះ និងស្មុគស្មាញ ដូចជា ការអភិវឌ្ឍនៃសង្គមឌីជីថល ការប្រែប្រួលអាកាសធាតុ និងការគំរាមកំហែងដែលបង្កឡើងដោយជំងឺឆ្លង ។ ខ្ញុំជឿថា ការដោះស្រាយបញ្ហាប្រឈមទាំងនេះ គឺជាការដែលតម្លៃពិតនៃភាពជាដៃគូយុទ្ធសាស្ត្រគ្រប់ជ្រុងជ្រោយត្រូវបានសាកល្បង ។ ខ្ញុំគិតថា «ភាពជាដៃគូយុទ្ធសាស្ត្រគ្រប់ជ្រុងជ្រោយ» មានន័យថា ជប៉ុន និងកម្ពុជា ធ្វើការរួមគ្នាជាដៃគូ ចាប់ដៃគ្នា ដើម្បីដោះស្រាយ មិនត្រឹមតែបញ្ហាប្រឈមទ្វេភាគីប៉ុណ្ណោះទេ ប៉ុន្តែថែមទាំងបញ្ហាប្រឈមក្នុងតំបន់ និងអន្តរជាតិជាមួយគ្នាផងដែរ ។ ការអនុវត្តការបណ្តុះបណ្តាលរួមគ្នារវាងជប៉ុន និងកម្ពុជាសម្រាប់មន្ត្រីដោះមីនរបស់ប្រទេសអ៊ុយក្រែន កាលពីខែមករា និងកក្កដា ឆ្នាំ ២០២៣ គឺជាឧទាហរណ៍ដ៏ល្អមួយនៃរឿងនេះ ។
យើងសូមលើកទឹកចិត្តឱ្យមានកិច្ចសហប្រតិបត្តិការបែបនេះបន្ថែមទៀតនាពេលអនាគត ។ ស្ថានទូតជប៉ុននឹងបន្តចូលរួមយ៉ាងសកម្មក្នុងការផ្លាស់ប្តូររវាងប្រទេសជប៉ុន និងកម្ពុជា ក្នុងស្ថានភាពនានា ហើយនឹងខិតខំអភិវឌ្ឍបន្ថែមទៀតនូវទំនាក់ទំនងរវាងប្រទេសទាំងពីរ ដែលមានចំណងយ៉ាងរឹងមាំដោយទំនុកចិត្ត និងមិត្តភាព ។ យើងស្នើសុំឱ្យមានការយោគយល់ និងគាំទ្ររបស់អ្នកអានទាំងអស់ក្នុងការពង្រឹងទំនាក់ទំនងរវាងប្រទេសជប៉ុន និងកម្ពុជា ៕
ចែករំលែកព័តមាននេះ