ខេត្តបាត់ដំបង ៖ ស្របពេលមេឃកំពុងធ្លាក់ភ្លៀងខ្លាំង រន្ទះបានបាញ់មេគោមួយក្បាលបណ្ដាលឲ្យដួលងាប់ភ្លាមៗនៅកណ្ដាលវាលស្រែ កាលពីវេលាម៉ោង១រសៀលថ្ងៃទី២១ ឧសភា នៅចំណុចភូមិល្វាទេ ឃុំត្រាង ស្រុកកំរៀង តែពុំមានគ្រោះថ្នាក់ដល់មនុស្សទេ ។
សេចក្ដីរាយការណ៍ពីសមត្ថកិច្ចបានឲ្យដឹងថា មេគោមួយក្បាលនោះត្រូវរន្ទះបាញ់ ពេលមេឃកំពុងធ្លាក់ភ្លៀងខ្លាំង ដែលលាយឡំជាមួយនឹងខ្យល់បោកបក់យ៉ាងខ្លាំងក្លាផង ។ បើតាមម្ចាស់គោ លោក សាំង សាន បានប្រាប់សមត្ថកិច្ចថា គាត់បានចងមេគោឲ្យស៊ីស្មៅនៅកណ្ដាលវាល តែគាត់ភ្លេចដឹកយកមកផ្ទះ ពេលមេឃភ្លៀងទើបត្រូវរន្ទះបាញ់ចំងាប់បែបនេះ ។
សូមរលឹកថា ឆ្នាំនេះចាប់តាំងពីដើមរដូវវស្សារហូតមកដល់ពេលនេះ បាតុភូតធម្មជាតិ «ផ្គរ រន្ទះ ខ្យល់កន្ត្រាក់» ហាក់បានកើតឡើងជាញឹកញាប់ រាល់ពេលមានភ្លៀងធ្លាក់ម្ដងៗ ហើយមានលកខណៈកាចសាហាវខ្លាំងបំផុត ។
រន្ទះបានបាញ់មនុស្សស្លាប់ និងសត្វពាហនៈងាប់ជាបន្តបន្ទាប់ រីឯលំនៅឋានរបស់ប្រជាពលរដ្ឋរាប់រយខ្នងបានរងការខូចខាតដោយសារខ្យល់កន្ត្រាក់» នេះបើយោងលើរបាយការណ៍អាជ្ញាធរមូលដ្ឋាន ៕
ចែករំលែកព័តមាននេះ