ADផ្ទាំងផ្សព្វផ្សាយពាណិជ្ជកម្ម

Picture

លម្អិត​ករណី​យន្ត​ហោះ​សិង្ហបុរី​ខិត​ខំ​ពុះ​ពារ​ឧប​សគ្គ​ទម្រាំ​ទៅ​ដល់​បាងកក

1 ខែ មុន

ទី​ក្រុង​បាង​កក​៖ ពាក់​ព័ន្ធ​នឹង​ករណី​យន្ត​ហោះ​របស់​ក្រុម​ហ៊ុន​អាកាស​ចរណ៍​សាំង​កាពួរ​អ៊ែរឡាញ​ដែល​ជួប​នឹង​ខ្យល់​កួច​ខ្លាំង​ បណ្ដាល​ឱ្យ​យន្ត​ហោះ​ផ្អៀង​ផ្អង​ និង​បោះពួយ​​ចុះ​មក​ក្រោម​ ស្លាប់​ជន​ជាតិ​អង់​គ្លេស​វ័យ​ចំណាស់​ម្នាក់​ និង​របួស​៣០​នាក់​។ ក្រុម​ហ៊ុន​ចេញ​មក​បក​ស្រាយ​ថា​​​នៅ​ពេល​ទៅ​ដល់​មហា​សមុទ្រ​ឥណ្ឌា មាន​ខ្យល់​កួច​ដ៏ធំ​​១​​ធ្វើ​ឱ្យ​យន្ត​ហោះ​ធ្លាក់​ចុះ​មក​ក្រោម​១៨០០​ម៉ែត្រ​​នៅ​ក្នុងថិរៈ​វេលា​​​​បី​នាទី​។ អ្នក​ខ្លះត្រូវ​​របួស​នៅ​ក្នុង​ហេតុ​ការណ៍​នេះដោយ​​សារ​​​ការប៉ះ​​ទង្គិច​ ឬ​របស់​របរ​ធ្លាក់​លើ​។​​…

ទី​ក្រុង​បាង​កក​៖ ពាក់​ព័ន្ធ​នឹង​ករណី​យន្ត​ហោះ​របស់​ក្រុម​ហ៊ុន​អាកាស​ចរណ៍​សាំង​កាពួរ​អ៊ែរឡាញ​ដែល​ជួប​នឹង​ខ្យល់​កួច​ខ្លាំង​ បណ្ដាល​ឱ្យ​យន្ត​ហោះ​ផ្អៀង​ផ្អង​ និង​បោះពួយ​​ចុះ​មក​ក្រោម​ ស្លាប់​ជន​ជាតិ​អង់​គ្លេស​វ័យ​ចំណាស់​ម្នាក់​ និង​របួស​៣០​នាក់​។ ក្រុម​ហ៊ុន​ចេញ​មក​បក​ស្រាយ​ថា​​​នៅ​ពេល​ទៅ​ដល់​មហា​សមុទ្រ​ឥណ្ឌា មាន​ខ្យល់​កួច​ដ៏ធំ​​១​​ធ្វើ​ឱ្យ​យន្ត​ហោះ​ធ្លាក់​ចុះ​មក​ក្រោម​១៨០០​ម៉ែត្រ​​នៅ​ក្នុងថិរៈ​វេលា​​​​បី​នាទី​។ អ្នក​ខ្លះត្រូវ​​របួស​នៅ​ក្នុង​ហេតុ​ការណ៍​នេះដោយ​​សារ​​​ការប៉ះ​​ទង្គិច​ ឬ​របស់​របរ​ធ្លាក់​លើ​។​​

នៅ​ពេល​មាន​លំនឹង​ឡើង​វិញ អ្នកបើ​កយន្ត​ហោះ​ក៏​បង្វែរ​ទិស​ដៅ​ចុះ​ចត​​ជា​បណ្ដោះ​អាសន្ន​នៅ​អាកាស​យាន​ដ្ឋាន​សុវណ្ណ​ភូមិ​​ប្រទេស​ថៃ​។ នៅ​ពេល​មិន​ទាន់​ចេញ​លទ្ធ​ផល​នៃ​ការ​ស្លាប់​បុរស​វ័យ​៧៣​ឆ្នាំ​នោះ​ជា​ផ្លូវ​ការ អាជ្ញាធរ​សង្ស័យ​ថា​គាត់​ប្រហែល​ជា​​​គាំង​បេះ​ដូង​។ អ្នក​ដំណើរ​ជន​ជាតិ​អង់គ្លេស​ម្នាក់​ឈ្មោះ​អេន​ឌ្រូ ដេវីស (Andrew Davies) ប្រាប់​ថា​អ្នក​រង​របួស​គឺ​អ្នក​ដែល​មិន​ដាក់​ខ្សែ​ក្រវាត់​ចង្កេះ​។ ចំណែក​អ្នក​ដាក់​ខ្សែ​ក្រវាត់​មិន​មាន​បញ្ហា​អ្វី​ទេ​។ បើ​ទុក​ជា​រង​របួស​ក៏​របួស​ស្រាល​ដែរ​។ ជាក់​ស្ដែង​ បុគ្គលិក​បម្រើ​ការ​នៅ​លើ​យន្ត​ហោះ​ដែល​​​ត្រូវ​ធ្វើ​ដំណើរ​ចុះ​ឡើង​ៗ​ដើម្បី​​​បម្រើ​សេវា​​ផ្សេង​ៗ​ជូន​ភ្ញៀវ​បាន​រង​របួស​គ្រប់​ៗ​គ្នា​។

ប្រទេស​ថៃ​គេ​យក​ចិត្ត​​ទុក​ដាក់​ណាស់​។ គ្រាន់​តែ​យន្ត​ហោះ​ចុះ​ទៅ​ដល់​ព្រលាន​​យន្ត​ហោះ​ភ្លាម ភ្នាក់​ងារ​សង្គ្រោះ​បន្ទាន់​​ក៏​​​ចុះ​​​ទៅ​ដឹក​អ្នក​ដំណើរ​ដែល​ត្រូវ​របួស​ចុះ​ពី​លើ​​យន្ត​ហោះ​។ ចំណែករថ​យន្ត​គិលាន​សង្គ្រោះ (ឡាន​ពេទ្យ​) ក៏​ប្រមូល​ផ្ដុំ​គ្នា​យ៉ាង​ពពាក់​ពពូន​​ដើម្បី​រង់​ចាំ​ដឹកអ្នក​របួស​​​ទៅ​មន្ទីរ​ពេទ្យ​។ គ្រូ​ពេទ្យ​ប្រាប់​ថា​អ្នក​ដំណើរ​៧​នាក់​រង​របួស​ធ្ងន់, ​អ្នក​ដំណើរ​២៣​នាក់ និង​បុគ្គលិក​បម្រើ​ការ​៩​នាក់​រង​របួស​មធ្យម, អ្នក​ដំណើរ​១៦​នាក់​របួស​ស្រាល​។ ​១៤​នាក់​ព្យាបាល​នៅ​នឹង​ព្រលាន​យន្ត​ហោះ​​​។

សាក្សីនិយាយ​ថា​​​​ហេតុ​ការណ៍​នេះ​​កើត​ឡើង​ដោយ​ចៃដន្យ។ ​នៅ​ពេល​យន្ត​ហោះ​ធ្លាក់​ចុះ​១៨០០​ម៉ែត្រ​មក​ក្រោម​​ជា​​ពេល​ដែល​អ្នក​ដំណើរ​ត្រូវ​ញ៉ាំ​អាហារ​។ ​នៅ​ពេល​នោះ បុគ្គលិក​នៅ​លើ​យន្ត​ហោះ​កំពុង​លើក​អាហារ​ជូន​ភ្ញៀវ​។ អីចឹង​ហើយ​បាន​ជា​អ្នក​ខ្លះ​ដែល​កំពុង​ពាក់​ខ្សែ​ក្រវាត់​សុខ​ៗ​ក៏​​ត្រូវ​ដោះ​ខ្សែ​ក្រវាត់​ចេញ​ដើម្បី​ទទួល​ទាន​អាហារ​។ ​បុគ្គលិក​ប្រចាំ​ព្រលាន​យន្ត​ហោះ​ប្រាប់​ថា​នេះ​ជា​លើក​ដំបូង​នៅ​សុវណ្ណ​ភូមិ​ដែល​មាន​ករណី​ស្លាប់​មនុស្ស​ដោយ​សារ​​​ខ្យល់​កួច​ទម្លាក់​យន្ត​ហោះ​​ចុះ​មក​ក្រោម​។

ឥឡូវ​នេះ ចំណាត់​ការ​នៅ​ចំពោះ​មុខ​គឺ​អាជ្ញាធរ​ថៃ​នឹង​រៀប​ចំ​សម្រួល​ឱ្យ​អ្នក​ដំណើរ​ដែល​ត្រូវ​របួស​ស្រាល​ៗ​គ្រាន់​តែ​រលាត់​ដៃ​ រលាត់​ជើង និង​អ្នក​ដែល​មិន​ត្រូវ​របួសអ្វី​សោះ​អាច​​សម្រាក​នៅ​ក្នុ​ងព្រលាន​យន្ត​ហោះ​​​។ គេ​មាន​កន្លែង​ពិសេស​សម្រាប់​ការ​ស្នាក់​នៅ និងហូប​ចុក​។​ ​​មិន​យូរ​ទេ​​នឹង​មាន​អ្នក​ទៅទទួល​ពួកគេ​​​ជា​មិន​ខាន។ ​​សិង្ហ​បុរី​​​បាន​បញ្ជូន​យន្ត​ហោះ​ទៅ​ដឹក​ពួក​គេហើយ​​។​

រូប​ភាព​ពី​ផ្កាយ​រណប​បង្ហាញ​ថាកាល​នោះ​ យន្ត​ហោះ​អែស​ឃ្យូ​៣២១ ​(SQ321) ​បើក​​កម្ពស់​១១៣០០​ម៉ែត្រ​ (ជាង​១១​គីឡូ​ម៉ែត្រ​ពី​លើ​អាកាស​)។ នៅ​ពេល​ទៅ​ដល់​ចំណុច​១​ យន្ត​ហោះ​ក៏​​ធ្លាក់​ចុះមក​នៅ​កម្ពស់​៩៤០០​ម៉ែត្រ​​​។ ​​​រយៈ​ពេល​បី​​​នាទី យន្ត​ហោះ​​ធ្លាក់​ចុះ​មក​ក្រោម​១៨០០​ម៉ែត្រ​។​ ​យន្ត​ហោះ​​ក៏​បន្ត​​បណ្ដែត​ខ្លួន​​​​​កម្ពស់​៩៤០០​ម៉ែត្រ​​​​មិន​ដល់​​១០​នាទី​ទេ​​ ​​អ្នក​បើក​យន្ត​ហោះ​ក៏​ដូរ​ទិស​ដៅ​ហោះ​ហើរ​ព្រោះ​មើលស្ថាន​ភាព​​​មិន​ស្រួល​។ រយៈ​ពេល​ជិត​​៣០​នាទី​ក្រោយ​មក​ ​យន្ត​ហោះ​​​ក៏​ចុះ​ចត​នៅ​​សុវណ្ណ​ភូមិ​​។​​

ករណី​យន្ត​ហោះ​​​សំយុង​ក្បាល​ចុះ​បែប​នេះ​កើត​ឡើង​នៅ​លើ​សមុទ្រ​អាន់​ដាម៉ាន់ (Andaman Sea) នៅ​ក្បែរ​ប្រទេស​ភូមា​។ កាល​នោះ គេ​មិន​​បាន​ដឹង​ថា​តើ​នៅទី​តាំង​នោះ​មាន​ការ​ប្រែ​ប្រួល​អាកាស​ធាតុ​បែប​ណា​ខ្លះ​ទេ​​​។ ករណី​យន្ត​ហោះ​ផ្អៀង​ទៅ​ម្ខាង​ៗ ឬ​ហោះ​បោះ​ពួយ​ធ្លាក់​ចុះ​មក​​ក្រោម​ច្រើន​កើត​មាន​នៅ​ពេល​មាន​ខ្យល់​ព្យុះ ឬ​ខ្យល់​កន្ត្រាក់​។ ប៉ុន្តែ​ចំណុច​ដែល​គ្រោះ​ថ្នាក់​បំផុត​គឺ​នៅ​ពេល​យន្ត​ហោះ​មិន​អាច​ទទួល​​រលក​សញ្ញា​ថា​មាន​ខ្យល់​កួច​នៅ​ខាង​មុខ​៕

អត្ថបទសរសេរ ដោយ

កែសម្រួលដោយ