ស្របពេលដែលភ្លៀងដើមរដូវចាប់ផ្តើមបង្អុរជាបន្តបន្ទាប់ ពលរដ្ឋកំពុងតែត្រេកអរនឹងការចាប់ហ៊ីងលក់ ហើយបង្ហោះនៅលើបណ្តាញសង្គមរហូតផ្អើលការចាប់អារម្មណ៍ទាមទារឲ្យមានអភិរក្ស ស្របពេលដែលតម្លៃហ៊ីងស្ទុះឡើងមួយគីឡូក្រាមដល់ទៅ៥ម៉ឺន៥ពាន់រៀល ទៅ៦ម៉ឺនរៀល ។
អ្នកនាង អូន រតនា ជាអ្នកលក់ហ៊ីងស្រស់ នៅមុខព្រលានយន្តហោះភ្នំពេញបានអោយកម្មវិធី លុយនៃសារព័ត៌មានកោះសន្តិភាពដឹងថា ហ៊ីងស្រស់បានតម្លៃ៥៥.០០០រៀលក្នុងមួយ គីឡូក្រាម និងហ៊ីងប្រឡាក់គ្រឿង តម្លៃ៥៨.០០០រៀលក្នុងមួយគីឡូក្រាម ។ អាជីវករវ័យ៣៣ឆ្នាំរូបនេះ លើកឡើងថា «ហ៊ីងរបស់ខ្ញុំលក់ គឺទិញពីកសិករខេត្តព្រះវិហារ និងក្រចេះ ។ ហ៊ីងហ្នឹងក៏មិនមែនហ៊ីងចិញ្ចឹមដែរ ពួកគាត់ដើរចាប់តាមភ្លឺស្រែ ព្រោះយកមកហ្នឹងមានតូចមានធំអត់ធំៗស្មើគ្នាទេ» ។
ងាកមកអ្នកស្រី ចែ នាង លក់ហ៊ីងស្រស់ នៅម្តុំបែកចាន បានអោយដឹងថា ហ៊ីងកំពុងមានទីផ្សារ នាពេលបច្ចុប្បន្នផងដែរ ។ អ្នកស្រី អាចលក់ហ៊ីងស្រស់នេះបានតម្លៃ៦ម៉ឺនរៀលឯណោះ ក្នុងមួយគីឡូក្រាម ។ អ្នកស្រី ចែ នាង បានបន្តថា «ខ្ញុំបង្ហោះលក់តាមហ្វេសប៊ុក ហើយមានភ្ញៀវកម្មង់ទិញច្រើន មានទីផ្សារ ។ ជាមធ្យមខ្ញុំលក់ដាច់២០-៣០គីឡូក្រាមក្នុងមួយថ្ងៃ បើថ្ងៃណាតិចជាង១០គីឡូក្រាមព្រោះភ្ញៀវគេទិញម្នាក់៤-៥គីឡូក្រាមទុកហូបអ៊ីចឹងទៅ» ។ អ្នកនាងបញ្ជាក់ថា អ្នកនាងទិញហ៊ីងទាំងនេះពីកសិករខេត្តសៀមរាប ក្រចេះ និងខេត្តព្រះវិហារ ។
លោក ជឹម រ៉ា ជាអ្នកលក់ហ៊ីងម្នាក់ទៀតបានអោយដឹងដែរថា ហ៊ីងមានទីផ្សារហើយលក់បានតម្លៃខ្ពស់ទៀតផង ។ លោកថា លក់ហ៊ីងស្រស់នោះតម្លៃ៤៥.០០០រៀល ក្នុងមួយគីឡូក្រាម ។ អាជីវកររូបនេះ លើកឡើងថា ៖«ខ្ញុំប្រមូលទិញពីកសិករតាមខេត្ត ហើយយកមកលក់បានតម្លៃ៤៥០០០រៀលក្នុងមួយគីឡូក្រាមហ្នឹង ។ និយាយទៅលក់ដាច់ដែរបានជាង១០-២០គីឡូក្រាមរាល់ថ្ងៃ» ។ លោក ជឹម រ៉ា បន្តថា ជាធម្មតាតាមការកត់សម្គាល់ នៅពេលមានភ្លៀងធ្លាក់កក់ខែថ្មីៗជោកជាំ ធ្វើឱ្យសត្វហ៊ីងដែលនៅសំងំក្នុងដីសើម និងក្រោមស្លឹកឈើងាប់វារត់ចេញមកក្រៅ និងយំសំឡេងទ្រហឹងតគ្នា ហើយត្រូវគេដើឆ្លុះ និងចាប់នៅពេលយប់យកទៅលក់លើទីផ្សារឱ្យអ្នកបរិភោគ ។
លោក ជឹម រ៉ា បន្ថែមថា ៖«សត្វហ៊ីងចេញនៅរដូវធ្លាក់ភ្លៀងកក់ខែថ្មីៗ គឺមានពងពេញៗពោះដោយមិនទាន់បើកមាត់ចាប់សត្វល្អិតផ្សេងៗធ្វើជាចំណី គឺគេពេញនិយមទិញទៅធ្វើជាម្ហូបបំផុត ទោះបីតម្លៃថ្លៃបន្តិចក៏ដោយ ។ ចំណែកសត្វហ៊ីងដែលបើកមាត់ និងជម្រុះពងអស់ក៏គេមិនសូវទិញ និងយកទៅបរិភោគដែរ ។ សត្វហ៊ីងជាធម្មតានៅពេលធ្លាក់ភ្លៀងពេលយប់ពួកវារត់ចេញមកក្រៅ ហើយអ្នកដើរចាប់ក៏ស៊ូដើរចាប់ចាប់នៅពេលយប់ផងដែរ នៅពេលថ្ងៃពួកវាសំងំមិនសូវចេញពីចេញនោះទេ»។
អាជីវករលក់សត្វហ៊ីង បន្តថា ឆ្នាំកន្លងមកមនុស្សភាគច្រើនជាពិសេស យុវវ័យនៅខេត្តផ្សេងៗ គឺមិនសូវបានស្គាល់ពីសត្វហ៊ីង និងរសជាតិរបស់វាទេ ប៉ុន្តែថ្មីៗនេះដោយសារគេឃើញមាន ការផ្សព្វផ្សាយតាមបណ្តាញសង្គមហ្វេសប៊ុក គឺធ្វើឲ្យមនុស្សភាគច្រើនបានស្គាល់ហើយចង់បរិភោគវា ។ ប៉ុន្តែក៏មានអ្នកខ្លះហាក់មានការខ្ពើមរអើមមិនហ៊ានប្រថុយបរិភោគចំពោះសត្វហ៊ីងនេះដែរ ។
លោក ហាក់ គឹមសុង រស់នៅរាជធានីភ្នំពេញ និងនិយមទទួលទានហ៊ីង បានអោយដឹងថា ហ៊ីងស្រស់នេះ អតិថិជនភាគច្រើនទិញយកទៅធ្វើម្ហូបបានច្រើនប្រភេទដូចជា ឆា ស្ងោរ ប្រឡាក់គ្រឿងអាំង ចៀន បំពងជាដើម ។
សត្វហ៊ីង គឺជាសត្វមួយប្រភេទសន្ដាននឹងកង្កែបដែរ តែវាមានមាឌត្រមុល បំប៉ោងខ្លួនបាន,វាចូលចិត្តបង្កប់ខ្លួននៅក្នុងដីសើម ឬក្រោមគំនរស្លឹកឈើសើមៗ ។ នៅពេលណាមានភ្លៀងធ្លាក់ វាចេញមកខាងក្រៅស្រែកយំឮសូរខ្លាំងហួសមាឌ ។ សត្វហ៊ីងមាន៣ប្រភេទ គឺ ហ៊ីងកណ្ដោល ឬហ៊ីងក្រូត មាឌធំជាងហ៊ីងឯទៀត វាយំឮក្រេតក្រូតៗ, ហ៊ីងជ័រ មានមាឌតូចជាងហ៊ីងកណ្ដោល មានជ័រស្អិតនៅលើស្បែក វាយំឮសូរតូច និងហ៊ីងចំបក់ មានមាឌតូចជាងហ៊ីងជ័រ វាយំឮសូរខ្សោយជាងហ៊ីងជ័រ ៕
ចែករំលែកព័តមាននេះ