ខេត្តព្រះសីហនុ ៖ យុវជនម្នាក់​ត្រូវខ្សែភ្លើងឆក់ បណ្តាល​ឱ្យ​ស្លា.ប់នៅនឹងកន្លែងកើតហេតុ​ ខណៈពេលដែលជនរងគ្រោះ​រូបនោះបានឡើងចងទទឹកពេលមេឃដែលកំពុងភ្លៀង ។

ហេតុការណ៍ខាងលើ​នេះបានកើតមានឡើងនៅថ្ងៃទី១២ ឧសភា ឆ្នាំ​២០២៤ វេលាម៉ោង៧និង​៤០នាទី​យប់ នៅចំណុចផ្ទះរបស់ជនរងគ្រោះ ស្ថិតនៅភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ។

តាមសមត្ថកិច្ចឱ្យដឹងថា ជនរងគ្រោះឈ្មោះ គង់ សំណាង ភេទប្រុស អាយុ១៦ឆ្នាំ មុខរបរសិស្ស មានទីលំនៅភូមិ ភូមិឃុំកើតហេតុខាងលើ ខណៈពេលជនរងគ្រោះ បានឡើងទៅចងទរបង្ហូរទឹកពេលដែលភ្លៀងធ្លាក់មកលិច ហើយក៏​ត្រូវ​ខ្សែភ្លើងឆក់បណ្តាល​ឱ្យ​ស្លាប់តែម្ដង។

តាមការបំភ្លឺរបស់ឈ្មោះ ជីវ សុណា ភេទស្រីអាយុ៤០ឆ្នាំ មុខរបរមេផ្ទះ ត្រូវជាម្តាយ​របស់ជនរងគ្រោះ​បានឱ្យដឹងថា មុនពេលកើតហេតុ មេឃកំពុងតែភ្លៀង ហើយទរបង្ហូរទឹកនៅផ្ទះខ្លួនបានហូរលិច ពេលនោះកូនរបស់​គាត់​បានដាក់កាំជណ្តើរឡើងទៅចង​ទកុំឱ្យលិច ពេលកំពុងចងនោះ ស្រាប់តែខ្សែភ្លើងបានឆ្លងចរន្តភ្លើង បានឆក់កូនរបស់ខ្លួនតែម្ដង ឃើញដូចនោះខ្លួនក៏ហៅបងប្អូនឱ្យ​មក​ជួយ ពេលមកដល់កូនរបស់​គាត់​បានស្លាប់បាត់ទៅហើយ។

ភ្លាមសមត្តិកិច្ចជំនាញបានចុះមកពិនិត្យ​កន្លែងកើតហេតុ​រួម​មាន ១-វរសេនីយ៍ទោ ញេន សុខុន អធិការរង ២-វរសេនីយ៍ត្រី ឆែម សាវ៉ាត នាយផ្នែកពិនិត្យ វិភាគ កន្លែងកើតហេតុ ៣-វរសេនីយ៍ត្រី ទេព គង់ម៉េង នាយប៉ុស្តិ៍ នគរបាលរដ្ឋបាលវាលរេញ ៤-លោក យ៉ុក យ៉ន មេភូមិបឹងវែង និង៥-លោក ជី ឃន អនុភូមិបឹងវែង។

ក្រោយពេលពីការត្រួតពិនិត្យ វិភាគកន្លែងកើតហេតុ សពជនរងគ្រោះ​ខាងលើ ពុំមានឃើញស្លាកស្នាមដែលពាក់ព័ន្ធនិងបទល្មើសព្រហ្មទណ្ឌឡើយ ។

បច្ចប្បន្ន សពជនរងគ្រោះ​ត្រូវបានសមត្ថកិច្ច​ប្រគល់ជូនសាច់ញាតិយកទៅធ្វើបុណ្យតាមប្រ​ពៃណី ៕​