ឱម៉ាល់ ដែលជាប្រភេទសត្វល្អិតមួយប្រភេទនៅក្នុងប្រព័ន្ធអេកូឡូស៊ីរបស់ពិភពលោក នៅពេលនេះក៏មានទីផ្សារដែរ ដោយមួយគីឡូក្រាម វាមានតម្លៃរហូតដល់ទៅ៣៥ដុល្លារឯណោះ ។ នេះបើតាមអ្នកដែលធ្លាប់ទទួលទានសត្វនេះ បានប្រាប់សារព័ត៌មានកោះសន្តិភាព ។
លោក បញ្ញា ជាអ្នកទទួលទាន ឱម៉ាល បានអះអាងថា «លោកទើបតែបានទិញ ឱម៉ាល់ មួយ គីឡូក្រាមពីខាងកោះកុង ក្នុងតម្លៃ៣៥ដុល្លារ ក្នុងមួយគីឡូ។ វាថ្លៃ ប៉ុន្តែខ្ញុំចង់សាកវា»។
លោកបានបន្តថា «ខ្ញុំមិនដឹងគេចាប់ពីណាទេ តែឃើញគេបង្ហោះលក់នៅលើហ្វេសប៊ុក ហើយចាប់អារម្មណ៍ក៏ចង់សាក ពីព្រោះខ្ញុំធ្លាប់ហូបកាលនៅក្មេង ពេលនៅស្រុក» ។
លោកបានបន្តថា «តម្លៃនេះ ថ្លៃជាងបង្កង និងបង្គារផង ពីព្រោះបង្កង និងបង្គារ ឥឡូវមួយគីឡូក្រាមត្រឹមតែ១៥ដុល្លារអីទេ អាធន់កណ្តាល ប៉ុន្តែគ្រាន់តែចង់ហូប ក៏ទិញមួយគីឡូក្រាមទៅ» ។
តាមការអះអាងរបស់ បញ្ញ ចំពោះឱម៉ាល់នេះ មិនមែនជាឱម៉ាលធំៗដែលទិចហើមមាត់ ហើយគ្រោះថ្នាក់នោះទេ វាគឺជាកូននៅក្នុងសំបុក ដែលគេយកមកបេះ ពោលគឺជាកូនតូចៗ។
លោកបានអះអាងថែមទៀតថា «សម្រាប់ឱម៉ាល់នេះ គឺលោកគ្រោងនឹងយកទៅលីងខ្លះ និង ឆាខ្លះ ក្រែងត្រូវមាត់ ខណៈដែលពីក្មេងធ្លាប់ទទួលទានពេលទៅឃ្វាលគោ នៅតាមព្រៃព្រឹក្សា ឆ្ងាយពីភូមិ»។
លោកបានបញ្ជាក់ថា «ខាន១០ទៅ២០ឆ្នាំហើយ ដល់ឃើញក៏ចង់សាក ជាពិសេសគឺសម្រាប់ យកមកក្លែមឆ្ងាញ់ណាស់» ។
រហូតមកដល់ពេលនេះ សត្វល្អិតជាច្រើនប្រភេទ បានក្លាយជាអាហាររបស់មនុស្សជាតិ ហើយ សូម្បីតែអង្គការស្បៀងអាហារ និងកសិកម្ម នៃអង្គការសហប្រជាជាតិ ក៏បានទទួលស្គាល់ថា ពពួកសត្វល្អិត គឺជាប្រភពអាហារដែលមានប្រូតូអ៊ីនមួយផងដែរ ។
មកដល់ពេលនេះ ពពួកសត្វល្អិតដែលត្រូវបានពលរដ្ឋខ្មែរយើងទទួលទាន មានតាំងពីចង្រិត កណ្តូប អាពីង ដង្កូវដួង កន្ទាទូក ជាដើម ។
ចែករំលែកព័តមាននេះ