ខេត្តកំពង់ឆ្នាំង ៖ ស្នងការរងទទួលការងារបង្ការ និងពន្លត់អគ្គីភ័យនៃស្នងការដ្ឋាននគរបាលខេត្តកំពង់ឆ្នាំង លោកឧត្តមសេនីយ៍ត្រី លុយ ឌីណា បានអំពាវនាវបងប្អូនប្រជាពលរដ្ឋ អាជីវករ ក៏ដូចជាលោកគ្រូអ្នកគ្រូតាមបណ្ដា សាលារៀន សូមប្រុងប្រយ័ត្នពីគ្រោះអគ្គិភ័យដែលតែងកើតមាន ក្នុងរដូវក្តៅហួតហែងនេះ ។
មានប្រសាសន៍បែបនេះ នៅក្នុងឱកាសដែលលោកដឹកនាំក្រុមរថយន្តពន្លត់អគ្គិភ័យចំនួន៥គ្រឿងទៅបាញ់ទឹកនៅសាលាវិទ្យាល័យព្រះបាទសុរាម្រិត នៅព្រឹកថ្ងៃទី៣ ខែឧសភា ឆ្នាំ២០២៤ ដើម្បីកាត់បន្ថយកម្ដៅដល់សិក្សានុសិស្សដែលកំពុងសិក្សា។
លោកស្នងការរងបានបន្តថា បងប្អូនអាជីវករប្រជាពលរដ្ឋ និងតាមបណ្តាសហគ្រាសសាលារៀន មុនពេលចាកចេញពីកន្លែង ត្រូវបិទចរន្តអគ្គិសនីឲ្យបានត្រឹមត្រូវ និងត្រូវពន្លត់ភ្លើងចង្ក្រាន ភ្លើងទានធូបជាដើម ដើម្បីចៀសវាងគ្រោះអគ្គិភ័យដែលតែងកើតឡើងជាយថាហេតុ ។ ជាមួយគ្នានេះសូមបងប្អូនទិញបំពង់ពន្លត់អគ្គិភ័យដាក់តាមផ្ទះ តាមកន្លែងធ្វើការ ដើម្បីពន្លត់អគ្គិភ័យបន្ទាន់មុនពេលរថយន្តពន្លត់អគ្គិភ័យរបស់នគរបាលទៅដល់។
លោកស្នងការរងបានបញ្ជាក់ថា ថ្ងៃនេះដោយទទួលបានបទបញ្ជាពីសម្ដេចបវរអធិបតី ហ៊ុន
ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏ដូចជាឯកឧត្តម អភិបាលខេត្ត លោកស្នងការនគរបាលខេត្ត លោកបានដឹកនាំរថយន្តចំនួន៥គ្រឿងមកបាញ់ទឹក នៅសាលាវិទ្យាល័យព្រះបាទសុរាម្រឹត ដើម្បីកាត់បន្ថយកម្ដៅដល់សិក្សានុសិស្សដែលកំពុងតែសិក្សា នៅព្រឹកនេះ ហើយនៅរសៀលថ្ងៃដដែលននេះដែរ នឹងទៅបាញ់ទឹកនៅ សាលាបឋមសិក្សាគំរូក្រុង បន្តទៀត ។ចំពោះផែនការនឹងបន្តបាញ់តាមបណ្ដាលសាលារៀននានា ជាបន្តបន្ទាប់រហូតដល់មានភ្លៀងធ្លាក់ផងដែរ។
លោក សឹម ប្រឹម ប្រធានមន្ទីរអប់រំ យុវជន និងកីឡា ខេត្តកំពង់ឆ្នាំង ក៏បានបញ្ជាក់ដែរថា ក្នុងរដូវក្តៅនេះ តាមបណ្ដាលសាលារៀនបានកាត់បន្ថយពេលសិក្សាខ្លះដែរ ទៅតាមកាលៈទេសៈ ដូចជាចូលរៀនម៉ោង ៧ ចេញ ម៉ោង៩,៣០ ឬម៉ោង ១០ ពេល ល្ងាចចូលម៉ោង២ចេញម៉ោង ៤កន្លះ ឬម៉ោង៥ ទៅតាមកម្តៅនៃសាលានិមួយៗ ហើយការងារនេះ នាយកសាលាជាអ្នកសម្រេច ៕
ចែករំលែកព័តមាននេះ