ខេត្តសៀមរាប ៖ កម្លាំងសមត្ថកិច្ច បានចាប់ខ្លួនស្ត្រីម្នាក់ទៀត បញ្ជូនទៅកាន់តុលាការ ដែលស្ត្រីម្នាក់នេះ ជាបក្ខពួករបស់មេខ្លោងឆបោក ឡេង ចាន់ណា ពាក់ព័ន្ធនឹងក្រុមហ៊ុន ប្រ៊ីលាន ស៊ីធី ។
ចៅក្រមស៊ើបសួរសាលាដំបូងខេត្តសៀមរាប បានចេញដីកានៅថ្ងៃទី៣០ ខែមេសា ឆ្នាំ២០២៤ បង្គាប់ឱ្យនាំខ្លួនជនត្រូវចោទឈ្មោះ រ៉េត សុធីដា ភេទស្រី អាយុ៣២ឆ្នាំ នាំយកមកបង្ហាញខ្លួននៅចំពោះមុខចៅក្រមស៊ើបសួរ ដើម្បីសួរចម្លើយពីបទ «ឆបោកមានស្ថានទម្ងន់ទោស (ជាក្រុមមានការចាត់តាំង)» តាមបញ្ញត្តិមាត្រា ៣៧៧ និងមាត្រា ៣៨០ នៃក្រមព្រហ្មទណ្ឌ ។
ការនាំខ្លួនជនត្រូវចោទ ឈ្មោះ រ៉េត សុធីដា ត្រូវបានធ្វើឡើងបន្ទាប់ពីចៅក្រមស៊ើបសួរ បានពិនិត្យភស្តុតាង ព្រមទាំងបានសួរចម្លើយ ជនត្រូវចោទឈ្មោះ ឡេង ចាន់ណា រួចមក និងឃើញថា ជនត្រូវចោទឈ្មោះ រ៉េត សុធីដា មានជាប់ពាក់ព័ន្ធ នឹងបទល្មើសខាងលើ ។
យោងតាមអ្នកនាំពាក្យសាលាដំបូងខេត្តសៀមរាប បានអោយដឹងថា នៅថ្ងៃទី២ ខែឧសភា ឆ្នាំ២០២៤ មន្ត្រីនគរបាលយុត្តិធម៌ បាននាំខ្លួនជនត្រូវចោទឈ្មោះ រ៉េត សុធីដា មកបង្ហាញខ្លួនចំពោះមុខចៅក្រមស៊ើបសួរ ។ ក្រោយពីបានសួរចម្លើយជនត្រូវចោទឈ្មោះ រ៉េត សុធីដា រួចមក និងបានពិនិត្យភស្តុតាងក្នុងសំណុំរឿង ព្រមទាំងពិចារណាអង្គហេតុ និងអង្គច្បាប់គ្រប់ជ្រុងជ្រោយ ចៅក្រមស៊ើបសួរបានសម្រេចឃុំខ្លួនជនត្រូវចោទខាងលើជាបណ្តោះអាសន្ន និងបានបញ្ជូនទៅពន្ធនាគារខេត្តសៀមរាប ដើម្បីបន្តការស៊ើបសួរតាមនីតិវិធីច្បាប់ ។
សូមបញ្ជាក់ ផ្អែកតាមចម្លើយរបស់ជនត្រូវចោទឈ្មោះ ឡេង ចាន់ណា បានបញ្ជាក់ថា ជនត្រូវចោទឈ្មោះ រ៉េត សុធីដា មានជាប់ពាក់ព័ន្ធនឹងបទល្មើសខាងលើ ដែលស្របនឹងការអះអាងជារួមរបស់ជនត្រូវចោទឈ្មោះ រ៉េត សុធីដា ដែលបានឆ្លើយចំពោះមុខចៅក្រមស៊ើបសួរថា កន្លងមកខ្លួនធ្លាប់បានណែនាំមិត្តភក្តិឱ្យដាក់ប្រាក់ចូលក្នុងក្រុមហ៊ុន ហើយខ្លួនក៏ទទួលបានផលប្រយោជន៍ជាប្រាក់មួយចំនួនពីការងារខាងលើ ។
បន្ថែមលើសពីនេះ ជនត្រូវចោទឈ្មោះ រ៉េត សុធីដា បានឆ្លើយបញ្ជាក់ច្បាស់ថា “ខ្លួនមិនបានទទួលរងនូវការខាតបង់អ្វីមួយនៅក្នុងក្រុមហ៊ុន ប្រ៊ីលាន ស៊ីធី នោះទេ ដោយសារខ្លួន មិនបានដាក់ប្រាក់នៅក្នុងក្រុមហ៊ុន” ។
តាមចម្លើយរបស់ជនត្រូវចោទឈ្មោះ ឡេង ចាន់ណា និងជនត្រូវចោទឈ្មោះ រ៉េត សុធីដា ឃើញថា ជនត្រូវចោទឈ្មោះ រ៉េត សុធីដា ពិតជាមានជាប់ពាក់ព័ន្ធនឹងបទល្មើសខាងលើ ហើយជនត្រូវចោទឈ្មោះ រ៉េត សុធីដា មិនមែនជាជនរងគ្រោះឡើយ ។
សូមរម្លឹកឡើងវិញថា «សំណុំរឿងក្រុមហ៊ុន ឡេង ចាន់ណា តុលាការបង្កកគណនីធនាគារ ចំនួន១៨៣ ឃុំខ្លួន៥នាក់ ចាប់ខ្លួន និងកោះហៅ២៦នាក់ទៀត» សំណុំរឿងក្រុមហ៊ុន ប៊ីលាន ស៊ីធី វើលដ៍ ឯ.ក របស់ជនត្រូវចោទឈ្មោះ ឡេង ចាន់ណា ៖ សាលាដំបូងខេត្តសៀមរាប សម្រេចបង្កកគណនីធនាគារ ចំនួន ១៨៣ និងទ្រព្យសម្បត្តិមួយចំនួន សម្រេចឃុំខ្លួនជនត្រូវចោទ ចំនួន ៥នាក់ រួមមានទាំង ឡេង ចាន់ណា ខណៈកំពុងស៊ើបអង្កេតលើអ្នកពាក់ព័ន្ធនានាទាំងសវតាជាតិ និងទ្រព្យសម្បត្តិ ដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ