ខេត្តក្រចេះ ៖ មន្ត្រីកងរាជអាវុធហត្ថលើផ្ទៃប្រទេសម្នាក់ ត្រូវបានគេជួយសង្គ្រោះ បញ្ជូនទៅមន្ទីរពេទ្យ ក្រោយជួបឧបទ្ទវហេតុគ្រោះថ្នាក់ចរាចរណ៍ កាលពីវេលាម៉ោង១២និង២៥នាទីយប់ ឈានចូលថ្ងៃទី២៧ ខែមេសា ឆ្នាំ២០២៤…
ខេត្តក្រចេះ ៖ មន្ត្រីកងរាជអាវុធហត្ថលើផ្ទៃប្រទេសម្នាក់ ត្រូវបានគេជួយសង្គ្រោះ បញ្ជូនទៅមន្ទីរពេទ្យ ក្រោយជួបឧបទ្ទវហេតុគ្រោះថ្នាក់ចរាចរណ៍ កាលពីវេលាម៉ោង១២និង២៥នាទីយប់ ឈានចូលថ្ងៃទី២៧ ខែមេសា ឆ្នាំ២០២៤ ស្ថិតលើផ្លូវជាតិលេខ៣៧៧A (ក្រចេះ-ខ្លាស្ទុះ) ចំណុចមុខវិមានសព ស្ថិតនៅភូមិស្រែស្តៅ សង្កាត់អូរឬស្សី២ ក្រុងក្រចេះ ។
យោងតាមប្រភពព័ត៌មាន បានឲ្យដឹងថា មន្ត្រីកងរាជអាវុធហត្ថ លើផ្ទៃប្រទេស ដែលរងគ្រោះថ្នាក់ចរាចរណ៍ខាងលើ មានឈ្មោះ តែម សុឃាន ភេទប្រុស អាយុប្រហែល៤៤ឆ្នាំ រងរបួសស្រាលបើកបររថយន្តម៉ាកឡង់គ្រីស័រ ពណ៏ស្ករ ពាក់ស្លាកលេខភ្នំពេញ 2H-8587 ។
ប្រភពព័ត៌មានឲ្យដឹងបន្តថា មុនពេលកើតហេតុ រថយន្តខាងលើ បានបើកបរក្នុងទិសដៅពីខាងកើត ទៅលិច មកដល់ចំណុចកើតហេតុ ក៏បានជ្រុលចង្កូតធ្លាក់ចេញពីថ្នល់ បណ្តាលអោយក្រឡាប់ជាច្រើនត្រឡប់ ហើយក៏ជ្រុលទៅបុកបង្គោលភ្លើង១ដើម បណ្ដាលឱ្យដាច់ចរន្តអគ្គិសនីទាំងយប់ នៅតំបន់នោះ និងបង្កការខូចខាតរបងថ្ម ប្រវែងប្រហែល១០ម៉ែត្រ ។
ក្រោយកើតហេតុ មន្ត្រីកងរាជអាវុធក្រុងក្រចេះ បានទៅដល់ចំណុចកើតហេតុ ជួយអន្តរាគមន៍។ ជនរងគ្រោះក្នុងហេតុការណ៍ខាងលើជាមន្ត្រីកងរាជអាវុធហត្ថលើផ្ទៃប្រទេស បានរងរបួសស្រាល ដោយស្ថិតក្នុងស្ថានភាពស្រវឹង ។
ជនរងគ្រោះក៏ត្រូវបានសមត្ថកិច្ច ដឹកយកទៅព្យាបាលនៅមន្ទីរពេទ្យបង្អែកខេត្តក្រចេះភ្លាមៗ ចំណែករថយន្ត មន្ត្រីជំនាញស្ទូចយកទៅរក្សាទុកនៅអធិការនគរបាលក្រុងក្រចេះ ជាបណ្ដោះអាសន្ន ៕
ចែករំលែកព័តមាននេះ