ត្រឹមរយៈពេលជាង៤ខែ! អាកាសធាតុក្តៅខ្លាំង ផ្តា.ច់ជីវិតមនុស្សជាង៦០នាក់ នៅថៃ
ប្រទេសថៃ ៖ បើយោងតាមក្រសួងសុខាភិបាលព្រះរាជាណាចក្រថៃ នៅថ្ងៃទី១០ ខែឧសភា ឆ្នាំ២០២៤
ប្រទេសថៃ ៖ បើយោងតាមក្រសួងសុខាភិបាលព្រះរាជាណាចក្រថៃ នៅថ្ងៃទី១០ ខែឧសភា ឆ្នាំ២០២៤ បានប្រកាសថា អាការៈ Heatstroke បានផ្តាច់ជីវិតមនុស្សចំនួន៦១នាក់នៅក្នុងប្រទេសថៃ ត្រឹមរយៈពេលជាង៤ខែនៃឆ្នាំនេះ ពោលគឺច្រើនជាងរយៈពេលពេញមួយឆ្នាំ ២០២៣ បន្ទាប់ពីអាកាសធាតុក្តៅខ្លាំងអស់ជាច្រើនសប្តាហ៍ នៅទូទាំងតំបន់។
យោងប្រភពពីទីភ្នាក់ងារសារព័ត៌មាន AFP និង Channel News Asia បានឱ្យដឹងថា រលកនៃអាកាសធាតុក្តៅខ្លាំងបានវាយប្រហារប្រទេសថៃ ក្នុងប៉ុន្មានសប្តាហ៍ថ្មីៗនេះ ដែលជំរុញឱ្យអាជ្ញាធរចេញការព្រមានជារៀងរាល់ថ្ងៃ។ ក្រសួងសុខាភិបាលបានរាយការណ៍ថា មនុស្ស៦១នាក់បានស្លាប់ ដោយសារអាការៈ Heatstroke ដែលជាការសន្លប់ដោយកម្តៅ ឬបញ្ហាសុខភាពធ្ងន់ធ្ងរ ក្រោយខ្លួនប្រាណគ្រប់គ្រងសីតុណ្ហភាពលែងបាន ដែលការកត់ត្រាចាប់តាំងពីដើមឆ្នាំ ២០២៤ ពោលកើនឡើងខ្ពស់ បើធៀបនឹង៣៧នាក់ កាលពីឆ្នាំ ២០២៣ (ពេញ១ឆ្នាំ)។ ក្រសួងបញ្ជាក់ថា ភាគឦសានប្រទេសថៃ ដែលជាតំបន់បេះដូងកសិកម្ម បានឃើញចំនួនអ្នកស្លាប់ច្រើនជាងគេ។
អ្នកវិទ្យាសាស្ត្រពិភពលោក បានព្រមានជាយូរមកហើយថា ការប្រែប្រួលអាកាសធាតុដែលបង្កឡើងដោយកត្តាមនុស្ស នឹងបង្កើតរលកកំដៅញឹកញាប់ យូរជាង និងកាន់តែខ្លាំងឡើង ខណៈពេលដែលបាតុភូតអេលនីណូ (El Nino) បានជំរុញឱ្យមានអាកាសធាតុក្តៅខ្លាំងក្នុងឆ្នាំនេះ។ តំបន់អាស៊ីក៏កំពុងឡើងកំដៅលឿនជាងមធ្យមភាគពិភពលោកផងដែរ។ នេះបើយោងតាមរបាយការណ៍អង្គការឧតុនិយមពិភពលោករបស់អង្គការសហប្រជាជាតិ។
ប្រទេសថៃនៅឆ្នាំនេះ បានជួបប្រទះនឹងការពន្យារពេលក្នុងរដូវខ្យល់មូសុងរបស់ខ្លួន ដោយអាកាសធាតុក្តៅខ្លាំងមានរយៈពេលយូរជាងធម្មតា។ ប៉ុន្តែទោះយ៉ាងណា ខ្យល់ព្យុះបានវាយប្រហារផ្នែកខ្លះក្នុងសប្តាហ៍នេះ ដោយបានបន្ថយកំដៅ ប៉ុន្តែនាំមកនូវការព្រមានពីអាជ្ញាធរអំពីទឹកជំនន់ដែលអាចកើតមានភ្លាមៗ៕ (រូបភាព ៖ Reuters, The Nation, Bloomberg និង The Thaiger)
ចែករំលែកព័តមាននេះ